专访｜杨千嬅盼与新人合作边试边学：发现自己原来有好多嘢都唔识

杨千嬅两年前迎接入行25周年，决定以《I． II ．III MY STORY》纪录片报答歌迷支持，也藉著记下《MY BEAUTIFUL LIVE 世界巡回演唱会》走过的足迹，分享作为歌手、演员、女儿、母亲等不同身份的内心感受。纪录片直到昨日（19/5）正式在个人YouTube频道推出，她认为是合适时机兑现歌迷承诺，当中也因应网络生态而删改部份段落：“呢排气氛好好，大家都一齐听广东歌。但系放上YouTube嘅片唔可以太长，所以要剪一个令人哋有耐性睇晒嘅长度先上载，太长真系搞唔掂。之前个版本成百几分钟，有心想研究嘅先会睇晒，但系有啲位人哋可能都唔想知，想skip，哈哈。”短短两年，虽然对音乐的热诚不变，但作为妈妈的千嬅开始希望把更多时间放在照顾家庭上。
撰文：刘传谦

因爱儿成长有感触

两年过去，千嬅再看当时影片中的儿子Torres，除了惊叹他长大的过程很快，也希望他透过纪录片了解妈妈的演艺生涯，甚至知道自己曾经陪伴过妈妈一起工作。说到回忆，千嬅坦言有点感触：“可能真系因为年纪开始大，我觉得回忆好重要，尤其系令自己快乐嘅回忆。小朋友系其中一个令自己好紧张嘅环节，可能因为我作为妈妈，觉得佢有份参与其中已经好感动。”纪录片以千嬅一个人，到成家立室时一口三家相处分成3部份，她感恩一路走来遇到不少好作品，继而得到不少歌迷。

认因拼搏忽略与家人相处

与其说是纪录入行以来的高低，千嬅更希望影片是自己的生活日记。她在访问中承认过去为事业拼搏之时忽略与父母相处的时间，因此举行巡唱过程中能得到两老陪伴，已经令他心满意足。而母亲在这段旅程中的一番话，更令千嬅相当感动：“我记得喺其中一站问妈妈每个礼拜都要系咁搭飞机，会唔会好攰，佢话‘唔会呀，我好开心，终于可以同你一齐做嘢。’净系讲咗呢一句，我已经忍唔住系咁喊。”

笑看年少时绯闻：完全冇又好似唔对路

说起家人，纪录片中有一幕谈到他们会为千嬅记下所有媒体报道，不论是好消息还是负面新闻都一一收藏，她在拍摄期间也仔细看这本记录册，觉得非常感动。谈起过去会否介意媒体提起某些话题，千嬅想了一会后坦言对过往媒体各种报道都不介意：“就算系几唔好嘅新闻，呢个都系好精彩嘅人生历程。一个人唔会只有好嘅消息，要学习点样消化唔好嘅事，令自己改进，同埋令自己嘅内心更强大，学识包容。咁多年来面对负面新闻，我净系同自己讲，就算有几难过，首先要冷静，其次要提醒自己唔可以变做一个想法负面嘅人，任何时候都要选择善良。呢样嘢系最辛苦、最艰难，但确实系最重要。”千嬅谈起过往遇到一些从未发生，或者因误会而起的负面新闻，又曾经传过绯闻，年少时难免会为不实报道而烦恼，但现时会笑看一切报道，谈起绯闻时更笑言：“原来我都得到过呢啲新闻，都有少少女性魅力。（笑）都叫做有一啲绯闻出现过，如果完全冇嘅话又好似唔系好对路，间唔中出现少少嘅话，我觉得都OK呀。”

