【我不怕唱歌】《幕后玩家》靓声巨肺 坤哥：唱得好smooth!
《我不怕唱歌》第三集，今次请来一位《幕后玩家》的女艺员，同主角黄宗泽、萧正楠、张继聪都有对手戏；她19岁参选港姐，同期有陈茵媺、吕慧仪等；荷兰出世，只身来港参选，代表作是《爱．回家》，剧中虽然是配角，但当时被主角更抢镜，唱歌对她来说不止是一技傍身，更是一个治愈过程，试过抑郁、自闭，全靠音乐令她康复。
她就是阮儿Chole，选择唱Alicia Keys的〈If I ain't got you〉和容祖儿版〈月半小夜曲〉，两首难度颇高的歌，阮儿能够应付自如，全因下过不少苦功，她说：“我初时唔系太钟意唱歌，因为我唔识，但做一个艺员，唔系成日有工开，除非你好红，否则有时会好不安，有时会唔开心，好容易会情绪低落，音乐可以令你治愈，令妳心情放松，我跟咗老师学唱歌两年，过程系非常辛苦，把声会烂，会经过唔同阶段，初时去开声，好辛苦，成日要伸条脷出嚟，令你成身汗，有啲人会晕，甚至有人会呕。”
阮儿因为情绪低落而学唱歌，原因是2010至2012年期间遇到事业上一个挫折，她说：“06年选完港姐入无线，由训练班读起，冇谂咁多，有得玩就得。由荷兰返嚟，觉得大城市好过瘾，之后做多几年，当时会谂，点解啲机会又冇我份呢？身边又有好多声音叫我出去揾突破，其实当时应该系觉得自己得，但其实系未得嘅，如果从新拣过，我未必离开无线。之后Join咗女子组合Lacee Lacey，我哋几个女仔，好畀心机，为咗只舞练一字马，大家帮大家拉筋，结果我哋3个月内全部做到，但最后公司结业，我哋一只碟都未出过就解散咗，𠮶阵令我心情好低落，返咗荷兰，好自闭又有少少抑郁，成个星期唔出街，又唔系好食嘢，𠮶阵只系不停弹琴。”
2014年阮儿回到TVB，今次她比之前更用心做戏，她做演员从没有想过要大红大紫，只求有一个角色令观众记得，她说：“好渴求一个大家记得嘅角色，人哋喺条街记得妳个名，或者讲得出妳个角色名，我谂每个演员都好想有呢个认同。”被认同的角色，那年阮儿终于等到，她经过5次casting，最后在《爱．回家》饰演Pinky一角，当时有不少网友留言称赞，她说：“其实当时剧集出街，我系好惊，我惊俾人话‘哗！呢个边个嚟㗎？咁核突嘅？’或者‘呢个咩演员嚟㗎？唔识㖞?’好惊有呢啲负面嘅批评，头两集我直头唔敢睇，但之后收到好多message，初时家人唔系好支持，觉得我应该读番书再揾份工做，但𠮶次佢哋都好支持我，我亦记得有次出街，有人好开心指住我！Pinky呀，亦有小朋友走嚟话想同Pinky姐姐合照，我真系好开心。”
《爱．回家》的Pinky是阮儿的一个事业高峰，但之后星途又回复平稳，阮儿没有觉得气馁，反而积极等机会，希望稳坐二线，她说：“好多人都谂梗系越做越上啦，但其实呢个系team work，主角好辛苦㗎，日日06开工，第日30(翌日06)收工，其实好辛苦，你俾我做，我都未必ready，你俾我做2，3线演员已经好好喇，因为有得畀你enjoy拍戏，我冇咩大志…哈哈，依家我系开心㗎，角色又唔系冇嘢讲冇嘢做，所以等待都系一件好事。”