狂寸阿BOB连掴四巴玩出火？　林敏骢：脑都冇嘅

林敏骢（阿骢）下月将在红馆举行入行35年作品展，近期密密做访问出活动宣传演唱会，昨晚大台播出的访谈节目《兄弟帮》，阿骢与主持人阿Bob（林盛斌）似乎擦出小火花，阿骢还连掴阿Bob四巴，到底发生了什么事？

节目一开波阿骢就已经掴咗阿Bob一巴，呼喝阿Bob叫佢唔好嘈又叫佢“Shut up”，之后阿Bob无论问咩，阿骢都问非所答，比如问佢点样入行填词，阿骢就耍佢话要识写字，写字写得靓啰，又串阿Bob做主持做到口窒窒，冇做好准备功夫，阿Bob口才咁了得当然射返个波畀阿骢自己讲：“由你个口讲出黎先好架嘛！”，点知阿骢一啲面都唔畀：“你个口好臭阿？我以为你冇头发啫，脑都冇嘅。”火药味真系好浓，阿Bob一直畀阿骢禁住单单打打，睇到都觉得佢惨。

最后见惯大场面嘅阿Bob终于顶唔顺问：“你今日冇咩嘢嘛今日？”阿骢就斥责阿Bob迟到成个钟头，就连拍档主持人陈国峰都补多一枪：“未够，五十八分啫。”阿Bob就坚持自己冇迟到系阿骢早到，可能就系因为阿Bob迟到，搞到阿骢嬲嬲哋觉得唔受尊重，所以之后成个节目都系咁放暗箭寸阿Bob，真系句句有骨。阿Bob赞阿骢个节目多人睇《开心主流派》，阿骢就寸佢个《Big Boys Club》冇人睇，好彩阿骢话佢个节目顶死TVB嘅时候，阿Bob终于开口回撃保护返大台，所以真系抵TVB咁锡佢畀咁多节目佢做！

事后问返阿Bob佢就话自己冇事，又澄清冇人迟到早到：“冇嬲，完全冇唔开心，玩之嘛，出面做其他工作佢都系郁手郁脚，我同佢其实都几熟，拍过好多嘢，完成冇任何芥蒂。佢仲揾我做演唱会嘉宾，寻日好多行内行外朋友睇完之后都send message畀我话好好笑，纯粹系节目气氛野嘅啫，都预左佢唔会正正经经坐喺到同你讲野，其实佢系一个好劲嘅人，咁高Level嘅系难控制啲。”