专访｜柳应廷新歌邀阿正@RB合作暗藏玄机：我有一个好疯狂嘅想法
“MM7”，除了是柳应廷（Jer）第七首单曲的名称（不计算电影《妈妈的神奇小子》主题曲《神奇之路》），也是乐迷听完这首新歌后的反应。在Jer眼中，他希望藉歌名创建与听众的连结：“‘MM7’呢个词语系嚟自我嘅TG群组，有个粉丝打错字，佢心急得滞，将个‘正’打咗做速成码‘MM7’。我本身都系一个成日打错字嘅人，既然粉丝成日都用‘MM7’嚟代表个‘正’字，既然呢首系同小克同Carl叔叔（王双骏）合作嘅第七首歌，我又想将呢首歌好似礼物咁送畀粉丝，不如就用呢个我同歌迷嘅共同语言啦，叫《MM7》。”
《MM7》是Jer首度与独立乐队The Hertz合作的作品，他直言对方的音乐也很“正”：“今次揾一队我觉得好正嘅Band作曲，好想做一首感觉好放松（Chill），好正嘅歌。”而在访问中，Jer除了一一拆解新歌“MM7”式密码，更说着今次与The Hertz合作，背后也有一个非常有心思的原因。
采访：刘传谦
摄影：陈顺祯
柳应廷化妆：Rainbow Chung @Annie G. Chan Makeup Centre
柳应廷发型：Man Chan @ Chic Private I Salon
柳应廷服装：Comme des Garcons, Zegna, Jimmy Choo
盼更多乐迷认识The Hertz
“佢哋之前做嘅演唱会我都有去睇，佢哋啲音乐系好正、好䟴、好轻松，咁啱经历咗两个系列一啲歇斯底里嘅歌之后，今年好想落返地，做啲轻松啲嘅音乐。”能协助Jer的作品变得更贴地，他第一时间正是想起The Hertz。谈起第一次偶遇的经历，他也不禁笑了一下：“我平时喺化妆嘅时候成日会听，咁啱有一次喺化妆间畀佢哋撞正，听到佢哋话‘边个播我哋啲歌？’然后佢哋见到系我，呢个就系我哋第一次认识。之后再好冒昧咁问佢哋可唔可以合作，好高兴佢哋都话可以。”果然，今次编曲上很funky的编排，加上弹奏手法，实在找不到一个比“好The Hertz”更贴切的形容词。
过去的《千世书》、《黄金法则》等都备受好评，也是Jer爱听的音乐作品，不过为了让更多人听见他们的声音，Jer决定以实际行动出击：“佢哋嘅音乐值得畀更多人认识，希望将佢哋嘅音乐推介畀大家听。好似过往嘅吴林峰，都系因为同我合作完之后，大家会再去听多啲佢嘅歌，好希望今次同The Hertz合作完，大家都会听多啲佢哋嘅歌。”Jer透露将延续这种合作形式，透过自己的知名度，希望能推介自己喜爱的音乐单位：“香港乐坛如果要百花齐放，系要靠好多人一齐撑起呢个乐坛，唔系只得MIRROR。包括有好多唔同嘅制作人、MV导演、作曲人，佢哋都好有才华，喺我哋嘅关注度咁高嘅同时，大家咪可以关心身边帮过我哋嘅咁多人，其实佢哋都好好。”
曾想过用全“正”班制作
中间一段爵士风结他独奏，除了埋藏一个小心思，也表达了Jer对音乐的执着。今次邀得RubberBand队长兼结他手阿正（冯庭正）出马，看似是个巧合，原来是Jer与Carl叔叔一起构思的隐藏密码。他透露本来的想法更夸张：“佢成日都好想试下摆一啲隐藏讯息喺首歌度，我同佢一样都好想睇啲歌迷点揭秘。我试过有一个好疯狂嘅想法：呢首歌所有音乐人都叫‘阿正’，但系最后都系搁置咗呢个谂法，因为真系太难揾啦！”
