Twins演唱会｜曾被质疑好快冇　阿Sa认冇自信多谢阿娇冇自我放弃

Twins一连14场的《TWINS SPIRIT SINCE 2001 LIVE IN HONG KONG》眨眼完成第三场，今日蔡卓妍（阿Sa）、钟欣潼（阿娇）终于可以休息一天，25号才再展开接下来的11场演出。昨日天气虽然冻到得几度，但无减观众热情， 一开骚观众就几乎企晒起身又唱又跳，Twins台上也答谢大家：“你哋嘅热情喺咁冻嘅天气下，畀到我哋全晚力量！好劲呀！”

昨晚Twins不单搞“笑”观众，亦同时搞“喊”大家，唱《相爱22年》前互诉心声时，阿Sa同阿娇讲：“亲爱嘅钟欣潼女士，哈哈……多谢你22年来成为我拍档！我人生最大成就，就系同你成为组合！呢个江山系我哋打返嚟！而无论开心或低潮你都对我不离不弃、陪住我，出面好多人觉得我好醒，其实唔系㗎，我内里唔系一个非常自信嘅人，好多时你同我一齐，我多咗好多力量，多谢你呀钟欣娇！”

而阿娇则回话：“认识你22年，我真系冇谂过我地可以走咁远，开始𠮶阵，出面好多质疑嘅声音，话我哋好快就冇㗎啦，但系我哋系逆境更齐心，更同心对抗出面，多谢你冇放弃我，我亦冇放弃自己！”现场歌迷即时感动大叫：“你哋要加油！”而阿Sa亦被感动回话：“你系我认识嘅人里面，个样最柔弱、内心最坚强嘅人，好多谢你冇放弃自己。”继而两人互相拥抱。不少歌迷听完他们对话，都眼湿湿被感动泪下。

而去到其他环节，Twins两个都为现场带来不少欢乐笑料，阿Sa提醒大家入场记得悉心打扮，扮番Twins以前的造型，每晚她们也会在台上送上演唱会限量签名版Sweatshirt比最佳造型奖得主，昨晚他们就选了一个4岁小朋友赢得奖品。

握手环节阿Sa两晚也太慢，握到第三首歌完了，都未握完四面观众，要阿娇企喺度等，又经常搞笑大叫：“哎呀，弊喇，我未握晒呀，我好慢呀！”安歌时段唱《丢架》时，阿Sa突然叫停，正当大家不知发生什么事时，原来是她一开口唱就咬到自己条脷，要重新唱过，搞到阿娇狂笑问她：“冇嘢嘛？”而阿Sa除了自己狂笑，又不停反问：“喂呀，点解次次咁嘅嘢都发生喺我身上㗎，冇理由㗎，我食得咁清，唔会热气㗎。我地抹走佢从头嚟过！”而阿娇就笑住话：“系抹唔走㗎，哈哈。” 两人表现非常搞笑可爱，为全场带来欢乐无穷。

顺利完满成功完成三晚演出，今天Twins终于可以休息一日，25日先再开骚，阿Sa昨晚在台上就已经叫观众注意保暖：“今日好冻呀，你哋有冇著够衫？我今朝好似细个返学𠮶阵咁，冻到唔想起身，但系返到红馆，一开场感受到你哋嘅热情，真系即刻充满能量呀！”观众即报以超热烈欢呼声。完场后Twins异口同声说：“Yeah！终于三场完成，可以放假。好想食宵夜，好饿，可能系今晚观众太热情，全部都唔钟意坐低㗎，成晚都企晒起身跳舞，我哋都用多咗好多能量呀。”问到休息日会做咩？两个都话：“跳足三晚，按摩，要按摩呀，哈哈。”而她们亦漏夜去跟自己的巴士站灯箱打卡，容祖儿还叫她们瞓饱啲。