【专访】RubberBand红馆骚讲散聚 泥鯭否认解散：好想留喺香港
最近疫情渐有改善下，不同歌手都开始筹备及举办公开演出，继上个星期的林二汶后，今日（2/4）起RubberBand亦将在红馆举行一连四场《RubberBand Ciao 2021》音乐会，在政策最新安排下，座位亦可进一步加开至75%。这次演唱会的名字“Ciao”是意大利文，既解作“你好”，又有“再见”的意思，正是希望带出面对离别时，要坚信与对方以后有缘再聚。
当提及到Ciao中“散”的意思，坊间就开始猜测，这支出道12年，在5年前离开寰亚唱片的独立乐队，如今会否抵不过疫情冲击而在演唱会宣布解散？在专访中，四子就先向乐迷大派定心丸，其中鼓手泥鯭（黎万宏）就指：“好明显唔系啦，只不过系依家呢个大环境，令我哋觉得呢个题目系最有感觉，所以就用呢样嘢嚟做主题。”阔别9年，RubberBand再度返回红馆，既能找回过往与观众近距离互动时的喜悦与动力，亦总算能将制作《i》时小小的心愿实践。
撰文：刘传谦
摄影：陈顺祯
最想再同观众互动
上年12月，RubberBand以新专辑《i》为出发点，决定举行《！》网上音乐会，联同监制雷柏熹（Patrick）13人爵士大乐队，现场演绎专辑内9首作品。如今能在红馆舞台再次与观众见面，泥鯭直言当中最大分别在于观众：“其实表演者同观众之间嘅关系就好似打乒乓波，你打一板畀我，我就打返一板畀你，但系网上骚就好似对住墙打壁球，自己同自己打。有时候演出嘅情绪系观众畀返嚟，佢哋投入，自己就自然更加享受，系相辅相成嘅。观众一起嗌、拍手，其实都系一件事嚟，呢种模式对观众嚟讲都冇咗𠮶种享受。”
若然要感受观众气氛，何不仿效陈健安的网上演唱会，在大荧幕中投放一位位观众实时看表演的画面？主音6号（缪浩昌）坦言，当中大部份预算已经投放在乐手上，因此没有这个打算。与此同时，他希望透过疫情调整表演心态：“过往有现场演出，真系会好想同现场观众打成一片，同大家有好亲切嘅交流。但系依家就好似揸车，既然行唔到呢一条路，就要行另一条路。𠮶一刻就会专注搞好个网上音乐会，变咗同乐手交流，就当系一次经验。经历疫情就系咁，唔通冇观众都要好似以前咁，叫人畀反应咩？出到嚟都知系假、尴尬，无谓做呢啲嘢啦！”
重提台湾巡唱失利：考验你够唔够成熟
当然，在疫情未蔓延前，RubberBand都曾经在表演时，遇到台下几乎没有观众的情况。6号和低音结他手阿伟（李兆伟）忆起5年前刚刚变成独立乐队时，RubberBand曾和另一乐队Blaster前往台湾举行巡唱，经历第一站因台风取消后，他们就移师高雄举行第二站，不过台下只有8人，而且全部都是来自香港的粉丝，令他们备受打击。他坦言当时准备不足，其后亦学懂修正心态：“去到𠮶度，人哋真系唔会知你系乜水。当下有一刻自省，条路系唔容易，但系咪得8个人就唔唱？你都要审视返自己系一队点嘅乐队，更加要好谦卑咁去做音乐。咁样讲好似讲紧宗教，但系真嘅，你要睇到自己好大嘅话，你又点接受当刻得8个人？”
泥鯭再说，5年前与现在同样经历台下没有观众的表演，但心态上却截然不同，无法比较：“之前系你觉得会有好多观众，最后原来系冇观众，呢个就考验你够唔够成熟同埋识唔识点处理。但系依家你系预知自己有可能变咗冇观众，例如网上骚点会有观众？所以𠮶次去台湾，就系要你面对现实，你唔系明星，就算系明星，过去一个好陌生嘅地方表演，当然公司可以用任何资源令个场爆满，但系里面有几多嘢系真？系咪自己呃紧自己？我谂经历完𠮶次之后，个人会实在啲。”
