专访︱关心妍有心理准备蚀住开20周年红馆骚：只系抱住个“勇”字
记得关心妍（Jade）在上年的新歌访问中提及，今年希望透过红馆演唱会报答歌迷一直以来支持，结果随著社交距离措施放宽，Jade如愿在6月4-5日举行《约 20周年演唱会 2022》，并初尝四面台带来的震撼。
访问在Jade的燃亮生命教室进行，梳化上歌迷为她制作的咕𠱸相当抢眼，全部都按过往专辑、单曲和演唱会海报设计而制作，对Jade而言也是回忆满满。“佢哋好钟意画我嘅卡通样，（都系呢个样？）系呀，有一位歌迷系插画师，佢成日都会画嘢，例如我出咗MV，佢哋都会做明信片、月历，不时都会有礼物送畀我。确实系会制作关于我自己作品嘅嘢送番畀我，系少咗一啲亲自织冷衫、折星星嘅嘢，因为呢个年代太方便，会少咗𠮶一类型嘅礼物。”
Jade为如期在今年开骚与歌迷共度出道20周年的重要时刻，上年开始已经不停入纸，本来在年初已经得知取得红馆6月档期，但当时第五波疫情反复，为避免因演唱会延期、取消的消息令歌迷失望，Jade决定在筹备同时保守秘密：“大家可能唔觉，因为我唔可以漏任何蛛丝马迹，因为我唔想畀假希望大家。个情况好似有咗BB但系唔讲得，讲咗就会小器𠮶种感觉，但系讲得嘅时候已经要准备卖飞，宣传都未做，因为唔敢宣传，开唔成大家会失望。”虽然与理想有点出入，但Jade决定把握难得机会，与歌迷共享喜悦。
撰文：刘传谦
摄影：陈顺祯
化妆：Cyrus Lee
发型：Adrian Au @ Salon Chemistry
造型：HY @V Chapter
服饰：Joslin & Marella
有心理准备蚀本收场
政府近日宣布在5月19日后放宽表演场地入座率，容许开放85%座位，但在Jade受访当日仍未有任何相关安排。其实场地只开放一半座位，Jade坦言当时有考虑过入座率低带来的成本压力，甚至要开始说服投资者愿意出一分力相助：“本身谂住有得开系开八成位，但系你都估到佢只系肯开五成，但系五成真系好棘手，因为好难帮补返支出，就算开两场都做唔到。但系得返五成又开唔开呢？呢个好睇投资嘅朋友，大家都要计数、凭信心，都只系抱住个‘勇’字。系延期都仲好啲，但系如果我哋唔要呢个期，就真系冇得开，唔系等就可以解决到，之后有一段长时间都会开唔到。说服到投资者后，卖飞嘅情况都好紧张，依家咁睇的话，希望蚀少啲啦！开五成真系唔好谂赚，可能开三面台都好啲，今次开四面台嘅制作成本都更加大。”
为免歌迷失望秘密练兵
既然开四面台成本太大，改开三面台，成本压力不就自然减低吗？但Jade坚持按理想蓝图而走，务求令自己不留任何遗憾：“之前两次红馆都系三面台，所以我真系好想试下四面台嘅感觉，作为一个歌手，无憾啦。试埋香港独有，𠮶种企喺最中间唱歌嘅感觉，我觉得咁已经好足够。”1月得知红馆档期的Jade，过去一直秘密跑步9公里练气，练歌、练乐器少不免，同时也开始构思演唱会的流程、歌单，甚至在制作《Emergence》专辑后已经为演唱会写下主题曲《约》，作为赠给歌迷的礼物：“佢哋好钟意我写嘅歌，《关心…心妍》、《接受现实》、《拖男带女》，以至上年专辑嘅《爱的告别式》。今次为佢哋写咗呢首演唱会主题曲，确实系谂住佢哋而写。我想约定歌迷，唔知佢哋几时开始钟意我，或者系咪已经走甩咗？今次都系约定大家，下次都唔知几时再开到，上一次红馆骚系10年前，如果今次睇唔到，可能要等到我50岁先睇得到。（笑）咁系咪睇我40岁嘅时候开骚会好啲呢？”
不排除Jovia初登红馆舞台
每逢歌手开演唱会，焦点绝对离不开个唱会出现哪些神秘嘉宾，对Jade而言，歌迷则期待能否看到女儿Jovia与妈妈同台演出。虽然在社交平台不时见到Jovia的样貌，但Jade认为女儿在大家面前依然有种神秘感：“佢未真正见过传媒，歌迷都未真正见过。佢出世嘅时候踏入疫情初期，讲紧两、三岁可以出街嘅时候已经系困住咗。好多人都未见佢真身，可能见到时候都系一岁左右嘅BB，点知一见到真身已经6岁啦！（笑）佢仲有𠮶种好得意嘅感觉，依家系睇佢愿唔愿意，佢嘅心态接受到嘅就去啦，但系如果佢觉得上台好紧张，其实唔紧要嘅。到呢一刻佢系好想上台，但系同一时间都惊。”
