Eric Kwok获TVB开绿灯首度亮相Chill Club：佢哋畀我感觉好宽容

《劲歌金曲》现任主持Eric Kwok（郭伟亮），昨日（8/2）为宣传新歌《等埋你》现身九展，参与ViuTV《Chill Club》录影。他指事前已经知会TVB：“有同佢哋讲我会以歌手身份上《Chill Club》度唱，佢哋冇问题，好开通，畀我嘅感觉系好宽容。我唔知其他人嘅情况系点，但系我绝对感受到呢样嘢，‘冇问题，去啦’。”

盼打破电视台限制：由始至终都应该系咁

这次也是Eric首度在《Chill Club》献唱，他喜见业界出现新常态，认为歌手身份不应受电视台限制：“由始至终都应该系咁，我明白系有好多台与台之间嘅嘢，但系我觉得音乐系愈有多啲平台可以上就愈好，无论系网上、电视台、电台都系。”

比较起两台音乐节目，Eric直言这次在厂内感受到与《劲歌》不一样的气氛：“睇《Chill Club》感觉上画面好大，睇落个厂都好大；而《劲歌》系因为两边墙都有布景，所以感觉上会多嘢发生啲，好似喺太空仓入面。一路都谂紧点解《Chill Club》个台好似阔啲，今日嚟到就发现，原来系两边墙冇布景框住。呢样嘢都几正，但系两个感觉都好唔同。（钟意边个感觉多啲？）我未喺《劲歌》唱过，唱完再话你听。但系我觉得系好睇人，《劲歌》有“小飞侠”（苏德华）嘅乐队，合作无间，自己同Joey（邓建明）都好熟悉。”Eric认为场地、平台只是其次，在节目中献唱最主要是能否与合唱嘉宾有化学作用。

今次是近期首度有《劲歌》主持以歌手身份亮相友台，Eric希望这次跨台合作能进一步打破歌手之间在不同电视台亮相的限制，又视两台歌手能在友台节目宣传新歌为愿望：“我唔知得唔得，我唔系高层，话唔到事，但系呢个系一个愿望。希望歌手都可以去唔同嘅台，更加容易去展示依家香港乐坛嘅音乐系点，愈多制肘，可能会令观众唔知依家发生紧咩事，例如MIRROR上唔到《劲歌》嘅话，睇开《劲歌》嘅观众对佢哋可能印象就冇咁深。”

受破格歌词吸引再出慢歌

说回新歌《等埋你》，这次是Eric自2007年后再度推出慢歌，以死亡谈及爱情，他坦言在Swing解散后从来没有想过会再推慢歌，后来被林若宁的歌词吸引，决定亲自演绎这首另类情歌：“呢份词太特别，好破格，冇乜情歌会咁写。其实份词系旧年已经完成，我提议佢喺上年我生日嘅时候完成呢首歌，结果佢喺我生日之后𠮶日先畀我，原因系呢首歌太唔吉利，好多‘死’字。但系我觉得正到唔可以唔唱，因为呢个风格太似我啦，有啲幽默、甜蜜，又好破格，佢都话过知我钟意先咁写。”

邀Mike合唱Swing名作

Eric解释过去希望先专注主持工作，因此到今天才重拾歌手身份在《Chill Club》亮相。除了《等埋你》外，Eric还会带来前作《Ripboy》及部份Swing时代的作品，更透露今次获曾比特（Mike）担任救星：“今次可以同强尼同Mike一齐唱，叫Mike嚟系因为今次要唱两首Swing嘅歌，其实Swing啲歌都好高音，我知道我同强尼都搞唔掂，因为Jerald（陈哲庐）系好高音，而今次Mike就系唱Jerald𠮶部份，因为佢都好高音，所以我同佢讲‘Mike今次一定要嚟，冇得话唔嚟，我都帮咗你好多啦系咪？’不过我知佢呢排都好忙，好多谢佢百忙之中抽空嚟。”