重新推动爵士乐
以这段结他独奏作为《MM7》的间奏，两种曲风可说是截然不同，这也是Jer在《狂人日记》时已经希望尝试的风格：“我由《狂人》嘅时候已经同Carl叔叔讲过，好想喺一首歌入面玩齐两种完全唔一样嘅风格，当时某程度上喺Verse 2（第二段主歌）做过，但系未试过用一队乐队将某一段爵士化。今次同Carl叔叔话好想再试多一次，尤其是要爵士化咗呢首歌。因为爵士乐可以话系一种‘被遗忘嘅音乐’，喺外国愈来愈唔流行，甚至可以话系一种非主流音乐，但系我觉得呢样嘢唔可以冇，好想推返出嚟畀大家欣赏，我都好钟意爵士乐。（做一首爵士曲风嘅歌？）唔排除，今年想做一啲慢歌，可以尝试多啲风格。”
慢慢学懂“爱自己”
《MM7》的题材延续“重生系列”包含的《零极限》四式“对不起”、“请原谅我”、“我爱你”和“谢谢你”，希望先与内心世界说一句“爱自己”，例如追寻自己的私人时间（me time）等等。MV则以四个不同性格示人，其中三个属于Jer的内心时间，也更充分地突显著歌曲的中心思想：“就算你嘅心入面有几多个自己，几多唔同性格都好，你都要同佢共存，接受佢。唔好因为要理会人哋嘅目光而唔做自己，反而要做一个最真实嘅自己，咁先系做重要。”
在29年人生中，Jer认为直至近年才称得上是“爱自己”：“以前我系一个唔钟意将自己心入面谂嘅嘢讲出嚟嘅人，亦都好怕得罪人哋，好多时都会因为遵从其他人嘅意见，而做咗一啲我唔想做嘅嘢。但系嚟到今年，我开始将自己想做嘅嘢、唔想做嘅嘢都同对方讲，当然我仲系喺学习当中，尝试紧用一个唔会令人哋难受，或者系容易啲接受嘅方法去讲。（边件事令你要学识咁做？）冇一个特别嘅例子，其实都系一个唔同阶段嘅自己，例如今年喺拍摄上有啲嘢系唔钟意嘅，讲完出嚟，可能会有一个更加好嘅解决方法，或者系一个更加好嘅拍摄方法，例如啫。经历过呢啲事之后，开始会同自己讲不妨试下。”
Jer and the duo band?
在作品上，Jer今年会以慢歌为主展开一个新系列，目前也有不少创作人开始为自己写歌，但这个系列的合作单位，他决定暂时向读者卖个关子。说到这里，Jer透露Carl叔叔有想过为他组成一队“duo band 2.0”，虽然目前只是构思阶段，但足以令他兴奋不已：“我希望有一队好钟意一齐玩嘅乐队，可以喺台上面陪我一齐揈，一齐玩。我觉得会好开心，以前睇Eason（陈奕迅）嘅时候都觉得呢队乐队好劲，究竟到我自己拥有嘅时候会系点，其实连我自己都未想像到。”Jer希望能与更多有才华的音乐人合作，大大提高作品的音乐性：“今年呢个企划好想揾一啲唔同嘅乐队合作，或者集合一啲超级有才华嘅人，佢哋可以身兼多样乐器，一齐玩现场表演。因为我觉得自己需要一啲音乐性更加丰富嘅歌，依家物色紧，到时出骚可以玩得开心啲。”
他透露目前想储多一点歌，与花姐商讨过后，希望今年可以举行个人音乐会，自己的脑海中也不时有不同想法：“未必系自己歌为主，除咗有自己嘅歌，同时会有我想讲嘅一啲主题。我系一个本身好钟意谂点做骚，或者会唱咩歌嘅人，我会记低喺自己手机入面嘅清单度。初步已经谂过如果有得开演唱会，会想做一个咩主题，嚟紧大家就会知道。”
点选图辑睇更多Jer专访靓相：