2022跨年｜郭富城赶工拍完戏　抽离沉郁角色：要开开心心上台

除夕夜晚（31/12），各区都有倒数活动及跨年演唱会，而《2021美丽的夜 香港跨年演唱会》就在中环海滨活动空间举行。天王郭富城（Aaron）为演唱会担任压轴嘉宾，接连献唱《对你爱不完》、《狂野之城》和《唱这歌》。除了与观众倒数2022年来临，更以《动起来》为观众送上祝福。

表演后城城接受传媒访问，他先为读者送上祝福：“呢两年喺疫情下大家都过得好辛苦，希望疫情快啲过去，大家都顺顺利利过正常生活，想做咩就做咩，要咩有咩，开开心心。”

今晚太太方媛亦有带同囡囡到现场支持老公，城城直言相当兴奋，又说上年因工作及疫情未能在香港倒数，今年是“细宝”第一次在台上看爸爸表演，自己也不停向女儿飞吻。他坦言有一段时间害怕自己未能脱离《临时械劫》中的角色，影响家人过节日的气氛：“呢个角色好沉郁，自己都知道系好难抽离到呢个角色，（依家抽离到？）因为㖊日天光嘅时候拍完我嘅戏份，第一件事就系剃晒啲须。我拍完返到屋企嘅时候已经知道自己怪怪地，我太太都明白。我话今日一定要顺利拍晒，因为我今日要上呢个舞台，要开开心心，畀大家见到真正嘅郭富城！终于剧组都顺利拍晒，同埋呢两个月我未试过瞓到8个钟觉，今日终于做到，原来呢种滋味系咁特别，咁开心。”

城城坦言自上年的慈善演唱会后，已经有一年时间没有踏足舞台，今次能站上舞台，又能透过传媒为大家送上祝福，自己也觉得十分完满。回顾2021年，城城庆幸过去有两个月时间本地确诊几乎清零，令大家可以尽情放松：“大家都可以出嚟松一松，又可以用消费券购物，呢段时间睇到香港人有一段时间可以感受到快乐，不过真正嘅快乐真系要等到疫情过去，作为香港人，大家都希望可以过返正常生活，全球都系咁。我觉得喺疫情入面，大家都珍惜工作，尤其是电影行业，喺疫情下台前幕后都开唔到工，所以就做慈善演唱会帮佢哋筹款。今年见到喺香港有好多剧组开紧工，对行内系好大鼓励，希望佢哋有工开，而大家都要去电影院买飞支持香港电影。”至于音乐上，城城喜见今年有不少新血加入：“我都做过新人，今年喺乐坛见到有咁多新人出嚟，受到咁多观众支持，我系好开心嘅。乐坛系需要咁嘅，同埋要百花齐放。”他希望乐迷能在除夕夜于其他地方见到心仪的歌手，不怕观众会拿各大除夕骚作比较。

谈起城城在圣诞节时扮演圣诞老人，他坦言最重要是博得小朋友一笑，认为逗囡囡笑是爸爸的责任。他笑说自己为不被女儿发现，于是说自己要替圣诞老人照顾鹿，最后女儿真的不知道爸爸扮圣诞老人。被问到农历新年会否改扮财神，他直言：“梗系要一set啦！扮埋财神，等佢哋揽住，当然要佢哋锡我一淡啦，畀佢哋揽实啲。只要佢哋开心，我就会开心。”