【张敬轩演唱会】讲遮遮掌声四起　轩仔感无奈：唱得咁辛苦为乜？

《张敬轩╳香港中乐团盛乐演唱会》昨晚（24/11）顺利举行第二场，冯允谦、 郑欣宜、Dear Jane、汤怡、李靖筠、陈家乐、容祖儿妈妈等也有到场支持。昨晚的服饰与头场有点不同，轩仔于第四部份，换了一件黑色新西装，前后都隐若透明，非常性感，出场已引来观众哗哗声叫靓仔。舞台上他对观众笑说：“成晚背脊系有啲凉浸浸！”轩仔又叫观众为他影相留念：“正所谓衬青春留倩影，帮我影几张靓相！”引得大家嘻哈大笑。

轩仔昨晚再度化身早餐KOL，原来能驾驭这件新西装，家中“遮遮”功不可没：“呢一个咁嘅背脊，一粒疮都冇，就系日日食白粥同面包食返嚟！我直情开始食到有啲妊娠纹添！”观众掌声笑声如雷，轩仔又无奈叹谓：“今晚有好多歌手朋友喺度，你话我哋唱得咁辛苦为乜吖？‘遮遮’嘅掌声仲过我！不过‘遮遮’的确系好紧要嘅。”

谈到这位“遮遮”的身世，轩仔指她在台湾工作已有20年，懂得说80%的国语，本来一心想她照顾来港一同生活的父母：“我爸爸妈妈一句英文都唔识讲，有同事叫Vincent，佢哋就叫人瘟神，所以谂住请个识国语姐姐照顾。广州屋企啲狗仔，最老𠮶只都走咗，爸爸妈妈终于唔使顾住猫猫狗狗，可以嚟香港团聚，但系就遇上疫情。我都冇返过去，因为爸爸妈妈住𠮶个区都有几单确诊，我哋已经十一个月冇见面，咁大个仔都未试过。”

轩仔坦言过去一年正经历人生低潮，不单同父母分隔，还要面对家庭三位亲人离世，家中哥基犬生病确诊渐冻症，工作过程中也受到不少考验：“好多时唔知自己有冇工开，自己喺音乐道路上何去何从等等。其实你哋喺生活当中经历到嘅，我都有。 我喺演唱会开之前收到一个网友留言，有位歌迷旧年买咗飞，因为今年离开咗而嚟唔到。我唔知佢嘅朋友或者家人今晚有冇嚟到，希望佢喺天之灵都听得到我哋今晚嘅歌声。”他更坦言演唱会开始前，自己尚未确定能否如常举行，在头场举行前一星期已经草拟好演唱会取消通告。

他又指自己不习惯在社交媒体报忧，因此开始将每日的早餐向歌迷分享：“我唔可以一直俾情绪干扰自己，唔可以每日张开眼睛，只系带住伤痛，所以我开始将每日嘅早餐post上网。开头系冇咩特别意思，只系分享下畀大家知，所谓一个知名歌手嘅早餐，分分钟唔够你个早餐咁好，其实系开下玩笑。但系后来好多朋友留言，今日做嘢唔开心，但系睇完我个Post就好咗好多。生活系咁样，当命运、时势唔够好，就要自己揾一些快乐，揾一啲满足感畀自己，慢慢，你就会发现身边其实拥有好多爱，同时你亦可以令身边人感受到爱，咁样我地先可以为社会带来改变。你哋多谢我啲早餐post，我反而好荣幸可以通过我嘅不幸为大家带来咁多娱乐。只要大家开心，我就开心㗎啦。”语毕获得全场掌声。