放手让Jovia追梦
作为母亲的Jade不反对Jovia日后向歌手方向发展，但前提是要以学业为重，透过积累而来的知识认清自己是否适合视兴趣为职业：“唱歌系一种兴趣，但当要将佢视为职业，其实系两回事，未必系好似你所想。做音乐永远都可以，但成为职业，首先要知道一啲都唔容易，唔系净系平时睇到著靓衫上台咁。画面睇落好灿烂，但背后有好多嘢佢都唔知道，要付出几多努力都未必知。”
在访问中，Jade指原来Jovia目前最大兴趣是练习体操，非常热爱打空翻等高难度动作。不论女儿最后决定向体操运动员还是歌手方向发展，Jade也在背后支持，只怕女儿三分钟热度，在将兴趣变成职业的过程中半途而废：“如果有一样嘢佢可以不停练好多个钟都唔厌，不眠不休都唔觉得辛苦，就代表佢对呢件事有热诚。但系呢股热诚系咪可以变成职业呢？我觉得佢要再大啲先知道。其实我哋细个都系一样，有几百种兴趣，而我到最后，歌手真系坚持得最多嘅兴趣。呢个年代变化太大，今日都唔知听日事，我会鼓励佢，到最后佢决心做运动员，甚至系做歌手，我会继续畀佢行呢条路。”
Jovia得知“关家姐”由来即喊
虽然过去20年都留下不少经典悲情歌，但乐迷茶余饭后的话题总是离不开“关家姐”潮文、2009年《劲歌》拿错奖等经典画面。事隔多年，Jade坦言已经不怕其他人再度谈起，过去在不同访问中也大方谈论事件，唯独向Jovia提起这些事件后的反应，令她大吃一惊。而她也没想过，《关家姐》成为Jovia的最爱：“大家都估到，佢会问我每一句歌词系点解，然后我要将成篇潮文解释一次畀佢听。佢有啲明有啲唔明，但系讲讲下佢突然喊，佢觉得有人会咁样话妈咪，唔明点解要咁话。我叫佢唔好喊住先，跟住就用呢件事做教材。呢个时间好多人都会讲唔同嘅嘢，有啲你钟意听，有啲嘢根本冇发生都会继续讲，但系唔需要理，依家嘅风气都有好多呢一种类嘅说话。佢就嚟升小学，会经历好多嘢，好多唔想听到嘅说话，要开始接受有啲人讲你唔好嘅嘢，有啲人甚至会特登讲你嘅唔好，唔会再有人不停赞你。”
解释过《关家姐》后，某日Jovia在YouTube上无意看到妈妈在颁奖礼拿错奖的一幕，结果又再解释事件由来，而Jovia也再次突然哭起来：“其实佢真系好锡我，所有关于我唔好嘅嘢都接受唔到，觉得好似有人虾我咁，好伤心。结果我又要安慰佢一餐，人生就系咁，有时候会做一啲好傻嘅嘢，或者系做错嘢。我同佢讲话第日都有机会经历好瘀嘅场面，但系都唔使惊，冇事嘅。当然会喊啦，但系喊完就乜事都冇。”不过藉歌曲提早认知社会上各种现实，对Jovia来说相当有帮助，让她及早做好心理准备面对世界上各种冲击。
或为忠粉开迷你骚唱Sidetarck
不论Jade出席哪些公开演出或节目录影，相信她也收集过不少歌迷的点唱，今次演唱会也不例外，她坦言选曲所花的时间最大。“我谂《你有心》、《放生》、《负担不起》呢啲一定走唔甩，讲完之后佢哋会话‘《手下败将》都要唱’，跟住就会愈嚟愈多，‘《假使我漂亮》都要’，‘《以身试爱》要听现场版’，‘《庞贝21世纪》又几好’，‘《逆来顺受》千祈唔好唔记得’……再讲落去就真系搞唔掂。”在歌迷愈点愈多下，甚至有忠粉希望听到一些Sidetrack，Jade也只能尽量在黄金时间满足歌迷：“我明白有忠粉系会连自己啲sidetrack都听晒，但系确实要兼顾，有啲观众未必系识好多自己嘅歌，仲要唱sidetrack就未必可以。嚟嘅人来自四方八面，我希望今次嘅歌单系完美，但系如果冇唱到你嘅sidetrack，我应承你会做一个Live畀大家，甚至如果有机会可以开一个mini concert，净系唱sidetrack都可以。”