专访｜郑欣宜忆初登红馆因脚伤留遗憾：临开骚先由行路开始学返起
“今次无论系喺我嘅体能上，抑或系我喺研究表演艺术呢方面，我都觉得自己系成熟咗好多，状态都比之前好好多，所以好期待好期待自己可以发挥得最好。”
郑欣宜（Joyce）即将在6月10-12日举行第二个红馆演唱会《Between Us 郑欣宜演唱会2022》，为求达到最佳状态，早前在《Chill Club推介榜 年度推介21/22》赢得歌后宝座的她决定不庆功，只想在演出前夕达到/最佳状态，真正享受舞台：“我唔想好似前功尽废咁，今次真系好努力，唔想因为身体或者有任何嘢阻我发挥。今次好努力咁锻炼身体、减磅，希望可以做得最好。所以唔使庆祝啦。”
Joyce上一次踏足这个音乐殿堂是2018年4月的《Break A Leg 郑欣宜演唱会》，她在开骚前夕跌断脚，需要动手术、打石膏，大大影响当时的筹备工作：“临开骚前𠮶一个月到先由行路开始学返起，所以𠮶阵嘅状态点会好呢？点可能喺一个最好嘅状态做一个两个半至三个钟嘅骚？”
撰文：刘传谦
摄影：陈顺祯
郑欣宜化妆：San Chan
郑欣宜发型：Milk Chan@Xenter
郑欣宜造型：Derek Ho
郑欣宜服装：Loewe, Joyce HK, Jimmy Choo
场地：海洋公园万豪酒店
弥补4年前首开红馆遗憾
5年前突如其来的脚伤，几乎令Joyce第一次进军红馆的美梦破灭：“好记得喺临做手术之前𠮶一日，全间旧公司嘅同事围住我瞓喺医院嘅𠮶张床度，仲问‘开唔开show好呢？’𠮶阵我即刻话‘梗系开！我冇事嘅，放心啦！’但其实我系惊到爆炸。”脚伤需要时间休养，完全康复后才能排练，加上进入寰亚前那段“年度歌手”的时间（指一年只出一首单曲），因此当时在歌单上需要加入不少翻唱歌，在舞台演绎上也未有重大突破：“𠮶次最刺激紧张嘅，已经系最基本嘅一样嘢：我郁唔郁到。”
歌单以自己作品为主
其中一个希望在4年前个唱做得更好的地方，Joyce说起一开始约17分钟的快歌medley，她直言这个部份做得不好：“回望返，我觉得有少少为咗将一件事好似好唱时间咁而令佢好长时间。其实𠮶一部份嘅17分钟入面，我净系唱咗一首自己歌《你瘦够了吗？》啫嘛，其他时间都系选择一啲香港嘅经典快歌。我会觉得呢个系冇咁似属于我演唱会嘅嘢。”因为准备时间不足，Joyce也没有练习特别技能在台上表演，不过今次则预告会为乐迷带来惊喜。
Chill Club颁奖礼炸爆舞台为个唱预热
从三面台到四面台，Joyce虽然先后在担任许廷铿、张敬轩演唱会等嘉宾时体验过红馆四面台，最近在Chill Club颁奖礼上跳唱也是四面台，但她依旧感到非常担忧：“我系零方向感，我都会同自己讲，自己上过四面台嘅经验都好少有跳唱部份，大多数时间都系乖乖女咁企喺中间度唱，或者兜一个圈唱一首慢歌，咁冇乜难度啦，认得个panel咪得。但系我成日觉得加埋跳唱系会难啲嘅，好彩我哋之前喺Chill Club颁奖礼已经有一个热身嘅，细型少少嘅四面台，有唱有跳，都可以应付到，但𠮶个只系一首歌。”她坦言回到红馆，即使之有热身机会，仍会有一定跳唱上的难度，于是决定把居所化身排舞室：“之前准备Chill Club颁奖礼𠮶表演嘅时候都有用，当我自己练嘅时候，我会将间屋嘅不同物件当做panel，如果每次位置唔同，我嘅舞步都系正确嘅话，咁就应该冇事嘅。”
“Between Us”的两种解释
今次重返红馆，演唱会以“Between Us”命名，Joyce在访问中也以不同角度拆解个唱主题。其中一个说法可从音乐风格谈起：“我发觉尤其呢几年，的确系多咗好多跳舞歌。我一系喺快歌入面展示到霸气，懒系女王咁嘅感觉；一系就走另一个极端，可能系一啲抒情慢歌。我好想大胆啲探索呢两个极端之中，中间嘅𠮶一个自己，亦系我喺呢两个极端里面嘅‘Between Us’。”当然，Joyce也清楚要成为一个全能歌手，最好当然是充分掌握两个极端的自己，向乐迷展示不同面向。
学习用音乐讲八卦
当然最直接的解读，就是Joyce本人与观众之间的连系。Joyce希望透过音乐向观众分享自己的想法、秘密，从2008年参演无线电视剧《毕打自己人》开始，入行已有14年的Joyce离不开外界对自己私事的讨论。她坦言过去一直不愿在工作以外的事情上分享更多：“只要一提及其他方面嘅话题，我嘅回应通常系‘我冇回应，多谢关心’，但系我发现自己个心入面一直有一个雪球不停滚大，已经愈滚愈大。我成日都讲，作为一个歌手、舞台上嘅表演者，曲不离口、舞不离手，因为绝不松懈，我要继续努力去进步，学多啲嘢，更上一层楼。呢个只系事业上，但系作为一个人，我都希望唔好原地踏步，可以继续成长，所以我觉得系要处理呢个雪球。但系某啲话题，唔好话公开地对住大家、对住cam讲，有时对住朋友，甚至自己，都好难分享、承认，会觉得好尴尬，好难为情，好肉酸。依家揾到一个缺口，就系透过音乐，唔知点解某啲话题用歌包装咗之后就可以讲出嚟，同大家分享到，咁有咩好得过可以用音乐同大家分享自己故事、秘密？”
