专访｜吴浩康与郭思琳结婚非霎时冲动：呢个感觉真系累积返嚟
吴浩康（Deep）与郭思琳在3月中奉子成婚，双喜临门。而他的新歌《见字医病》决定凭歌寄意，在重新学习与太太相处模式时，也希望感情问题不会随默默忍受而日渐变大。不过Deep在访问一开始则说，歌曲背后的概念与自己的感情生活是两回事：“日后都希望乐迷知道，唔系阿Deep结咗婚就唔唱失恋歌，因为我嘅音乐作品唔系畀自己听，系畀我嘅听众。呢个唔系我嘅私人日记，所以都不太相关。”
访问期间，Deep也谈起新婚后的生活，从男、女朋友变成夫妇关系，他直言日后要与思琳持续学习夫妻相处之道：“呢样嘢系冇得停，我哋大家都未试过结婚，大家都未试过有小朋友，虽然都唔系年轻夫妻，但系我哋都需要一齐经历呢啲阶段。唔可能当自己学识，如果我当咗自己识，或者用识啲嘅心态去谂，我就会去返以前嘅思维。大家同步，要一齐清空，好似一张白纸咁去学。”不过他在访问中廿，原来两夫妇现在仍要分房瞓？
撰文：刘传谦
摄影：梁碧玲
吴浩康发型：Moe @ IL COLPO (On Lan Street,Central)
吴浩康化妆：木子维纳_Vena
吴浩康造型：DEMO OFFICIAL
场地：The AIR (The ONE)
为照顾爱犬分房瞓
虽然关系有变，但Deep认为生活节奏上变动不大，因为结婚前已经开始同居生活，但在注册前后的相处模式则是天渊之别，此时他自爆：“其实我哋注完册𠮶晚都唔系同房瞓，我哋要分开，我要睇住只狗，所以我要分开喺另一个地方瞓。”Deep记得注册翌日睡醒后，二人都觉得互相对望时的感觉已经完全不一样，认为背后与自己的感情观有一定关系：“以前拍拖真系可以用‘合则来不合则去’嚟相处，当然有啲所谓睇得开嘅人连婚姻都会咁睇，但系我见过父母经历唔同嘅人生关口，自己各自都会有相处上嘅问题都好，佢哋都会为家庭、婚姻，为咗当初嘅承诺而唔选择离婚。所以喺我个脑入面，结得婚嘅就系冇退路，冇得‘合则来不合则去’，所以使命感会有唔同。”
学懂放下执着互相支持
不过，Deep始终认为自己学懂放下对与错的执着，才是关系改变带来的最大得著。他认为过去与伴侣相处的过程中，对话之间出现得太多“应该”、“不应该”，现在学懂顾及对方想法，开始放下自己心中想著的对与错，夫妻之间不再时刻据理力争。Deep分享过去同居时已经因据理力争，不时与思琳产生大大小小的争执：“举个例，例如我哋执屋，一讲起佢就买一堆嘢返嚟执屋，我就觉得执屋嘅定义本身系想少啲嘢，但系佢就做紧啲本末倒置嘅事，佢话系想买啲嘢执返整齐，我就话‘系喇，我过往都系咁谂。’跟住大家就会因为呢啲嘢而闹交。依家我就会顺住佢嘅意思买少啲，或者系顺住佢嘅意思，将‘买’定‘唔买’呢个责任同佢一齐谂，而唔再系我衡量完件事，话我觉得自己聪明啲，方法好啲，佢嘅方法肯定唔好。纵然事实系咁，但系我唔应该基于咁嘅思维沟通。但系我觉得呢个改变系嚟得好自然，确实系冇经历过一件事而有改变，觉得几神奇。”
累积信任决定关系升呢
Deep过去的感情生活多姿多采，曾经与视后胡定欣、庄思敏、钟舒漫、李昭南以及崔碧珈有过一段情，究竟Deep与思琳相处时有否经历过一件令自己非娶不可的事？Deep先直言：“如果唔系，我点解要娶佢呀？”及后再道出自己的感情观，认为没有一刻冲动反而是好事：“呢个感觉真系累积返嚟。如果真系有𠮶一刻嘅话可能要小心啲添，如果系基于一刻嘅嘢同一个人一齐，真系要小心。但系我哋关系当中嘅认知、信心系一点一滴喺生活上共同面对一啲事而储落嚟。我哋储落嘅唔单止系关系上嘅成熟，而系对呢段关系嘅信心。”至于疫情下举行注册仪式，问起Deep会否与期望有落差，他选择以乐观心态面对：“今次系教识我冇得幻想咁多，唔需要幻想太多。我真心觉得依家发生紧嘅嘢已经系最好，如果有更好嘅我拣咗啦，而冇得拣嘅选择本身已经唔系选择，冇必要去睇，既然我哋活喺呢一刻，咁就活喺呢一刻。我只能够讲系一个好特别嘅婚姻。”
拒将感情生活放入歌曲
说回《见字医病》，其实歌曲大意早在Deep婚前已经想好，背后蓝本从一位前甲一篮球员的感情故事出发，认为假若二人共同面对问题，或许不会遗憾收场。至于谈到避免将感情生活放入歌曲，他先从自己站在乐迷身份解释：“呢个问题当我做乐迷嘅时候都会谂，见到学友结婚，唔同之后只能够听到佢唱《你的名字我的姓氏》？原来都唔系，仲可以有《我真的受伤了》。将呢件事放返系我同歌迷之间嘅关系，当然我唔能够话自己系学友哥啦，但系投放返呢个感觉，我都唔想大家觉得Deep自此之后只系唱幸福嘅歌，唔会唱失恋歌。所以我由呢首歌开始有个好明确嘅方向，畀大家知道我嘅歌系属于乐迷。当然，我同太太嘅关系之间如果有音乐作品都会攞出嚟，但唔会以我嘅生命蓝本同生命阶段做一啲歌。”
因《钱七》决定拒用人生阶段作灵感
除了从乐迷的角度出发，Deep坦言后续作品不以个人生活为灵感，其实与周国贤的《钱七》有点关系。他曾经在《DEEP 2019+1》演唱会中唱过这首歌，当时觉得《钱七》道出周国贤和“高佬”黄晓晖一同在外国成长的兄弟情，当中的情节也勾起自己与已经离世的哥哥一些共同经历，没想到乐迷认定《钱七》是周国贤和“高佬”专属的歌，更惹来一句“关你咩事？”，令他大感无奈：“我有答到𠮶位听众，相信身为一个音乐人，任何观众用呢首歌作自己嘅情绪投入，佢哋唔会介意。但系我睇到宣传对于一首歌嘅影响。以前我系会忽略，记者唔系问关于歌嘅嘢，但系我作为唱歌嘅人，我点表达系同首歌嘅宣传有关，点介绍呢首歌都会影响人哋对呢首歌嘅定位。为咗令乐迷有多啲投入感，我会将自己真实嘅故事同音乐作品拉开啲。”下集专访，Deep除了谈与Cousin Fung首度合作的经过，也大方分享自己近期欣赏的新生代歌手。