林敏骢作品展靠笑话撑住　忧好友捧场变出丑：大家为我仲要顶落去

一连两场的林敏骢作品展终于完场，一向鬼马的林敏骢真情流露，向全场观众坦言：“我想讲对唔住”，又哽咽谓好多朋友支持自己，怎料：“本身排好晒舞，而家个个要自己唱，个个嚟捧我，而家嚟出丑。”就连完骚访问都承认：“真系好心痛，大家为我仲要咁撑住顶落去。”

其实要撑住的除了是一众嘉宾，最重要都系阿骢自己，话说在前天舞台意外后，要保持成场骚都有欢乐气氛一啲都唔易，幸好他的有味笑话继续乱咁噏，除了话校长好怪，有虾条就得，又拖住苟芸慧出场唱歌，阿骢叫现场观众：“随便揸....佢只手呀！”令苟姑娘哭笑不得，唱完《忘不了你》后，当住男友陆汉洋面吹水，问：“你系咪脱离处女党呀？”之后苟姑娘松开手拿咪话：“拖住手讲唔到野”，阿骢就话“你用手讲野架咩？”，又话：“我打算开部戏叫《铁金刚大破处女党》，跟住又讲起结婚，接著阿骢话结婚要好认真，要同佢做“详细体检”，就拉左佢落台，苟姑娘完全冇还击之力观众就笑到哈哈声。

有份为今次演唱会投资的黎瑞恩出场时，阿骢问小恩子第一次开制作公司，啲飞好快卖晒，不过个台塌咗，仲会唔会搞落去时，小恩子坦言：“有啲惊”，阿骢又开玩笑：“唔惊嘅，你咁大只”，又再引起现场欢笑。而关淑怡尾场同样在场，唱出了《梵音》和《午夜狂奔》，阿骢问她的情况时，她回应：“I'm OK，有你支持一定好啦！”阿骢随即话，要畀啲正能量关淑怡。她其后又开口：“我好欣赏你架其实，从来都冇讲过。”阿骢又开玩笑话：“表白呀你而家？”之后阿骢讲到有一首歌一定要唱，但又冇讲系边首，结果关淑怡就回应，唔知系咪接着呢首，于是唱出《再会》。

除了和姐姐林敏怡同台演出外，后来登场的实力唱将杜丽莎亦唱出《假如》，更令自己唱到喊，虽然林敏骢只为她填过一首歌，但杜丽莎亦俾面卖大包送多只《Can't take my eyes off you》给现场观众，难怪一见面时阿骢就已经卖口乖话：“你瘦左咁多嘅？”，只不过唱完歌后，杜丽莎离开台的时候，阿骢又润她一句：“乜你行行下又肥返嘅？”认真抵死。

要数到演唱会高潮，自然系林敏骢的“无厘头”演出喇，郑中基同林敏骢咁老友，自然会为对方撑场，因为没有中央的升降台，于是郑中基与张智霖一样，在观众席出现，唱出《最爱的你》，之后开始一唱一和变成栋笃笑。郑中基笑称：“我有咗小朋友多咗运动唔搭Lift”，又话“好彩寻日我唔晌到，唔系一定赖我架啦”，两人又谓想了好多说话，随即林敏骢话：“我地正式宣布，唔搞演唱会喇，林(敏骢)郑(中基)搞talk骚！”郑中基又话：“我出道果时，你就冚左旗喇，你唔写歌我唯有唱自己歌”阿骢神回：“唔系冚旗，系拒载，除晒衫裤凉冷气”，一句精警说话，除了抽的士问题外，仲抽埋近日网传的士司机裸体凉冷气，超劲！最后合唱《深爱著你》时，郑中基唱唱下笑一笑，原来林敏骢挂住向观众微笑挥手冇唱过歌，即刻话：“唔好挂住挥手，唱啦！”