专访｜陈凯咏与P1X3L谈恋爱经　抗拒男方追求太进取：会好尴尬

上年加入乐坛的男团P1X3L最近推出今年第一首单曲《This Is How We Roll》，以轻松一面演绎年轻人追求心仪对象时展示初生之犊不畏虎的精神。至于师姐陈凯咏（Jace）除了在歌曲与P1X3L首度合作外，也有另一首新歌《Long D》面世，以放松的旋律道出远距离恋爱（Long D）也可以依旧甜蜜。四人来到火锅店，当然要边吃边喝，藉著新歌来谈各自的爱情经历。
撰文：刘传谦
摄影：叶志明
剪接：林通贤
场地：街头火锅

P1X3L与Jace合作愿望提早实现

虽则今次P1X3L与Jace合作只是公司安排，但George坦言本来已经有与师姐合作的想法：“呢样嘢系我哋三个有共识嘅，倾过之后第一次出合唱歌想同师姐合作，但系冇谂过系今年咁快，我觉得系惊喜嘅。”Phoebus（吴启洋）坦言作为新人，自己未敢提出与其他歌手合作的想法，但事前也期待与Jace合作：“呢首歌同上两首歌一样，都系比较chill，而师姐出过《天生二品》等等嘅歌，都系偏chill嘅。我哋就谂，如果加埋佢入嚟，成首歌一定会更加正。”

Jace唔觉今年初勤力：多咗时间畀自己沉淀

至于Jace除了为P1X3L新歌献声，更推出个人单曲，短时间内已经在两首新作上听到她的声音，但她坦言过往的工作量及压力较今年初大：“始终年头因为疫情关系，其实行程上系松动啲嘅，多咗时间畀自己沉淀、休息，压力都舒缓咗。最忙、最大压力可能系上年嘅后半年，同时要筹备碟、演唱会，工作量比较多之下真系好容易会有好大压力，觉得自己未准备好去开骚。但系既然啲骚都过咗，今年嘅状态暂时都好轻松。”

George为女朋友挨面包

P1X3L新歌谈追求恋爱的心态，而Phoebus和George都有恋爱经验。问到二人追女生的经验，George先笑说：“其实我对个个女仔都好用心。”原来他试过在中学时为买礼物给女伴，不惜用千方百计储下在兼职工作赚到的钱：“佢系打篮球嘅，我见佢对篮球鞋著咗几年，烂晒咁滞，但系都唔舍得换，于是我用𠮶一个月嘅粮买咗对鞋送畀佢，而𠮶一个月我只系食面包。”

Phoebus想学时间管理

此时Jace问起Phoebus有否为女伴挨过面包，他笑言：“挨面包可能只系为自己啦。”他坦言过去在感情路上一直跌跌碰碰，最大原因是时间管理不当，所指的当然并非一次过追求不同女生，而是没有腾出足够时间与女友相处：“我读大学嘅时候好钟意打手球，𠮶阵又好钟意跳舞，同时间又要读书，基本上已经用咗我好多时间。所以啲时间冇乜放喺女仔身上，唔够留意佢哋嘅心思。”

Marco自揭表白被拒悲惨经历

3位P1X3L成员中，唯独Marco（叶振弘）没有谈过恋爱，但并不代表他未曾向心仪女生表达爱意。他坦言过去大多数时间都是暗恋，期间也试过送礼物给心仪女生：“我知道𠮶个女仔钟意是牛奶糖，于是我偷偷地将糖放入佢柜桶。佢唔知送糖嘅系我嚟，只系觉得好好食。𠮶阵我已经好开心。”不过当决定主动出击后，却令他留下阴影：“呢个系一个好凄惨嘅经历，凄惨到我已经唔想再提起。我试过当面同个女仔表白，但系转个头佢将我份礼物送咗畀个老师，而呢位老师最后将呢份礼物派咗畀全班食。即系佢有问我食唔食嘅，但系我话唔食，然后佢就摆咗喺课室，畀全班食。（George：咁全班咪笑你？）有一部份人知咩事，有一部份人唔知。（有阴影？）会谂起自己呢段经历，觉得自己真系唔知点追女仔。”

Jace：做咗朋友先会容易啲谂之后𠮶步

眼见Marco露出一个讨教的样子，身为师姐的Jace也分享自己收到男生追求时的感受。在Jace的角度，似乎男生过于主动会带来反效果，她直言：“我唔钟意佢哋太chur、太刻意，会好尴尬。我觉得做咗朋友，啱倾咗先讲，咁似乎会容易啲。可能我过往嘅经历都系同佢哋做咗朋友先，会容易啲谂之后𠮶步，如果系太突然嘅我会好惊，会避开。（通常要相处几耐？）呢啲因人而异啦。（笑）”她解释当意识到对方明显地有追求自己的意欲，通常都会刻意保持距离，而先从朋友做起也不代表要friend zone对方。

Jace未因新歌而对Long D改观

说回Jace的新歌，虽则歌曲道出恋人相隔异地都能依旧甜蜜，但Jace原来是不能接受Long D：“至少对我嚟讲，我觉得系唔可行嘅，因为我觉得太难维系啦。我系一个需要见面嘅人，唔钟意靠电话联络，唔需要成日都知对方喺边，只系隔几日可以见到你一次，我已经觉得好安心。或者当嗌交嘅时候，其实已经唔系好想知佢嘅嘢啦，但系见到面嘅感觉系会好啲嘅。但系对我嚟讲唔可行，可能对好多人嚟讲都可行，所以先会有呢首歌嘅出现。”新歌的甜蜜氛围，会否令Jace对Long D改观？她直言不可能，唯独当遇到一个真心相爱的对象，才会迫使自己踏出爱情上的安舒圈，勇于尝试一段Long D恋爱。

Marco认Sica符合择偶条件

记得ViuTV节目《晚吹—有酒今晚吹》其中一集邀请曾参加《全民造星IV》的何洛瑶（Sica），说到自己的少女心事，她竟然借醉大胆表白，令全场起哄。Marco在工作上认识Sica，问到对方是否符合自己的择偶条件时，他直认：“系接近嘅，因为我觉得善良系最紧要嘅。而佢系一个几善良嘅人，同埋好有礼貌。”在旁的Jace不相信Marco的标准只有善良和有礼貌，而George则为好兄弟护航，要做到Marco眼中的善良并不简单。Marco再解释：“我觉得稍微自私少少嘅人都唔会系咁善良。（Jace：你对善良嘅标准好高？）系嘅，因为如果佢系善良，就代表佢唔系一个自私嘅人。”Jace听完后也忍不住追问，二人是否有发展空间？Marco害羞地回答：“大家嘅认识都系喺节目上，私底下只系啱啱识，唔系好熟。我觉得大家认识多啲对方，做咗好好嘅朋友先。”

唔敢解读Gin Lee离巢：做自己就可以

最后谈起近日环球宣布两大女歌手Gin Lee（李幸倪）和陈慧娴即将约满离巢，问到是否意味自己会在公司得到更多机遇，甚至问鼎一姐宝座，Jace坦言：“机遇呢啲嘢系你唔会估到，实在好难透过一啲变动同条件评论自己。我实在谂唔到咁远嘅嘢，净系谂自己都谂唔停，所以我冇特别分析过同量度过，咁样系代表多啲机会定少啲机会。从来一间公司入面每个歌手都系独特嘅，我做自己就可以，真系咁觉得嘅。（觉得好突然？）都惊讶嘅，但系合约上嘅嘢我唔会理解得到太多，而前辈们嘅去向我都好难得知。希望之后可以见多啲佢哋，farewell下。”