专访｜Robynn叶晴晴对乐坛生态感吸引：依家冇分主流独立，冇规矩

不经不觉，Robynn（叶晴晴）投身独立歌手行列已有一年，单飞后推出三首英文歌，期间更多了妈妈这个身份，去年10月就迎接新成员“小糯米”诞生。她承认在离开唱片公司后，自己都有担心过成为妈妈歌手后的转变，又直言一年内的转变可说是颠覆自己的世界：“自己要坚强啲，急速成长，开始要识衡量唔同嘅事情，有啲乜系值得做，有啲嘢反而不如攞返𠮶啲时间陪个女。”
本来要在独立音乐圈中发展已经不简单，加上妈妈这个身份，Robynn坦言自己曾经萌生退意：“我成日都会问自己，生完之后会唔会真系唔再做，将佢变成一个美好回忆呢？但系喺呢一段所谓产假期间，我发觉如果自己离开咗创作音乐呢条路，我会好唔开心，发觉无论𠮶件事有几艰难都好，所有嘢都系由自己拼凑、计划，最终嘅决定权喺自己度，到最后会觉得一切都值得。”休息大半年后，Robynn选择以广东歌作为回归之作，继续追寻自己的音乐梦。
撰文：刘传谦
摄影：叶兆康

用新歌自勉：仲有好多嘢放唔低

“我仲有好多嘢放唔低，经营咗9年嘅音乐路，如果我贸贸然离开咗，我会觉得𠮶个人唔系我。”临近女儿出世，Robynn就录好《尚有一堆理由显出我优秀》，她害怕身为人母后，自己的时间会变得不受控制，庆幸在坐月期间透过作品不断提醒自己要坚持音乐梦。在女儿断奶后，Robynn也开始加紧步伐筹备MV拍摄、宣传，决定以短发形象重新出发。再谈到歌曲的创作理念时，原来也与最初与环球约满离巢的决定有关：“写呢首歌嘅时候我未发觉自己有咗，但系𠮶阵就嚟离开唱片公司，我抱住一个情绪系，好多方面都就嚟要有新开始；而喺度点填词嘅时候就知自己有咗，但系𠮶阵我仲想继续冲，未有生完出嚟嘅预感。确实系个肚愈嚟愈大，我就感受到世界真系会变得好唔同，不过算啦，都系录咗先。”

在怀孕期间录音，Robynn认为自己在心理上的转变最大，觉得自己在过去过于着重技术、操练，觉得过去努力是因为自卑，要将勤补拙。不过在今次录音上，她重拾了不少自信：“我冇用到之前练歌嘅概念，反而唱到唔一样嘅色彩，可能系因为佗住BB而令荷尔蒙变咗，或者其他原因都好，我确实系变得感性咗，而呢啲感性系我可以攞嚟用。可能系我之前谂多咗，依家放松咗，就做到一啲之前反而做唔到嘅嘢。有时啲嘢唔需要死逼烂逼，自然流露出嚟嘅嘢已经好足够，仲可能嚟得更加真挚。”

丈夫鼓励下决心坚持

现在Robynn除了音乐事业，还需要兼顾家庭，照顾女儿。她直言过去从未想过自己做得到，过去一年也曾经萌生退意，最后在丈夫支持下决定继续追梦：“就算我唔相信自己得，佢都好支持我继续做音乐。我都有啲时候会谂，不如算啦，咁辛苦为乜呢？但系佢同我讲‘你知道自己最想做咩，肯定你一定唔会离开音乐。’佢好鼓励我继续行，我都好开心人生之中有呢个伙伴。”

然而，Robynn认为自己在克服难关的过程中，或多或少都会感到孤独：“原来我呢一代系冇乜唱作人妈妈，所以对我嚟讲，就好似系得自己行紧，偶尔我都会崩溃，点解好似咁少人好似我咁？好似冇乜人可以喺身边，然后明我苦恼紧咩，所以好多嘢要学习、跨过，真系得自己先知。不过我系有信心嘅，做咗呢首歌，见返咁多歌迷，全部都好喜欢呢首歌，好鼓励我。虽然系好少人行呢条路，但系我都想继续行落去。”

虽然歌曲从自己感受出发，但在创作MV故事时，Robynn希望拍出来的与自己的真实体会无关：“我觉得佢系应该可以套用喺唔同人身上，唔同嘅角色都可以应用喺呢份歌词。佢只系一个简单嘅分手故事，但系讲紧嘅系心态上要点做，当有一件事发生咗，你需要重新开始嘅时候，你应该用咩态度继续向前行？你有几主动去改变自己嘅心态，令自己可以有一个新开始？”

小清新象征毫无包袱

相比过去一年的三首英文歌以日记形式记下自己的感受，这次回归广东歌市场，Robynn新歌带点勉励、同行的感觉，不过她认为最大改变只是人生得来的历练，而过去Robynn & Kendy时期的小清新风格，她认为是代表着初出道时毫无包袱的状态：“之前唱《翻墙》或者其他励志歌，当你自己仲系好新，音乐路上未有咁多波折嘅时候，其实𠮶阵系冇包袱，好开心咁唱，唔系要特登营造一股小清新，骨子就系咁傻猪猪。我都会听得出𠮶啲分别，经历过一啲事，成长过，写出嚟、唱出嚟嘅嘢系会有另一个味道。音乐就系咁得意，好似记录紧你嘅人生阶段。”

最爱乐坛不再有规矩

与许廷铿、谢安琪和昔日战友Kendy（孙晓贤）一样，Robynn也是近年离开大型唱片公司，加入独立歌手行列的其中一员。除了调整心态，Robynn也深深被现时乐坛生态吸引，决定要放手一搏：“依家冇分主流、独立啦，最正嘅位系过去嘅规矩好似慢慢拆紧落嚟。冇规矩㗎啦，好多嘢都变紧，边个话一定要有公司？边个话你一定要有几瘦、几靓？边个话要有监制帮你做？我觉得依家好玩咗，好鼓舞。”

Robynn也有留意新生代歌手的作品，认为现时听众接受能力更大：“过去有一段时间我系活喺自己嘅山窿，最近真系留意多咗，睇多咗依家发生紧咩事。例如我前公司嘅Jace（陈凯咏），我好戥佢开心，觉得佢带到一啲好fresh嘅嘢畀大家。又例如Gareth.T（汤令山），我好钟意佢嘅音乐，香港都有呢类型嘅音乐真系好正。最近都有睇‘试当真’《系咁先啦》，我老公超钟意睇佢哋啲片，喺度狂笑。我觉得好开心，真系热闹咗好多，好好多。”

盼做个亲力亲为妈妈

问到未来音乐大计，Robynn希望今年能再推出一首歌，目前也已经筹备明年的创作方向，不过她直言现阶段已经不会为任何计划设定一个限期：“我觉得自己生完之后恢复得慢，好多嘢我都唔会设定一个死线畀自己，始终我系好想自己亲力亲为嘅妈妈，我想尽量揾到𠮶个平衡，不过今年真系会好想可以出多一首歌。”