【专访】冯允谦隔四年出碟　曾对事业感绝望：写咗成堆歌唔知为乜

出道自《超级巨声3》，作为歌唱比赛亚军的Jay Fung冯允谦，曾一度被认定为香港的Jason Mraz，比赛过后，正当人人也认定他会签约TVB，Jay却转投英皇娱乐，成为一位全职歌手，当中更不乏冠军派台作及乐坛奖项，最后却在2016年急流勇退。去年签约寰亚唱片重新出发，一年间推出5首派台作品，更于今年头推出个人专辑《Detour》，或许就如专辑命题般，Jay的人生兜了一个小圈再回来，总算是确立了自己对歌手身份的肯定，同时对人生规划有了不同打算，他道：“Eason(陈奕迅)嘅《陀飞轮》改变咗我，我都开始考虑结婚。”摄影：叶志明场地：香港观塘帝盛酒店Makeup : Maggie Lee

专辑的第一派台作《声音导航》里有这样一句歌词：“是否太多想法未确定　或者担子很重未适应　要在明日置身甚么天地　不知究竟。”早几年经历一段“音乐真空期”，冯允谦坦言是因为对前景感灰心：“过去两年工作少咗，令自己有啲迷失。每当有朋友问我工作状况，我都唔知点答，所以我当时好怕去倾呢啲问题。”工作量减少，导致Jay连自己最喜爱的音乐也一度打算放弃：“喺旧公司嘅时候，我试过畀二十几首Demo出嚟，不过可能因为我净系识得用木结他自弹自唱，冇真正去接触编曲，结果公司觉得我首首Demo都好似，好难推出市场，连我都慢慢失去咗信心。”

离开旧公司后，Jay反而认真思考学习编曲，同时肯定了自己对音乐的热诚：“女友同我细佬一直都好支持我做音乐，即使冇钱都好，自己贴钱出嚟做都冇所谓。后来出咗一首叫《Preciously Mine》嘅英文歌，自己揾Sponsor、自己贴钱，但满足感好高。”后来这首作品更成为了“903豁达推介”及“RTHK环球榜”的第一位。

近四年时间没出碟，冯允谦形容自己一段时间别人在上班、他便在学编曲，写下来的作品根本也不知道为了什么，到底有没有机会再出碟出歌，全是未知之数。迷失之际，他决定一有机会便跟女友一起穷游：“有时佢出trip工干，我就跟埋佢去，share佢间酒店房就悭一笔。去到唔同地方我又尝试感受一下当地文化，认识一下唔同嘅朋友。每次出trip我都会带住支结他，累积写起一批歌，足足三十几首。”Jay表示就是这三十几首歌令他终于有机会再签公司，最后更从中选择了五首放入《Detour》。冯允谦又笑言：“签新公司之后学咗好多嘢，亦发现之前嘅歌手生涯唔顺利，系因为好多嘢未学识，例如广东话系好重要嘅一环，以前我做访问会讲得唔够多、唔够好，啲记者朋友都会觉得我好搞笑。”

因为旅游的经历，令冯允谦推出《Detour》也是以此以主题，更加改变了他对人生的某些看法：“曾经一段时间因为工作时间嘅关系，令到我同女友嘅距离远咗，甚至分开过一段时间。后来开始同佢穷游嘅过程当中，反而双方了解咗更多。”Jay又分享一次旅游经历如何改变他的婚姻观：“有一次去马来西亚嘅神山，认识咗一位驼夫一齐上山。佢系一个有老婆仔女嘅人，每日工作上上落落都好辛苦，揾嘅钱亦唔算多。但佢个人好开心，同屋企人关系好好，即使物质生活唔丰富，但心灵好富足。后来我又听Eason嘅《陀飞轮》，开始反思到底咩叫快乐呢？系咪买好多嘢就好快乐？”慢慢地，冯允谦产生了想结婚的心态：“以前都觉得自己要好成功，揾到钱买楼买车先可以结婚。但而家人大咗会觉得，到底自己另一半系咪追求呢啲嘢？”

就如《山旮旯》的歌词所述“明明好想去 怎可以再等　山旮旯 多关卡 也与你同行　等一等我怕 长城会崩”一生人也在等适合的时间才结婚，但到底什么才为之适合时机？冯允谦反问自己：“如果我一世都等唔到呢个时机呢？如果我一世都唔揾到钱、一世都行衰运，咁我系咪就唔继续自己嘅人生？当然我都希望最理想可以有能力令另一半结婚之后唔洗工作，但如果真系做唔到，但我已经拣啱呢个女仔嘅时候，我都好希望可以同佢走完下半世。因为我同佢唔系讲求物质生活，最重要系对方嘅陪伴。”

冯允谦又想像自己的婚礼：“其实我个人好简单，可能好多女仔唔钟意听到男朋友讲婚礼要简单，因为佢哋会觉得简单就系hea，但我真系好想讲简单唔系hea，简单系简单。而我自己希望婚礼可以低调啲，同屋企人、好朋友一齐飞去夏威夷行礼，有个简单嘅聚会。”不过Jay亦坦言女友比较希望回加拿大举办一个热闹婚礼。