张敬轩演唱会｜陈蕾贴心送安全咪套　许靖韵率观众高呼“除衫”

张敬轩《THE NEXT 20》演唱会来到倒数第3晚，这夜他先请来同乡陈蕾一起载歌载舞，两人合唱《诗邮寄》。轩仔介绍陈蕾出场时，也谈起二人都同样来自广州：“佢同我来自同一个城市。亦系唱作人，每一次喺工作场合见面，都觉得佢好冷艳，好cool，好有距离感，点解呢个新人成日口黑面黑......哈哈。”

陈蕾合唱后即说：“我有好多感受想话你知，我中学喺广州睇过你好多演出，当时你刚出道，广州出个歌手叫张敬轩，我哋周围介绍畀身边同学知，大家觉得好骄傲好光荣。今日好开心有机会，你邀请我来做嘉宾。多谢你。”听到轩仔说自己很有距离感，她续指：“我唔系有距离感㗎，为咗证明我其实好贴地，又随和，我准备咗一份礼物畀你，我系安排得比较后面嘅嘉宾啦， 送礼畀你好大压力。我谂过想从早餐呢方面出发，送咸菜配白粥都几好食。”轩仔忍不住插话：“ 难道我还未够咸？可以再咸少少？”引得观众哈哈大笑。陈蕾解释：“但系我啲同事话，早餐呀、食物呀咁好多人送啦，我最近学针织，不如就亲手织啲嘢送畀你啦。我其实唔系好熟你个Size，不过我估有一个Size我可能比较清楚......我已经袋住系身......我织咗个咁嘅嘢......”随即由口袋中抽了一条“条”状物体出来，轩仔及观众一见，已经笑到反肚：“喂，你呢个咩来先？咁形状？哈哈哈。离远望佢，我估都差唔多size，哈哈哈。中间仲有个心形，可以笠系边呢请问？你知“冷”嘢都刮，哈哈哈。”一连串妙语连珠爆发，观众全部笑到碌地兼拍烂手掌，狂笑狂起哄，陈蕾随即解画：“其实系笠系个咪到。”

当观众笑声已经震烈红馆时，她继续爆下去，拿著“套”问轩仔，“你要唔要我帮你笠？”接著就亲手帮轩仔戴套，笑言：“哎吖真系啱啱好！”轩仔即说：“我其实有啲怕，你知啦唔系人人用Samsung电话，我惊有人离远影，影出来有色差，见我揸住条肉色嘢影相就唔好，大家记得呢件嘢系粉红色㗎！哈哈！好爆呀你呢份礼物！”礼物爆，送礼同收礼的两人，一样愈玩愈爆 ，陈蕾忽然指著咪套，时而说著有猫毛黏在套上，转个头又说起咪套尺寸稍短，而轩仔也不甘示弱地笑言：“低估好过高估呀！呢啲叫做 expectation management！多谢你先，好温暖，呢份系人生收过最有心思礼物！在坐女士学嘢啦，如果你要送礼畀你钟意你嘅另一半，个另一半又钟意唱歌......”连番笑弹过后，陈蕾感性地说起自己与轩仔都选择来到香港作为音乐基地，感受到歌迷一直以来的支持：“今日能够企喺呢个舞台同我嘅同乡相遇，一齐合唱，我只能够用十只字总结：《相信一切是最好的安排》。”

安歌部份，昨晚轩仔再请来了小师妹许靖韵（Angela），二人一起合唱《别为我好》。Angela出道之初有个花名叫“小背心”，所以昨晚她亦带了一件小背心上台送给师兄，并与全场观众一起欢呼大叫轩仔即场换上给大家看看：“因为你之前送过件三点式畀我，提醒我做人做事要记得三点，同事又话你操得好fit，但冇乜点露 ，所以我谂住送件小背心畀你。”全场观众更帮Angela一起大叫：“除衫！除衫！除衫！”轩仔笑说：“你唔系谂住叫我即刻著呀嘛？你哋未见过麻甩佬著背心咩？”接著作状除衫，搞到全场非常兴奋，但到最后还是走数，笑称：“哗，要睇我即场换衫，张飞就要一千六百八啦！哈哈......应承你，下次见你著畀你睇！”