专访｜Dash认与Hey Joe Trio合作前因Gary离世崩溃：唔想再做呢行
即将在明日（30/9）的《围炉. 乐Live Band音乐会》中，与Pandora及FIESTER联手演出的三人乐队Hey Joe Trio（简称：HJT），早前透过《最耀眼》向监制唐奕聪（Gary）致敬。作品由Gary好友C.Y.Kong监制，并邀得Mr.低音结他手（Dash）献声。
Gary在生前一直有提携本地新晋乐队，也曾经与HJT和Mr.合作，这次Dash选择接受C.Y.Kong邀请，是看中HJT制作新歌的动机：“其实佢哋有呢个心意，藉歌表达自己嘅心思，其实我一直都觉得做歌就系要咁，应该系将你想讲嘅嘢摆入去。不过大家听唔听到就系另一回事，可能有啲人听到就知讲紧咩事，但系有啲人会唔明，唔紧要嘅，自己点意会呢样嘢最紧要。”
不过《最耀眼》听起来却是一首带有嘉年华气氛的作品，在别人眼中，似乎称不上是一首谈及离别的作品。其实这是HJT低音结他手Patten的意思：“我哋经历完唐生走咗，亦都见到依家嘅大环境系好多人移民，成个香港都好唔开心，我哋希望透过音乐话畀大家听，我哋仲可以一直奋斗落去，Life goes on。”
撰文：刘传谦
摄影：陈顺祯
Dash对获邀献声感惊讶
虽然HJT过去曾担任Mr.内地巡唱的暖场嘉宾，但Dash坦言自己对三位小伙子的认识并不深，直至《最耀眼》的出现，才有机会深入认识他们。记得当时收到C.Y.Kong邀请时，Dash也感到非常意外：“吓，佢傻㗎？Gary身边有好多人都系唱歌嘅，咁多人唔揾揾我？不过我第二个回复就系‘好呀，惊你呀？’但系我一听完之后就觉得好痴线，首歌嘅key（音调）太高啦。”
与其说Dash与HJT合唱，不如说是Dash以另一种方式参与其中：“我谂主要唔系揾我嚟唱，而系参与佢哋做出嚟嘅歌。我本来系弹Bass嘅，唔通我又再弹多条Bass落去咩？如果系咁，首歌就会太过重型。我谂起自己夹band嘅时候都会唱啲和音，最后我同C.Y.讲，如果我唱唔到𠮶个key都可以嘅，但系佢接唔接受我唱低八度先？佢ok，我就ok。”正因看中HJT的心意，Dash决定要完整保留最初的旋律及编曲。
至于Dash形容这次是HJT“在音乐上的众筹计划”，是因为在C.Y.Kong穿针引线下，Mr.结他手MJ（谭杰明）、黄丹仪、钟达茵（Pam）及其他公司同事都有参与其中。主音Joe直言在制作过程中感受到大家怀著相同理念，隔膜也随之消失：“例如我哋会倾Bass，我哋都会听Radiohead，其实讲得音乐都唔会有啲咩问题。”
监制C.Y.Kong身兼和音自愈
谈起那些小细节值得听众留意，Patten透露这次获C.Y.Kong开金口担任和音：“因为呢首歌本身个key高，如果只系得一把人声会显得个力量有啲薄，于是除咗Dash，仲有Pam姐帮我哋唱和音。但系我有一日收到电话，同我讲C.Y.会唱和音，‘吓？’呢位传奇级嘅监制，我哋都听过好多佢嘅歌，但系永远都唔会联想到佢嘅样、佢唱歌同讲嘢嘅声，但系今次佢就献出咗自己嘅歌声，为呢首歌加咗一阵力量。”说毕，Joe也想起陈奕迅《超人的主题曲》中，C.Y.也曾经唱过和音，此时Dash笑说：“其实唔需要再追究仲有咩歌有佢把声，你哋首歌有就够。我话你知，我哋啲歌都未有佢把声呀！”
及后Dash收回笑容，也忆起Gary离世后的一段低潮期，过程中也与C.Y.互相勉励：“Gary过身嘅时候我喺澳门，我崩溃、企返身嘅时候都系喺澳门。我记得自己崩溃紧嘅时候，我同C.Y.讲‘我唔想返香港，唔想去佢嘅火花，唔想再做呢行’𠮶阵系去到乜都唔想做嘅程度，佢好坦白咁同我讲，话佢当时冇崩溃嘅想法，佢系Gary一个几贴身嘅朋友，要好实质咁帮手处理唔同嘅问题，包括要照顾埋Gary太太，但系都有讲过自己会喺唔应该崩溃嘅时候崩溃。结果到火化𠮶日，佢行埋嚟同我讲，轮到佢啦。”在Dash眼中，C.Y.经历过崩溃和沉淀，到这次愿意献声，也是一种疗愈、重新振作的方法。
纪念Gary后反思人生散聚
在Patten心中，这首歌除了用作纪念Gary，也正好反思著人生中出现过的各种散与聚。他坦言：“我都几经常喺呢啲关口出现，屋企人有事，经历过接近生离死别嘅时候，其实呢首歌写嚟都系叫自己要保持正面。有好多年自己都会谂埋一边，成日怨点解呢件事会发生喺我身上，但系呢啲嘢都系会令我成长，会谂点样用一个更好嘅方法应对呢件事。慢慢延伸出去，如果成个大环境气氛好啲，我哋都会开心啲。”
Joe认为自己性格乐观，思想上会保持正面，经历过Gary离世后也很快学懂如何处理情绪：“发生咗呢啲事，第一时间你都唔会开心得去边，𠮶种情绪一定会嚟，但系我会觉得呢啲情绪系有用，对你嚟讲都系健康，唔可以特登扮冇嘢。不过喺呢个过程中都要谂通，发生咗嘅都发生咗，但系未来都系光明，真系要有呢个谂法。”
而脸带笑容的鼓手Sam，原来在面对分离时会有负面想法，又笑说：“我怀疑笑住讲唔开心系一个病。”他坦言遇到与朋友、亲友离别时，自己会钻牛角尖：“近年气氛好差，开始会有好多朋友离去，其实喺唐生走之前，我一直都觉得离别系伤感，会揾返之前嘅相，怪责自己以前做漏或者做得唔好嘅嘢。不过唐生走咗嘅时候又冇呢个谂法，可能佢本身份人都好正面，留低畀人嘅感觉就系成日都笑，呢啲就系我要喺唐生身上学习嘅嘢。”过去甚少在访问中表达意见的Sam，话毕后也得到Patten和Joe拍手鼓励：“呢次系咁多年访问之中，佢讲嘢讲得最多嘅一次！”
Dash也谈起近年的移民潮，面对社会环境的低气压，他开始调整自己人生观：“大家成日讲‘修身齐家治国平天下’，但系一个地方入面有几多个人要‘治国平天下’呢？做好咗‘修身’同‘齐家’先啦，将复杂嘅问题简单化先。”他也想到Gary的家人绝对会比自己更伤心，于是提醒自己尽快振作，尽力帮助家人：“例如佢太太有需要帮手，咁就出嚟帮手，搬嘢、执嘢都好，甚至有朋友同佢食饭、踩单车，呢啲就系我哋要做嘅嘢。离开咗嘅人本身都有佢哋好锡嘅人，我哋可以嘅话就帮离开咗嘅人关心、照顾佢哋，呢个都系治疗自己伤痛嘅方法。”