【我不怕唱歌】短发“过江龙”唱得坚揪得　邓小巧：我认得粒墨！

JW：佢把声好易认洪卓立：佢比赛嘅时候我已经觉得佢把声好好听，听个名就知好好揪！邓小巧：我连佢粒墨都认到喺边呀呢位歌手似乎拥有一把极具个人特色的嗓音，而佢清爽嘅短发亦成为咗佢嘅象征，到底佢系边个？摄影：黄国立 许栢伦剪接：许栢伦

嚟到第三集嘅《我不怕唱歌》今次哩位神秘歌手，当初系因为参加TVB选秀节目“超级巨声”而入行，人仔细细歌喉了得，佢有一双大眼睛，见到佢面上嘅baby fat真系好想“搣”佢块面！哩位歌手入行后，有几样外在条件会令人谂起佢，第一，佢有一个标志性嘅“墨”！放心佢唔系家燕姐。第二，佢系一位乐坛大哥！第三，佢喺台上唱歌可以话系挥洒自如。但你又知唔知原来佢有“舞台恐怖症”呢？

自小爱上音乐，为了追求音乐梦，只身由澳门走到香港参加选秀节目“超级巨声”，击败无数参赛者，最后得到前十名的佳绩，从而入行成为歌手，所以佢真系好揪得！虽然佢系经选秀节目出身，大家会见佢唱歌嘅时候“淡淡定”，其实佢原来一直有“舞台恐怖症”，在台上信心并不如我哋表面所见。佢就系嚟自澳门嘅歌手陈慧敏（慧敏哥）

佢忆述佢幼稚园读书嘅时候已经参加人生第一次嘅歌唱比赛。“细细个已经受爸爸妈妈影响，所以自小就有音乐细胞。我爸爸妈妈系张学友、徐小凤Fans，佢哋支持偶像系要用恐怖嚟形容，佢哋可以洗碗又唱，睇电视都唱，所以慢慢我就爱上音乐。我记得我细个学识嘅第一首歌系一首儿歌叫做《梦中天使》（长腿叔叔主题曲）。当时读紧幼稚园，学校歌唱比赛因为唔够人所以老师叫我去参赛，结果我真系去咗。我当时参加完哩个比赛，并无令我增加自信，反而令我有“舞台恐惧症”，一上到台我会好惊，我怕畀人见到，自从𠮶次比赛次后，我一生打后十几年都无再喺其他人面前唱歌，直至入行头几年都系好腾鸡！所以我觉得自己可以真真正正成为歌手系一件好奇迹嘅事。”

由出道至而家都以短发形象示人，陈慧敏嘅外表好似几年都无变过。

慧敏哥7年前透过比赛入行，但系佢嘅星途绝对系得来不易。因为“超级巨声”完结后佢并未有机会签约唱片公司或tvb，当时眼见身边一齐参赛嘅朋友都陆续成为歌手或于电视台做主持，自己只可以等运到，结果比佢等到，苦等三年后终于得到一纸歌手合约，所以唱歌对于佢嚟讲系非常幸福嘅一件事。不过签约唱片公司后都唔系事事如意。“其实我入行后曾经试过嫲嫲借钱畀我，因为我喺香港真系已经交唔到屋租，我当时已经系日日食２蚊即冲即食嘅米粉，出街连水都唔会买，当时我嘅生活真系好辛苦。又因为可能生活习惯唔好，所以肠胃炎，喺张床痛到行唔到，屋企又无嘢食，又无力，当时香港又无乜朋友，之后我打电话畀经理人公司求救，结果最后都系要自己辛辛苦苦落楼下揾的士再去睇医生。其实我当时真系心谂，一个人嚟到香港，搞到自己咁辛苦为啲咩呢？除此之外，仲有一件事曾经令我好唔开心，就系曾经有一个经理人同我讲过，叫我唔好做，叫我放弃，话我无斗心，无机心，无争胜心，无哩三种根本唔应该做哩行。佢当时系当面同我讲，我听到𠮶一刻，真系几乎崩溃。”慧敏哥说。

慧敏哥于今年推出了两首新歌，第一首系完全无商业元素考虑嘅歌曲《慧敏歌》，她表示：“我而家做歌好简单，我觉得我比到咩嘢出嚟我就做。因为而家嘅音乐市场唔系你话点计算，就可以有咩回报。倒不如我真心做一啲‘作为一个人’应该要做嘅嘢。始终考虑市场嘅人太多，而我又无佢哋咁胜任，大家岗位唔同，我只系偏向无咁选择。”《慧敏歌》系由佢自己创作，MV拍摄仲专登揾嚟昔日歌唱比赛嘅战友吴业坤（坤哥）饰演MV入面嘅男神。“今次MV我需要揾一个男神，而我身边嘅朋友只有佢系差少少可以就去到吴彦祖嘅级别，而且佢除左可以“扮”男神之外，佢又可以演绎傻傻奸奸嘅一面，所以我觉得佢系一个不二之选。”慧敏哥笑言。

而另一首最近派台嘅新歌《城市人》，内容则较为深省，慧敏哥分享一次真实经历：“有一次我喺学校表演，我问啲学生‘你觉得无水饮会死，定无钱会死？’而佢哋异口同声咁答‘无钱！’”眼见不少城市人的价值观已被扭曲，所以希望藉著歌曲让大家记得，凭良心做人。