黄妍接连与Pandora丽英合唱 自认一讲音乐要求多：我好烦㗎
黄妍（Cath）近日先后邀得乐队Pandora及丽英合作玩Crossover，各选对方一首作品再合唱，推出后大受乐迷欢迎。
继《天光前》再与Pandora合作
Cath去年在疫情期间，也曾邀请Pandora一起隔空crossover《天光前》，当时已留下好印象：“𠮶时觉得个Vibe好好，但只系隔空玩。”相隔一年，促成再次合作，原来与Cath的填词人好友王乐仪有点关系，Cath说：“原来Pandora之前听过我首《天光前》而认识王乐仪，之后就揾王乐仪帮佢哋写咗《风月》，咁啱我早前喺电台听到《风月》时都觉得好好听，所以倾Crossover时，就决定唱《风月》。既然唱开，就觉得不如玩多首，所以玩埋《Little People》。”
别以为他们好像只要合唱对方的歌，看似简单，其实也有花心机，Cath说：“我唱《Little People》多数都系琴嘅版本，结他版本只有Live嘅时候先有，我都想知同Band一齐玩会点，所以同Pandora嘅Tony试咗一个新版。其实首歌都几难弹，Tony特登执咗个男女合唱嘅版本，我好似无试过男女合唱呢首歌，我觉得呢个版本都好听！”
虽然只是个“玩玩吓”的Crossover，但他们制作认真，也特地拍了在录音室演唱的Footage，分别放在各自的社交平台，与乐迷分享。讲起这个Footage，Cath爆有不少笑料：“其实拍𠮶日，我先第一次见到Pandora，起初大家有啲小尴尬，后尾拍拍吓大家熟络咗，我同Tony好专注唱同偷望歌词，其实无乜点理个Cam，反而系鼓手Mike，佢趁打鼓空档，疯狂派心，好好笑！我哋隔住玻璃睇到笑到癫咗！”
与丽英录影一Take过：Yeah到旁若无人
除了Pandora之外，Cath亦有与丽英一齐玩Crossover，她们把Cath的《轻盈》及丽英的《东京一转》“混”在一起，想不到有意外收获。Cath透露：“当初与丽英当时倾合作时，原本提议用《Little People》去夹嘅，但研究过之后，觉得《轻盈》好似更适合，成个Feel、气氛，甚至主题都夹嘅，所以我用咗佢嚟同《东京一转》嚟做Medley。”
看上去总是easy going的Cath，一讲到音乐，便半点也不让步，好像今次的Crossover也是一样，她自认是个烦人：“我好烦㗎，如果要砌medley的话，都要砌到佢好似一首完整嘅歌先会过到自己𠮶关。丽英亦好好，因为有时惊自己改咗，原著歌手可能未必喜欢，好彩砌砌下又觉得几得意，即系‘轻盈地去到东京一转’嘅感觉咁啰！”幸好她的坚持并无白费，因为丽英十分欣赏：“要多谢Cath真系好用心咁将《轻盈》同《东京一转》再rearrange成一首好好听嘅歌。”其实两人早在ViuTV节目《歌手‧门》合作过，到今次的合唱，两人均表示期待，丽英更明言希望将来再有机会合唱。
虽然做这种Crossover要花的工夫很多，但Cath十分享受：“几好玩，几喜欢呢类嘅medley，如果喺啲Live度要做啲Medley，我都会用心去砌，好似之前有啲音乐会咁，我都有咁做，好彩最后出嚟嘅效果大家都钟意，我觉得好似去学习一首新嘅歌咁，如果将两首或更多嘅歌拼埋一齐，去变成一首新嘅歌咁，呢个就系音乐好玩嘅地方，好钟意！”
讲到拍Footage当日，Cath笑言同丽英其实都心情紧张：“我哋一路唱一路担心有无边度做得唔好，去到某一幕我哋可以一Take拍完，开心到一齐‘Yeah’，真系Yeah到旁若无人咁，最后同事将我哋𠮶一刻剪咗落条片度，成为咗𠮶条片嘅彩蛋，我觉得都几好笑！”今次Cath X 丽英的Crossover，在网上获得很多正面回响，有不少网民都留言赞好听，甚至吸引到对方的粉丝！其中有网民说：“两个都唱得好好听啊”、“因为丽英所以入咗嚟，真系好好好钟意《东京一转》，今次加埋《轻盈》转咗个曲风都好正！两个都好好听，已订阅”、“黄妍把声好似播紧CD，再加丽英可爱嘅声”等，令Cath感到很欣慰。