【有片】翟威廉原来劲唱得　孖麦明诗开Live超吸睛：有女先唔闷

一个艺人如果要宣传，最简单而又唔需要成本嘅方法，就系好好运用自己嘅社交平台。“8料港男冠军”翟威廉最近就喺自己FB动作频频，大玩FB live音乐节目，当然“一支公”紧系dry啦，所以就揾嚟一班tvb嘅好朋友一齐jam歌搞搞气氛，更重要嘅系有好多女神，保证网民睇到心心眼。翟威廉：“唔可以净系得班仔，紧系要有女仔先唔闷啦。”

曾经接受《香港01》专访时讲过“好耐冇谂过未来”嘅翟威廉，最近发起网络攻势，喺fb live同一班艺人好朋友jam歌，除左有最近传绯闻嘅刘佩玥及周志文外，亦有周志康及林师杰等“巨声”靓声助阵。不过翟威廉都相当识do，都有照顾到一班男网友嘅感受，请嚟2011年度香港小姐冠军朱晨丽，2013年度香港小姐友谊小姐欧阳巧莹，而前晚（６月１日）更揾嚟2015年度香港小姐冠军麦明诗，你真系咪话唔“吸晴”，不过系葡萄啲啰。

翟威廉：“我一直都有开FB live同大家jam歌架，因为jam歌气氛好呀嘛，我唔叻自己对住镜头讲嘢。我希望可以每星期都开2至3次fb live jam歌，同大家互动一下，加上嚟紧公司就嚟开Big Big Channel，所以都想我哋用多啲fb live。”（有无谂过学郑世豪转战乐坛？）翟威廉谦虚表示：“唔得啦，我正系识玩乐器唱两句，我才能未到专业，我呢啲系低成本音乐节目，只系想同大家玩下，放松下，同职业级仲差好远，我都系做演员同主持好啲。”

翟威廉：我公司有好多人好容易取替我

今次呢个历时差唔多两个钟嘅fb live大家除左可以睇到翟威廉，大细孖（周志康，周志文）及麦明诗嘅音乐才华外，当中都有唔少笑料，当佢哋唱到第6首歌《唯独你是不可取替》时，麦明诗突然爆出一句：“其实无人系唔可以被取替，因为你（翟威廉）都好容易被取替”翟威廉马上脑筋急转弯表示：“由其是我公司，好多人好容易取替我架，TVB啲剧唔揾我做，揾咗第二个人去做。”大细孖即时再加盐加醋：“最近有一个杀到埋身㖞，有一个好似你，但高你三个头𠮶位..”翟威廉即时抵死表示：“唉…本身个𠮶（角色）比我做嘅，但比佢（袁文杰）做咗啦，真系‘唯独我是可取替’呀！”当佢哋四位合唱完《唯独你是不可取替时》嘅时候，做惯主持嘅翟威廉自己为自己打圚场：“我仲有儿童节目所以都唔会被人取替嘅。”

翟威廉接受电话访问时，问到佢“游生”哩个角色系唔系真系被袁文杰抢走，佢笑哂口咁话：“大家120%讲笑，因为有好多人话我同袁文杰似样，所以大家揾我嚟开玩笑。唔止今次，我哋嘅FB live成日讲笑吹水，咁先开心呀嘛，而家谂起都觉得好好好笑。”

唔少人都上过翟威廉的“音乐节目”，个个好“高质”。(下图有惊喜)

公器私用识女仔？

问到翟威廉，哩个音乐节目请嚟咁多位“港姐级嘉宾”，实情系唔系公器私用，帮自己及一班兄弟揾女朋友，翟威廉表示：“你系唔系想讲阿文（周志文）同埋阿moon（刘佩玥）绯闻？紧系唔系啦，我哋成班好都识咗好多年，都系好朋友。做哩啲节目唔可以净系得班仔，紧系要有女仔先唔闷啦。（你觉得明诗唱得好唔好？）佢唱歌当然ok啦，又敢唱，好多歌都好熟。”

麦明诗亦有接受《香港01》访问回应表示：“其实翟威廉音乐根基稳扎，佢除咗唱歌好，又识弹结他，又识弹琴，仲要即时live演奏，所以佢嘅音乐功力系好深厚。（你会唔会再想encore？）其实佢喺个大group到邀请好多人嘅，如果我得闲都会上去玩下，又可以娱乐一下大家，又可以消磨一下时间。”