林家谦8月红馆个唱下周二订飞　34度着毛衣影8个钟相：我都几热得

千呼万唤，林家谦终于今年夏天决定开个人演唱会！第一次个人开骚，一系唔开，一开就红馆，认真劲爆！昨晚（27/6）林家谦于个人 IG 率先公布重磅炸弹，开第一个人个人Show！《SUMMER BLUES 》8月24至26日，地点写红隧傍，十分搞鬼，7月5日号优先订票，7月14日公开发售。

开三场！咁少？所以昨晚林家谦一出Post，歌迷已经跪求加场啦！大部份都喊住话终于等到啦，好感动，好激动，OMG，救命一开开红馆，一定要睇晒咁多场，亦有海外歌迷留言大叫跪求有Online骚睇。

而一班圈中友好，林一峰，陈凯咏、 陈蕾、黄淑曼、黄伟文、少爷占、何雁诗、林欣彤、Robynn Yip、林奕匡、蓝奕邦等等纷纷留言恭贺，好友Tyson Yoshi留言：“好热哩”；Serrini则留言道：“一演唱会十张海报你Set到个Standard好高。”有人就叫 Serrini，下次大佢，一影影20张！十分搞笑。

早前林家谦为演唱会拍摄海报，当日34度高温下，大队于一个枭无人烟的海边，流著汗喂著蚊湿住身穿梭大海及树丛之间，用了近8小时拍摄。热到人都癫，林家谦仲要配合造型，穿上不同的外套，毛衣配搭，望见都戥佢痛苦。不过神奇地，林家谦全日似足外星人一样，唔多觉流汗，他笑道，“系㖞，还好㖞，唔知点解，我都几热得嘅㖞。哈哈。”

在拍摄期间，偶有玩水上活动的朋友经过，一发现是林家谦，即大叫：“哗！林家谦呀！”便要等家谦上岸回来影合照，就连帮忙拍摄的船家都忍不住问：“林家谦呀，林家谦你系咪开演唱会呀？我要买飞呀，帮我买飞呀......我个女劲钟意你。”十分搞笑。家谦当时因为消息要保密，所以唯有笑著乱答船家，“ 哎也......佢知我哋影演唱会海报呀，佢R飞呀，咁点呀？ 哈哈，唔知呀......出年啦......多谢你。”

影了近千张照片，林家谦问，“哎呀咁多点拣，唔舍得唔用，可唔可以用晒？”最后一向破格的他，拣了十张照片出来做海报，他昨晚已于IG上公布其中两张，并说余下有8张，今日（27/6） 凌晨5点开始于全港不同巴士站会见到，叫歌迷得闲就拍低上载至Instagram限时动态，再集合一个 Highlight ，储齐10 张转换成连续短片（Reel）标记他 ，便有机会得到他十张海报的限定道具。而林家谦自己今早就于IG限时动态率先分享自己第三张海报，写上：“阿叔训唔著出去食早餐见到，其余靠（Repost）你哋啦。”谦迷们快啲去影啦！影完记得 TAG“@terencelam0903”。