【演唱会．多图】周柏豪八嚿腹肌冧老婆：佢好伟大，为我做任何嘢

音乐是一样很神奇的东西，可以将完全不认识的人变成好同事、好朋友、好兄弟，就好像周柏豪与陈咏谦这一对，他回忆道：“我同陈咏谦成日合作同倾计，会讲吓大家嘅感情事，大家都知我感情事好低调，但如果大家有用心听我嘅歌，又或者系好多年嘅fans，就会知我用音乐去记录我同佢之间嘅经历。”

一向很低调的柏豪首次提起自己的感情史，“我同佢系未入行𠮶阵识，我同佢一齐成长，佢将最黄金嘅时间奉献畀一个写唔到包单嘅我，我知我好麻烦，系个麻烦友，喺身边揾到完全体谅自己嘅人好难，但我揾到喇！”大家都不禁为柏豪欢呼，柏豪自己亦讲到眼湿湿。

接著他透露还未结婚之前，女朋友与她一起成长生活超过十年时间，更大爆两人相识过程：“我对佢系一见钟情嘅，唔知佢系咪啦，𠮶阵佢问我做咩，我答佢model 啰，佢话唔识你㖞未听过你个名。𠮶阵时我好瘦，瘦到佢叫我做瘦奀骑，瘦同奀我都识写，我问佢奀点解，佢话不大，不大咪即系细，你先细啊！”

回想起很多年前，柏豪有阵子皮肤很差，他形容那时候整张脸都是烂掉的状态，当时他足足有三个月没有工作，几乎是零收入，他说：“𠮶阵时我冇钱，佢甚至要经济援助我，我冇钱买唔到嘢畀佢，唯有送《我的宣言》、《天光》呢两只歌畀佢。”

“好多时候我半夜有情绪问题，我会半夜叫醒佢，听我讲听我唱歌，好开心大家谂嘢好相近，价值观好相似，有时候大家会同一时间send同一个message，睇埋同一张相。11月我喺外地结婚，有个歌手同我讲出面有狗仔队，我好惊，唔知点算，个婚礼筹备咗好耐，本身我想好低调处理，佢问我个婚礼使唔使hold住，佢好伟大，可以为我做任何嘢。”听到不止歌迷眼湿湿，就连柏豪自己也眼红红，最后他唱出爱的主题曲《终于我们》。

《无力挽回》这首歌给予柏豪很多力量，每一次都是伤心的经历，他回忆道：“喺我出道时姑妈已经好老，佢知我呢个歌星仔喺马䯃山出骚唱歌，特登拎住拐仗笃吓笃吓嚟睇我，佢成日都嚟睇我唱歌，但佢成九十几岁行动又唔方便，我同妈咪讲等一阵下次同佢食餐饭啦，真系唔可以讲等一阵，因为唔知会等到几时，佢呢扎花虽然送唔到我手里面，但呢扎花喺我心里面，永远都唔会凋谢！”

最后柏豪养精蓄锐这么多个月，当然要大晒肌肉啦，唱到《异能》时柏豪突然撕烂衣服，露出八旧腹肌，又使出招牌“后空翻”，全场尖叫声不断，柏豪深情跟大家许下约定：“下个十年，约定你哋！”