容祖儿演唱会｜认裙脚女四年冇得返屋企好难挨　听呢首歌听到喊

容祖儿一连33场的《ANOTHER SIDE…JOEY•MY SECRET•LIVE》演唱会来到第三晚，是第一日开放予公众售票的头场，祖儿愈唱愈勇，状态奇佳。今次的舞台设计机关连连，其中镜像部分更是美得令观众震撼！虽然祖儿说这晚的观众比较斯文，但其实现场仍充满讲笑声、掌声、欢呼声，甚至求婚声！

早前祖儿讲过好友蔡卓妍（阿Sa）做媒人介绍男仔给她的故事，她提到其中一位求爱男求爱男自称很了解祖儿，睇过晒她所有DVD，之后现场就开始充满求婚声：“我都睇晒啦！”、“嫁畀我！”、“我娶你！”、“ I miss you baby！”难怪祖儿都对观众说，“今日见到大家好开心，我觉得今晚每次唱完歌嘅掌声，系最多最丰富……我完全感受到大家每首歌都听到入咗心，畀到我好多力量！唔单止掌声，仲有疯癫呼叫声、疯狂求婚……哈哈哈！”

祖儿坦言已经4年冇在香港开演唱会，过去4年因疫情等无法回家，对“黐家”的她来说确实很难挨，但亦成长不少，祖儿说：“过去三年我相信每个人都经历咗好多，系全世界全宇宙最难挨嘅时间，我呢个典形裙脚女，冇得返屋企真系好难挨。平时我喺出面做嘢点辛苦、点攰、点多挑战，我见到屋企人，饮到𠮶碗汤，就叉电㗎喇。但系呢三年搬咗出去住，开头都几过瘾、自由，但我发觉要重新学习好多生活智慧呀！”

她指要学识分配工作和家务的时间，已是一大难题，“你啲衫唔折，梳化就冇位坐，你唔去吸尘，只脚就会黑鼆鼆，你唔煲汤畀自己饮，成个人就会好干！”有歌迷即大叫：“我煲畀你饮！”祖儿即笑说：“好唔好味㗎？我唔落盐㗎㖞。”她继续说，自己很想家，想找回家的味道，有朋友上她家，见到冇人睇电视但祖儿都照开住，又或者是她一起身就吸尘等等，她突然惊觉：“原来真系因为我妈咪！佢一路照顾得我咁好，令我可以喺咁舒服嘅环境工作，睇电视𠮶个系佢、每日起身我唔使闹钟，吸尘机就系我闹钟。”

祖儿思乡时一直跟自己说要坚持下去，终于挨过这几年，见回熟悉的面孔，而妈妈都察觉她真的“大个女”！祖儿分享自己最脆弱时，原来可以用自己的歌安慰自己，有日她听住这首歌的Mixing，一边跑步一边流泪，“𠮶种感觉系鼓励自己，咬实牙关，所有事情都会过！呢首歌喺电台攞到好好成绩，但系我从来冇认真介绍过呢首歌对我嚟讲嘅意义，希望今日大家容许我喺《MY SECRET•LIVE》舞台上面唱一首唔系Side Track嘅歌——《东京人寿》。”

此外，祖儿亦从未忘记恩师罗文，在演唱会上不止一次提到他，并重新编排《Just for you》送给老师，她说：“音乐对我嚟讲非常重要，陪伴我度过好多脆弱嘅时间，细细个好钟意王菲、黎明大家都知，好多流行歌曲畀咗养份我，多谢喺我人生中出现过，所有音乐上嘅好伙伴，希望日后我可以继续为大家提供好多好多好歌，陪伴你哋所有最好时光。 ”

此外，祖儿坦言呢几日已被歌迷的点歌讯息炸爆社交媒体Inbox，笑称“唔唱好似大家过唔到人世咁”，去到尾段的抽签点歌部分，祖儿先抽出《小天使》，但由于前两晚已唱过，歌迷要求重抽，祖儿还讲笑说：“你咁会令《小天使》作曲人好伤心㗎㖞！”之后她抽出《零时零分》，以及早前蔡卓妍（阿Sa）点唱过的《去火星恋爱》，另外还有较新的Side Track《不配》，还因为知道很多人想想听而送上的重头戏《心贼难防》给歌迷，完场前还有连串Medley，歌单更跟早前的场数不同！