专访｜郑融预告演唱会唱《断片》找数：佢哋讲到好似系主打歌咁
出道19年的郑融（Stephanie），过去只在2013年举行过《郑融 Live Like 18 Concert》，事隔9年，她终于一如歌迷所愿，在7月16日于麦花臣场馆举行《TRUTH AND DARE 郑融演唱会 2022》。她直言今次开个唱是兴奋多于紧张，希望为乐迷带来一点刺激：“对大家嚟讲有少少肾上腺素嘅元素会好啲，难得大家可以出街，可以睇返show。”而在疫情期间大家都不能随意出国，Stephanie认为这段时间正好令自己面对一直以来存在的问题：“我觉得呢段时间对香港人嚟讲系一个挑战，冇得离开、冇得玩，好多嘢都做唔到，冇得逃避。大家都要挑战面对自己，今次就会将呢个状况套用返喺个show入面。”
受疫情影响，Stephanie近两年只推出一首作品《多喝水》，或许在疫情下有了提醒乐迷“见字饮水”，以健康身体应对世界上接踵而来的不同难关，作品不但深得乐迷赞赏，更在电台颁奖礼上取得好成绩。受到疫情冲击，面对乐坛出现的各种新常态，Stephanie依然坚信“Go with the flow”，冷静应对各项突如其来的挑战。
撰文：刘传谦
摄影：叶志明
认疫情影响工作：公司连出歌都会有担忧
不论面前迎来甚么难关，Stephanie第一时间会提醒自己要保持冷静：“呢一点好紧要，如果你好心急咁做任何决定，呢啲决定都未必系最好。当你冷静落嚟，自己嘅心态变得稳定，好多嘢都会迎刃而解，揾到解决方法。”她认为专注当下，做好自己，才能在疫情中好好调整自己：“可能喺工作上，公司连出歌都会有担忧，担心出咗歌之后可以点做，未必可以开show，未必有公开活动可以宣传。当然会有少少气馁，但系我同自己讲，无论手头上有咩困难，都要有一个好嘅心态，用呢个心态做到最好。”她一直以正向心态面对工作，直至年初收到主办方邀请开演唱会，她认为现在总算撑过了人生其中一个低潮，更相信专注做好自己的重要性。
为乐迷大唱Side-B歌曲
在商量演唱会歌单时，Stephanie坦言自己与制作团队有著幸福的烦恼，相比思考如何包装演唱会，他们所烦恼的却是如何在每一个段落中作出取舍：“自己觉得有好多歌都需要喺呢个show度唱，乐迷一定会有期待。透过‘Truth And Dare’呢个主题，我哋谂到好多好有趣嘅主意，好想试，而嘉宾呢部份都系可以有新鲜感同火花嘅地方，但系依家好似太精彩，所以我哋都好似讲笑咁话唔知应该删减边啲部份。”今次个唱只开一场，Stephanie当然觉得未够喉，她也希望延续今次演唱会的主题开Part 2：“依家啲歌系多到要谂点样取舍，其实系多到，如果有一个Part 2，里面可以有嘢系唔同嘅添。将我哋谂到嘅所有嘢都放喺𠮶个show度，可能大家睇完Part 1再睇Part 2，然后Part 2系有唔同嘅嘢睇添。咁当然最好，因为开show真系好好玩，希望观众可以一齐感受。”
怀疑《断片》冇派台系错误决定
为了满足忠实歌迷，今次Stephanie也特意挑选了一些Side-B作品送给他们：“如果我系乐迷嘅话，我都会有呢一部份嘅期待。喺以前嘅大碟年代，有啲歌佢哋有听过，但系未必系派台歌，就会少啲机会喺现场听到。我成日都见到有啲歌系有网民留言话好想听到，真系要满足下佢哋，今次系一个好好嘅机会，系一定要做，呢件事已经摆咗好耐。”众多作品中，她最记得一首没有派台，但深受乐迷欢迎的《断片》：“《断片》有段时间系成日都有人讲，讲到好似系主打歌咁，心谂𠮶时冇派呢首歌系咪做咗一个错嘅决定呢？（笑）佢哋嗌到𠮶首歌好似主打歌咁。”
从教育系作品自愈
藉著自己与黄伟文（Wyman）合作的“健康教育四部曲”，自己也被乐迷封为“教育系歌手”，Stephanie坦言过去也曾经从自己作品中得到力量：“上年好窝心、感动，有乐迷喺《多喝水》之后就话我系‘教育系歌手’，我自己谂谂一层，呢啲歌都系教育紧我自己，喺不同嘅状况中应该点面对，或者遇到某啲状况，喺自己嘅歌都描述咗出嚟，除咗同听众共鸣，亦都系同自己有共鸣。人生都会经过好多唔同嘅成长阶段，包括自己。”她坦言过去唱慢歌都以惨情歌为主，直至《13楼的大笨象》和《多喝水》的出现，令自己犹如面临一个分岔位：“之前遇到一啲伤痛嘅经历，好似《借》、《还》、《红绿灯》所记录嘅唔开心，慢慢经历咗其他嘢，好似一粒药，令我够强壮面对一啲唔开心嘅经历，开始有力量走出嚟，有力量改变、面对。”
忆Sammi唱《红绿灯》爆喊 既惊讶又感动
现时乐迷谈起郑融，第一时间都会想起2006年的经典作《红绿灯》，最近透过周笔畅和李克勤的合唱，令歌曲传到新一代的乐迷耳中，但这首歌的意义绝非只在於单单冲出香港。记得3年前Stephanie担任郑秀文《#FOLLOWMi 郑秀文世界巡回演唱会》嘉宾，当时Sammi之所以选唱《红绿灯》，是因为这首歌陪她渡过面对抑郁症期间最低潮的时期，唱著这首歌时更感触落泪。Stephanie回想起这一幕，除了惊讶，也觉得十分感动：“呢一段咁具体分享系震撼嘅，当然佢讲完之后喺我隔离喊仲震撼。（笑）但系我都有少少想喊嘅，呢件事太活生生，系一个太有血有肉嘅交流。作为一个歌手，最大嘅成就感莫过于用自己嘅歌，喺人哋嘅生活入面做到一个陪伴，有力量同温度地扶持一下当事人。呢个系做歌手最大嘅意义，我𠮶刻觉得好感动，好似做咗一啲有意义嘅事。”
预告下半年两首新歌
除了演唱会，郑融在下半年也将推出音乐作品，当中Wyman一幅《为民除害》的剧透相，有不少网民猜测是郑融的新歌。她在访问中也承认二人再与Dear Jane结他手Howie（翁厚梁）合作，以铁三角姿态再出新歌：“呢一个三角组合，我真心好感激乐迷呢几年嘅支持，当中可能有我嘅歌迷，亦有Wyman嘅支持者，甚至Howie都有，但系咁支持我哋嘅真系要好多谢佢哋，由《13楼的大笨象》、《多喝水》到今天，佢哋仍然有𠮶份期待，我好感激佢哋。”除此之外，Stephanie也透露即将与期待已久的作曲人徐继宗合作，是一首为她度身订造的芭乐情歌。