否认坊间解散传闻
“Ciao”同时解作“你好”和“再见”，自然令人想起《i》中最后一首歌《练习说再见》。只是人生在不同阶段，都要经历与亲人、好友的离别，渐渐变得习惯说“再见”。6号经历过母亲离世，加上眼见港人纷纷选择移民，面对各种离别，他提议以“散聚”作为主题，又指今年以“Ciao”这个语带双关的词语作为演唱会名称最好不过：“所谓‘天下无不散之筵席’，好似我哋食完餐饭就要走，但系可能我哋已经约紧下一餐饭。”
访谈中，四子亦谈起坊间对RubberBand成员去留的问题。泥鯭指自己未有想过离开：“我哋4个喺香港组乐队，去到外国，我哋又可以做乜？如果继续要做RubberBand，就要继续留喺香港。坦白讲，我哋成员之间都有谂过去留，都有唔同嘅考虑，例如家庭岗位上，社会大环境的考虑。对我嚟讲，我仲好想留喺香港。当然，RubberBand能唔能够继续，就要睇大家系咪继续支持，或者我哋会唔会喺其他领域有另外一啲任务，但系我谂我哋都会继续做落去。”阿伟坦言，自己曾经考虑是否离开，目前仍选择留在香港，与大家一起做音乐：“最主要系谂家庭、将来，你要思考呢度将来会变做一个点嘅地方。”
6号谈起之前与太太Tim Lui曾经讨论过，目前决定留在香港，最主要仍是考虑家庭因素：“如果话冇谂过离开都系呃你嘅，但系呢一刻要照顾父亲，因为都年老，如果要走都唔会……系有啲同屋企人嘅承诺，所以唔会走。”在访问中一直保持沉默的结他手阿正（冯庭正）就简短地说：“暂时唔会走，暂时冇任何考虑。”
9个月冇工开照做歌：有危就有机
所谓“有危就有机”，在疫情下，音乐人更专注创作，令上年的派台歌数目不跌反升。6号以卧薪尝胆形容这段日子，认为社会停顿下，现场演出机会少，但自己能埋头苦干做歌：“虽然少咗演出，但系同时都少咗时间搞其他嘢，例如宣传、影相、杂志（访问）、代言等等，可能有啲用心嘅音乐人澎湃咁出歌。其实系有供有求，听歌嘅人的确系有一啲进化，眼界阔咗，耳仔听多咗嘢，变相多咗人听新晋嘅音乐单位。同埋有啲本身经验多啲嘅，今年都会睇定啲先去做歌，让出多啲嘅舞台畀新晋嘅单位。上年叱咤颁奖礼之后，我同队友都讲，我哋好似慢慢变咗系中生代，可以话系中坑。”
对RubberBand及其他歌手而言，最重要的还是现场演出。泥鯭坦言，RubberBand曾经有9个月没有任何工作，他觉得过程中最艰难的是毫无演出机会：“我谂对于所有做音乐嘅人，无论你喺录音室做咗几多音乐都好，最终都系想有现场演出嘅机会，冇现场演出，就等于酒吧攞到酒牌，但系冇得卖酒一样。”过去经历无收入的日子，阿伟形容是各自修行的时候：“生活系辛苦啲，但系唔会用挨嚟形容。始终生活都系要过，所谓难挨可能都系指金钱上，其实有好多嘢可以做，例如喺屋企创作，同埋畀自己思考创作嘅方向。”
后记
或许很多人都会发现，阿正在这次访问中几乎默不作声，其实在访谈前后，他都拿起纸笔，在五线谱上记下灵感。相信阿正忙于筹备的，正是为演唱会创作的新歌《Ciao》。虽然四子因密集式排练，赶不及把新歌录起，但他们日前在社交平台公开在彩排室练习的版本，在演唱会前，大家不妨先将新歌听熟，再到红馆一起大合唱！