“歌手”与“艺人”
“其实我自己一路都好耿耿于怀，就系‘歌手郑欣宜’，唔知点解大家写我都系‘艺人郑欣宜’。”今年赢得叱咤歌后一刻，Joyce道出入行14年来的心底话，对于“歌手”、“艺人”两个称呼的执著，她坦言：“我记得一开始拍剧𠮶两、三年，每一日放工，我就会对住电脑睇其他歌手嘅现场表演。我会紧张到踎喺张凳上面，好似准备捐入个mon度。我好记得有一次我指住个mon，同我朋友讲‘Why am I not doing that?’（点解我唔系做紧呢一样嘢？）我谂系𠮶段时间开始想被称为‘歌手’，好想被认同系一位歌手，有一种感觉系好想证明畀自己睇，我可以凭自己嘅努力做自己钟意做嘅嘢。”
成功背后，幕后团队的付出也不能忽视，Joyce认为努力锻炼自己实力，才是外界开始称自己为“歌手”的关键：“我觉得每个成功嘅艺人都系天时地利人和，而‘人和’一定喺度，但系我从来都唔想靠任何人创造属于自己嘅一片天，到最后一定要靠自己嘅努力同实力做所有嘢，所以我会好介意大家会觉得我系艺人定歌手，如果想大家叫我做‘歌手’，就代表我嘅唱功、表演一定要非常好。系好感动嘅，《叱咤》之后见到好多贴文、报道真系开始写我系‘香港女歌手’，我觉得呢个系最大嘅认同。”
曾大胆用事业作赌注
不论是2005年的“死亡之吻”事件，还是出道初期针对身材、样貌的抨击，甚至自组公司期间的“年度歌手”阶段，Joyce的演艺事业绝非一帆风顺，也曾经想过退出娱乐圈：“我喺18年嘅时候同自己玩咗个好愚蠢嘅游戏。”她坦言自己在2017-19年状态极差，恰巧2018年凭电影《29+1》获得金像奖最佳女配角提名，临近颁奖一刻，她突然对上天下一个足以影响事业的赌注：“天呀，不如我哋玩个游戏吖，如果我得到呢个奖，我就劈炮唔捞，离开香港；如果我得唔到呢个奖，咁就表示你想我继续喺呢个娱乐圈，即系话我仲有嘢未做完，咁我就留低，全力all in继续试。”当年最届女配角的对手包括叶德娴、邵音音、宝珮如和内地演员吴彦姝，位位都是实力派演员，Joyce笑言明知得奖机会不大才敢下赌注。
因家人萌生退意
针对自己的批评和攻击，虽然Joyce选择避开回应工作以外的话题，让时间证明一切，但她坦言等待过程并不容易。除了漫长的等待和付出，令Joyce萌生退意的还有远在加拿大的家人：“我屋企人嘅年纪愈来愈大，而佢哋全部都喺加拿大。其实最初我决定留喺香港，佢哋系反对嘅，因为𠮶阵我年纪细，佢哋好想我返加拿大。即使最后佢哋依家支持我，但系我一直以来都有个疑问：究竟选择留喺香港追所谓嘅歌手梦系咪叫曳呢？但系今年都35岁啦，都做咗大人好多年，我谂系乖挂。我绝对系唔听话嘅人，但我绝对系一个乖嘅人。”
避公开谈私事：好尴尬
谈起Joyce，外界少不免会提及妈妈沈殿霞（肥姐），今年在乐坛大丰收，网民都会说著“肥姐在天之灵会感到高兴”，关于一些正面评价，Joyce也会感到舒服：“呢一句系会令我非常开心，好惊喜，我谂作为儿女，大家都会想父母可以安心，可以为我哋骄傲。”不过媒体最近则经常谈起她年届35岁，可以动用肥姐的6000万遗产，她也拒绝回应。Joyce坦言：“有好多嘢好难喺一个大概45分钟嘅访问可以讲得晒，毕竟我用咗十几年避开某一啲话题，呢啲话题都唔值得讲，（It’s not tastable to talk about certain things），会觉得讲到呢啲话题好尴尬。不过无论发生咩事都好，都唔会影响到我对唱歌同喺舞台表演嘅热情，所以我唔想喺𠮶啲位度畀力量。”
自觉唔算最勤力
颁奖礼上屡获佳绩，目前离赢得女歌手大满贯只差一步，Joyce在年初收到不少乐迷打气、祝贺，赞她过去一年很勤力。不过Joyce并不认同：“我唔觉得我系比别人更努力，其实当疫情系咁嘅时候，我哋全行唯一可以做嘅就系努力啦，系咪先？我反而觉得系观众近呢十几年，因为我嘅事业有好多高高低低，佢哋不离不弃，就算唔系我fans都会选择用佢哋嘅时间同心机望返我，听返我。系你哋将你哋嘅注意力畀咗我，我先有机会让大家重新认识我嘅音乐，对我有一个支持嘅心，开始钟意我嘅音乐，开始钟意我份人，今次有机会喺呢个演唱会答谢大家。我呢啲死中女最钟意听八卦，今次就透过音乐同你哋讲八卦，哈哈。”