将重心放在照顾家庭

纪录片中千嬅谈到自己在年少时对奖项有种执著，直至今天，她认为得到奖项肯定对歌手而言相当重要：“一路走来，有啲创作都未必系大众喜欢，有时候会遇到一次又一次嘅否定，自己又要一次又一次咁重新建立，听落好似有种挫败，但系呢啲经历会令你嘅创作力、技巧更加强，因为你有𠮶种追求。重复著呢个过程，最想得到嘅当然系认同，而颁奖典礼就好直接咁畀大家感受到𠮶种认同。”不过，相比奖项上的竞争，千嬅坦言照顾家庭才是当下最需要处理的事：“依家有咗家庭，家庭对我嚟讲好重要，因为呢个系一辈子嘅责任。人大咗就会开始明白，现阶段其实唔系纯粹追求自己嘅目标，当爸爸妈妈开始年纪大，你要开始照顾屋企，变咗人生上不同事情嘅排列唔同咗，就会开始厘定人生重要嘅事情。”

加盟华纳盼专注音乐创作

近日千嬅选择加盟华纳唱片，令不少乐迷感到惊喜。她称在数个月前已经有这个想法，除了方便参与节目期间在歌曲版权上的处理，也希望自己拥有幕后团队后能专注演出及创作上的工作：“依家嘅音乐宣传唔系只有派台去电台、电视台，依家都会有好多平台，演出嘅时候都要处理版权问题。呢样嘢我唔系咁认知，有需要揾一间专业嘅唱片公司处理会好啲。加上我觉得歌手最好都系专注唱歌同创作，所以制作上都系由自己嘅工作室处理，关于宣传同发行就需要交畀专业嘅唱片公司团队。确实系减轻负担，毕竟依家最紧要嘅时间都投放喺家庭，有时间发下音乐梦已经好开心，其他一啲咁复杂嘅问题真系要揾专业嘅人帮忙。”

有留意张天赋：有好多歌都好好听

在照顾家庭和出席不同节目演出时，千嬅也有留意近年推出的作品。她直言现时歌手创作比过往更有弹性：“以前唱片公司可能因应市场，只会有几款音乐，例如芭乐、情歌；但系依家已经有好多唔同嘅选择，有年轻嘅组合、唱作人，例如我哋公司咪有张天赋（MC）啰，有好多歌都好好听。”即使出道27年，千嬅依然有制作新歌的动力，她坦言希望过程中边试边学：“呢一两年发现自己原来有好多嘢都唔识，或者冇试过做。呢一点畀咗我好大动力，原来仲有好多可能性同发展空间，好想趁我仲有热诚、能力嘅时候尝试。我开始发现自己喺幕后上唔系太了解，原来系可以咁做，做出嚟系咁有满足感，呢一点系驱使我想同更多音乐人、组合，甚至新嘅歌手合作。”

盼透过新合作增长幕后知识

突然令自己有这种领悟，千嬅举起在《声生不息》中，与单依纯、周笔畅合唱《高山低谷》的表演，惊叹三人合唱也可以有意想不到的变化和编排：“原来我可以将一啲感受立体化，或者化为一种概念，之后再将3个人放喺同一首歌。尤其《高山低谷》，幕后团队同我哋磨合嘅时候畀到我好大新鲜感，原来三部声系可以咁设计，不论系周笔畅定单依纯，大家嘅成长背景都唔一样，但佢哋都好钟意呢首歌，于是将大家对呢首歌不同理解变成三部声嘅合唱。以前冇谂过可以咁做，可能合唱就一定系分段，但系今次好有意思地铺排，同一首歌可以有唔同嘅创作、编曲。”

挂念演唱会舞台

原定两年前举行的《MY GRATITUDE 25 杨千嬅演唱会》因疫情取消，虽然在《声生不息》录影中都有观众，但她坦言与举办演唱会的感觉不一样：“演唱会系一个歌手，无论你唱咗几多年，开过几多场骚都好，都会系一个梦想。唔同嘅人生阶段上到呢个舞台，你会有唔同嘅嘢想表达。我希望有机会可以再踏上呢个舞台。”千嬅更透露新歌已经准备好派台，敬请歌迷密切期待。