专访｜C AllStar认单飞后重组功力更深厚：好同唔好都要自己承受
经历三年单飞发展，组合C AllStar在上年正式重组，并推出概念大碟《人类世》，以“地球的最后一代”出发看世界。除了专辑内的12首歌，C AllStar在一年内举行过三个演唱会，甚至为专辑举行过展览，记录成军10年以来的点点滴滴，年底也如愿在新城及叱咤颁奖礼上有斩获，得到奖项认同只是其次，最重要的是四子如愿齐齐站上颁奖台，在同行及歌迷面前展示成果。
“特别想讲返当时宣布休团呢个决定，大家对我哋单飞嘅不安、担心，希望喺演唱会又好，喺呢张专辑又好，都一次过还返晒畀大家，一次过𠱁返大家开心。”除了乐坛上的成绩，C AllStar四子经历过个人发展，在专辑中也展示出自己在音乐制作上的进化，On仔（陈健安）上年这个对歌迷的承诺，似乎也成功兑现。
撰文：刘传谦
摄影：叶志明
各自修行 各自进步
回顾上年重组，钊峰（梁钊峰）形容是一段成员间互相分享三年来各自修行的过程：“例如系King（吴崇铭）啲EDM系令人好放心，各自监制嘅歌都好值得信赖，我觉得系多咗一份信赖，大家珍惜咗，因为演唱会又好，其他嘢都好，冇嘢系必然。”Jase（何建曦）补充：“或者系喺呢个充满住变幻、变动嘅时代，我哋嘅集合如果系可以带到畀大家一点安慰，我都觉得好有意义。”
On仔则直言经历过个人发展，四子都变得更强大：“好似一啲足球育成游戏咁，有啲人走去其他地方学防守，有啲走去巴西学进攻。大家各自都冇咗依赖，好同唔好都要自己一个承受晒，呢个过程令我哋各自嘅功力都强咗。”这些进步都在新碟中逐步呈现出来，成员不但担任部份歌曲的监制，更会参与创作，甚至刷出新火花，例如钊峰与Jase为《人类世》中最后一首歌《时轮》合写歌词，他直言风格与过去的个人作品大有不同：“因为我哋各自成长咗，今次填完份词嘅味道都唔同啲，呢次合作好想喺文字上交流，因为佢系作家嚟嘛！”
《时轮》本来是监制阿简给钊峰的一份功课，Jase收到钊峰邀请后便答应一起完成歌词，在初稿上再加修饰。其实对首次为C AllStar填词的Jase而言，不论是《时轮》还是自己填词的《没明日的恐惧》，都是一大挑战：“帮自己写歌反而系容易啲，因为自己知道自己最适合嘅风格。但系帮C AllStar写嘅时候，就要开始谂C AllStar需要一个点嘅风格，乐迷想要一份点嘅歌词，例如呢首歌点样可以写到4个角色畀大家唱，因为呢首歌系讲紧4个唔同处境嘅人面对同一个处境。”
回顾出道12年里程碑
展览会场中有一条时间线，记录C AllStar从街头走到今天的重要时刻，四子又会认为哪一个经典时刻至为重要？钊峰二话不说，认为休团前最后一个演唱会《生于C AllStar演唱会2017》，因为大家在最后一刻都哭成泪人：“唱《此刻无价》嘅时候4个揽埋一齐喊，好似之前都冇试过4个人揽埋一齐，但系呢一刻就见证咗我哋嘅第一次。同埋𠮶阵系阿King喊先，佢之前系冇喊过，转眼间咁就4年啦。”
On仔同样认为2017年对四子而言十分重要，不过他认为当年推出EP《LoveaHolic Vol.2》才是最重要，因为这张专辑内的单曲都是成员的独唱歌：“𠮶阵已经埋下咗单飞嘅种子，当时仲要玩咗一个几好嘅宣传同比并，各自要有一啲预算，自己衡量要点用。虽然系好微量，但系唔紧要，我哋有创意嘛，可以谂下点样拍呢个MV。”当时Jase仅仅以一票之差赢On仔，得到在红馆独唱10分钟的机会，On仔直认十分佩服：“𠮶阵佢唔系用呢笔钱拍一个MV，而系做咗一个巡回演出，然后剪辑呢啲画面做呢个MV。但系佢有一招真系好奸，最后一站突然间话有礼物送畀大家，原来系播呢个MV畀大家，真系机心重！”Jase则辩护说：“系机心重，但系预算得咁多，仲有人情牌可以任用呀。”
Jase此时话题一转，即点出自己认为成军10年来最重要的一刻，原来正是2011年10月正式加盟寰亚一刻。Jase认为没有得到唱片公司青睐，或许就没有这10年来得到的一切：“依家听到嘅咁多概念大碟、演唱会、MV等等，所以成件事要由呢个位开始数起先啱。”钊峰也记得当时在铜锣湾街头举行签唱会，正好符合四人在街头被发掘的经过。
说到街头，King马上联想到自己最爱的专辑《生于斯》，因为专辑内12首歌正好刻划著当时的香港：“所谓‘生于斯长于斯’，所以我哋喺旺角街头影封面相。好庆幸呢张咁有情怀嘅碟，可以喺2015年将成个香港情怀放入去，可以话系咁多张碟入面最有本土情怀嘅碟。”
不过数到最能代表C AllStar的歌曲，四子都不约而同地认为是《此刻无价》。On仔更引用歌词说：“‘难舍难弃／旋律一响起总是你’，𠮶个‘你’系包括兄弟，包括歌迷，包括一直支持我哋嘅人，都系此刻无价。”而King也提到出道初期的《iSing》：“呢首歌都好有意义，因为歌词系讲紧‘I sing what I mean’，呢样嘢正正贯穿咗我哋咁多年嚟嘅做事方法。”
续以C AllStar身份发展
踏入2022年，很多乐迷都会关心C AllStar去向，究竟是继续以四人组合形式继续发展，还是回归个人单飞发展？On仔则说：“我谂未来嘅路向唔需要特别讲系休团、单飞，唔需要特别深究。我哋可以用更多唔同嘅形式呈现，好多人都希望我哋《别消失》，放心，我哋唔会消失。”