MC张天赋尖沙咀开骚劲墟冚　与甄子丹拍戏多动作︰郁得最劲系肚腩

MC张天赋今晚（27/11）喺尖沙咀文化中心对开嘅空地开骚，先后献唱《花海》、《时候不早》、《Nothing on you》、《Talking to the moon》、《世一》近10首歌，而在唱《救命稻草》时，虽然一度忘词，但获得全场赋二代一齐大合唱。

完骚后，MC接受传媒访问，问到重返当年busking嘅地方，直言勾起不少回忆，亦无谂过会咁墟冚。不过最感动系今晚见到busking 时代已支持自己嘅歌迷，尤其唱《Talking to the moon》时，谂起唔少昔日辛酸史。

问到今日乐迷反应咁好，会否之后再举行免费show，MC拍今日俾咗唔少信心公司，深信不久将来会再有类似活动。“但会要求公司，如果多啲budget的话到时整提词机，（今晚满唔满足？）其实唔系好满足，平时我busking系马拉松之鬼！玩5、6小时，今日好小儿科。”他又希望香港busking 可有更多发展空间。

音乐会上，MC提到奖项并不重要，他在访问时表示“观众肯听我啲歌，识得一齐唱已经好够。”问到有否觉得网友为撑而撑，令他成为牺牲品，MC表示未有太留意网友力撑，只知自己5强止步，但未有太失望。“话晒都系前辈，输俾佢好值得。”

问到今年生日愿望，MC表示“希望瘦啲”，原因是最近与甄子丹合作新戏，有不少动作场面。“郁得最劲系肚腩，所以如果无咗呢part会顺畅好多。（系咪有受伤？）有次跌亲，然后拉亲，好痛。”MC又自夸身手好劲，又直呼好有型，呼吁大家到时要捧场。