张敬轩争我最喜爱男歌手有压力　喜见乐坛恢复健康：钟意良性竞争

张敬轩周四（25日）出席品牌活动，获逾百粉丝撑场，人气依旧。谈到将举行《Hins Live in Hong Kong The Next 20》一连15场红馆演唱会，门票更在短短半天内售罄，张敬轩透露准备工作正如火如荼进行中：“呢段时间会开始彩排、进入fine tune阶段，尽量喺开骚前一个星期打磨到佢已经成型，第一场嘅质素就会好好多。”他又坦承场数多自有其好处：“可以唱嘅歌多啲，每晚嚟嘅观众听嘅歌都会有丁点唔同，嘉宾都唔同。”

张敬轩日前孖七仙羽师傅拍《轩公敲碗》及《七福星》，他直言跟师傅合作相当有趣：“佢成日都有好多金句，同黎生（黎明）有得挥，七师傅系一个好有正能量嘅人，睇节目佢成日无定向以为佢是但噏，但佢全部嘢都有根有据，系一个十分有智慧嘅导师。”张敬轩又自爆师傅除了叫他“张剑谦”，更赐他一个霸气新朵名为“Super J”：“师傅话拍摄嘅地方系柴湾，所以叫我柴湾Super J，简称柴J，唔好问点解。”

叱咤乐坛颁奖礼最受欢迎男女歌手、组合投票进入白热化阶段，张敬轩晋身最后8强直言心情兴奋：“旧年因为疫情冇得做大嘅颁奖礼，所以今年有得演出、有演唱会都好珍惜，所有嘢都唔系必然。”他续言：“当自己决定要认真去游乐场玩，每一个游戏都会好享受，例如呢段时间拉票睇住票数上上落落都几得意，都系一个动力喺一个新潮流之中畀大家睇到自己。”张敬轩表示拉票绝招为“以诚意打动”大众：“作为一个入行廿年、有一定年资嘅歌手，想话畀大家听初心仍然喺度，仍然畀心机做歌、做音乐。”

今年乐坛百花齐放、许多新秀一跃而上，我最喜爱奖项的竞争亦显得尤为激烈，同为8强的竞赛男歌手包括：姜涛、Anson Lo（卢瀚霆）、林家谦等，张敬轩认同今年对手强劲：“除咗有各自嘅音乐理念，有啲又好跳得、唱得又写得、乜嘢类型嘅艺人都有，对于我嚟讲系有压力，呢个亦都系好玩嘅地方，令到你唔好故步自封，刺激自己喺一个新局面做出唔同嘅作品。”

谈起今年为张敬轩出道20周年，作为一个里程碑会否也希望得奖去迎接另一个新阶段，他认同道：“每一个奖项、尤其大奖对我呢个里程碑来讲系有特别意义，例如生日有人送一份特别礼物畀你系好值得开心；但始终都希望成个乐坛系有个气氛，毕竟自己都系一分子，净系一个人玩、或者一个人得到欢呼，我自己系唔享受，我钟意所有人有良性竞争、乐迷有唔同选择，呢个先系一个健康嘅乐坛，所以今年嘅局面就好好，包括：MIRROR、家谦、MC（张天赋）、ANSONBEAN（陈毅燊），大家都有唔同受众、唔同面貌，我特别开心系有好多乐队，例如per se都有好多机会畀到佢哋，今年乐坛咁蓬勃我系开心。”