何哲图否认星梦喺《劲歌》独大：有好多唔同唱片公司嘅歌手攞奖
上月TVB宣布曾志伟回巢担任副总经理兼行政委员会特别顾问，全面负责综艺及资讯娱乐节目板块。今天（5日）有传媒报道，有传曾志伟将招揽资深电视人何丽全回归整顿《劲歌金曲》，改善近年总选由星梦帮垄断的情况。星梦娱乐行政总裁何哲图（Herman）接受《香港01》查询时指：“我都系睇报道先知，唔知佢系咪真系会返嚟。关于《劲歌》上面嘅改革，我就交畀志伟同Sandy（余咏珊）再倾。”及后记者再问起有关《劲歌》公信力、与四大唱片公司关系、及友台ViuTV举行乐坛颁奖礼等，Herman亦逐一回应。
近年《劲歌》总选的大奖几乎都由星梦歌手独揽，因而一直备受网民评击，直斥公信力欠奉。Herman否认“星梦独大”指控：“就算系依家，我都开放畀其他唱片公司参加，刚刚过去嘅总选系有好多唔同唱片公司嘅歌手攞奖，就算系独立歌手，冇公司嘅，我哋都会畀鼓励，因为当中都有好多出色嘅歌手。（除咗英皇，其他大唱片公司都冇奖？）咁莫文蔚都系Sony嘅，我都专诚请佢返嚟唱歌。（有特别招数邀请？）唔系，我都有出去同其他唱片公司嘅人打下交道嘅。”
至于公信力问题，Herman认为奖项具公信力：“我哋有做啲民意调查，知道系好多人都认同呢首歌，我哋先会颁奖。我觉得啲奖喺民间嘅认受性大，我真心希望可以畀到鼓励一啲歌手，而唔系埋没咗佢哋过去一年嘅努力，你留意下睇网上平台，星梦嘅歌真系有好多人听紧。（但系好多人都话冇公信力？）我谂每个人都对奖项嘅接受程度唔同，可能佢哋对其他颁奖礼嘅接受度多啲。”他解释，过往的“劲歌金曲比赛合约”制度在数年前已经废除，原则上一直欢迎所有唱片公司歌手竞逐奖项：“我都有同其他公司倾，不过有啲公司话派歌手上嚟宣传就OK，但系就唔想入榜、参选。”
被问到相关改革会否与友台ViuTV在年中举行颁奖礼有关，Herman直指：“都唔关事嘅，每个台嘅候选准则都唔同，冇得咁样比。例如我哋会睇（歌曲）喺新媒体嘅反应，亦都有投票机制，等我哋可以睇到街外人嘅选择，知道佢哋钟意边啲歌、边啲歌手。”