白花油王子又出新歌　睇埋个mv真系充满正能量　

“来简约地／爱多80年／态度未曾改变…”相信大家对哩句入晒脑嘅歌词相当熟悉，无错！哩句歌词就系嚟自有“白花油王子”之称嘅“福仔”颜福伟嘅首本名曲。福仔自两年前推出由林敏骢填词嘅歌曲《Don’t Beat The Kids》后，在乐坛鲜有搞作，直到昨日（1日）福仔终于有新歌派台啦！福仔今次新歌叫《Peaceful Mind Peaceful World》继续好音乐“保持”正面形象，用生命影响生命！

“白花油王子”颜福伟日前推出新歌《Peaceful Mind Peaceful World》。新歌内容都系以宣扬做人要有梦想，世界和平，人与人之间要有大爱等等正面嘅信息。“多一些气量 少一些战场／多一些爱会让你让我”至于唱功方面，福仔保持住一贯佢独有嘅陶醉式唱法，至于系唔系人人都buy就不得而知，不过根据佢以往嘅MV，推出不久都会引嚟网友疯传，而且点击亦相当不错。

为同性恋者打气

讲到MV方面，今次福仔疑似去到日本冲绳取景，又出动航拍技术，非常大制作。MV未有好似以往咁，用到一大班dancers伴舞，福仔亦“忍得住”未有大展舞步。MV有阳光与海滩，仲有一啲无关痛痒嘅“散shot”，例如系影下路人，街景，建筑物，十足十好似以前去到ｋ房唱英文歌，但系首歌嘅MV又攞唔到版权咁，真系要讲句：“哩啲咪Style啰！”不过唔知道大家又有无印象，福仔对上一首歌《Don’t Beat The Kids》嘅MV，其实里面大有玄机，当中加入同志情节，似乎就系为同志发声，而今次亦一样，虽然《Peaceful Mind Peaceful World》当中有不少奇怪“散shot”，但当中有一个镜头影住一支彩虹旗（LGBT骄傲旗和同志骄傲旗），并唱出歌词“每一个人每一个梦想／发光发亮”似系为同性恋者打气。