专访｜Mike Orange搞《叹息桥》演奏会：试下做冇乜机会出现嘅事
在第三波疫情受控下，表演场地有限度开放观众入场，而Mike Orange原定于7月末举行的“《叹息桥》原声大碟演奏会”，亦在10月16-17日举行。他看到观众开始讨论《叹息桥》配乐时，打算制作剧集原声大碟，后来在汤骏业鼓励下，才萌生举办演奏会的念头：“佢听完之后话好好听，‘你一定要做啲嘢’。我开始谂究竟仲有咩可以做，因为坊间唔系有太多类似《叹息桥》咁破格嘅剧集，佢系一个好好嘅机会畀我试一啲嘢，我就胆粗粗，试下做一个冇乜机会出现嘅事。”
撰文：刘传谦
采访：游大东
摄影：梁碧玲
今次演奏会没有安排岑宁儿和黄靖分别演唱剧集主题曲《困局》和《Yours Truly》，只有乐队演奏，Mike解释：“既然讲到系演奏会，我好想透过音符讲故事。如果要听有人唱嘅版本，其实喺各大串流平台都听到，或者佢哋喺日后嘅演唱会都会玩；但系今次将佢当系一首作品去演奏嘅时候，佢系可以有条件冇人声喺度。”
音乐主导 林保怡：未睇过套剧都可以听咗先！
Mike亦指，今次演奏会舞台设计从简，务求听众欣赏时不受画面限制：“当冇画面嘅时候，可能会少咗一份导向，会有更多唔知道嘅想像出现，呢个演奏会好希望可以继续延伸。音乐系由《叹息桥》诞生，依家攞住呢啲音乐去开演奏会，可能会将观众引伸去另一个世界，令《叹息桥》愈来愈阔、愈来愈广。”
《叹息桥》监制林保怡（Bowie）亦认同Mike的想法，他说：“纯粹听音乐会令你嘅幻想空间更加大，如果有朋友仲未睇过《叹息桥》都唔紧要，你可以听咗啲音乐先。有咗画面反而会局限咗，只系会联想到𠮶个画面；但系如果你冇呢个画面，你净系听𠮶段音乐，（幻想）空间会更加大，我好钟意将创作空间同思想畀大家去谂无限大嘅嘢。”
Mike边睇剧边作歌：谂嘅过程可以更加透彻
Mike本业并非创作影、视配乐，在为《叹息桥》作曲过程中，他直言没有参考任何方程式，虽然会感到有点不安，但同时感到创作自由度大：“我一开始睇剧本嘅时候，发现有好多错综复杂嘅嘢，例如同一个场景会出现几次，但系佢哋出自唔同角色嘅视点。我觉得呢个系套剧一个好独特嘅嘢，我唔可以三个场景都放同一个音乐，唔系就会冇意思。”
Bowie亦指，过程中导演团队一直给予Mike最大自由度：“我同另外两位导演（肥波、二五）讲，每一个范畴都尽量畀自由度佢哋，千祈唔好同Mike讲：‘如果有一首歌好似某套电视剧咁就好啦’，我哋完全唔会做呢啲事，佢钟意点就点。”
在创作时，Mike会边看剧本边写笔记，继而循不同方向配乐，甚至决定该情节是否需要音乐。由于Mike在创作期间并非从剧组一次过收到所有剪接好的集数，因此在创作过程中，当了解较后集数的剧情时，他经常地重作已完成的集数。他解释：“我唔系一个全知者，而系以一个半知者，半观众嘅状态完成，呢个部分其实好好玩，喺谂嘅过程可以更加透彻，因为你可以返转头。”
Mike在创作一首配乐时，除了希望强化该场节所带出的情绪，有时候会从角色当下心态出发，当中采用的音乐往往令人意想不到。例如其中一幕要交代Ken（陈奂仁饰）离家出走时，背景音乐却令人感到畅快，Mike解释这个安排是别有用心：“我唔系要同佢作对，但系我真系觉得佢心入面一直都有想离开嘅状态，因为屋企入面妈咪咁对佢。”Bowie亦指：“我觉得当时Ken系好开心，佢会觉得好爽，终于都可以离开啦！”
Mike坦言，制作一首配乐所用的时间，要视乎自己创作时的状态，其中最有感觉，耗时最短的，就是备受观众讨论、道尽Thomas（林保怡饰）和Sammy（周家怡饰）心声的插曲《Yours Truly》。他说：“本身剧情上都令我泪涌，但系我睇𠮶一幕嘅时候系有音乐，可能佢哋放咗啲歌播，我就要mute咗佢，再谂究竟佢哋播紧咩。𠮶首因为太有感觉啦，大约15分钟就已经写好咗。”Bowie亦对《Yours Truly》第一次出现，即Thomas（陈健朗饰）在比利时着Sammy（谈善言饰）扭大收音机的一幕非常深刻：“睇咗好多次都会好感动，我都系，虽然我系喺现场拍，亦都要教佢哋做，但系每次去到𠮶幕，我都真系会泪涌。”
点击图辑睇Mike Orange最喜欢几段配乐嘅剧情：
《彩虹桥》放片尾有原因：令大家轻松返啲
至于Mike耗时最长完成的是主题曲《困局》，他解释：“首先主题曲系我同岑宁儿合写，各自负责两段，写完之后就由我去编，而编时候真系觉得好难，因为《Yours Truly》只系描绘紧𠮶场戏，但系《困局》描绘嘅系成套戏，必须要谂得更加透彻。”至于片尾曲《彩虹桥》，Mike坦言希望透过这段纯音乐，帮助自己返回现实世界：“其实我好多时睇到某啲情节都会好郁结，瞓唔到，我一路做，过程中要睇好多次，但系我太代入套戏啦，所以需要一首歌，希望可以回复返大家嘅情绪，令大家轻松返啲。”
点击图辑，重温《叹息桥》精彩画面：
Bowie承诺出原声黑胶碟：蚀都唔紧要
目前《叹息桥》原声大碟只有数码版，乐迷可透过音乐串流平台收听，Bowie承诺将会为大碟推出黑胶唱片：“二五同我倾完之后，我即刻话支持，可能会蚀，但系都唔紧要，我觉得系应该要做嘅，依家已经冇人会做Soundtrack嘅黑胶碟啦。（唔出CD？）唔会啦，黑胶靓好多，只碟有12吋，里面多嘢好多。可能系限定会推出咁多只，手快有，手慢都有。”
Bowie坦言，当初想更进一步，将《叹息桥》搬到舞台上：“其实可以再搞大佢，有更加多嘢畀观众睇，会唔会变成一套舞台剧呢？不过呢样嘢就要慢慢铺，依家先由Mike做咗个演奏会先，等其他人现场感受下，净系听住《叹息桥》嘅音乐会系点呢？”