【专访】入行十年曾为歌手定位担忧　邓小巧：怕大家觉得我系演员

出道十年，跟当年不少因《超级巨声》而入行的歌手一样，邓小巧不知不觉也成为了香港乐坛的中流砥柱，早前推出第四张个人专辑《Obsessions》，直视内在欲望及需求。十年时光，由歌唱比赛出道到TVB生涯，继而又完成了自己的梦想，拥有自己的专辑及个人演唱会，到底邓小巧又有否直视过自己内心的想法，了解自己真正的欲望？摄影：梁碧玲

一切从十年前讲起

要讲邓小巧内心的想法，必需要从十年前讲起。2009年参加《超级巨声》，当年的小巧想法单纯：“参加比赛嘅初衷就系想企上台唱歌，一直以来我对歌手嘅认识，就系要喺台上面唱歌。但当然入行之后先明白，原来做歌手根本就唔止净系要唱歌，当刻就好似被掴一巴。”如果说《超级巨声》是邓小巧的起步点，那么大概这个起步点连入场门槛也说不上：“其实要企上台唱歌，之前要做好多嘢。不论系你想做或唔想做嘅事、想见或唔想见嘅人，你都要去做，我谂其实同每一份工都差唔多。”

最初单纯希望站台唱歌，小巧坦言参赛时已发现跟想像落差：“有一段时间我唔敢讲自己系歌手，我只会话自己系参赛者。因为即使企喺台上唱歌，都唔代表你系一个歌手，如果我冇自己作品、自己嘅音乐，凭咩叫自己做一个歌手？”小巧形容自己当年“年少无知”，以为自己打入比赛便是歌手，最后参赛经历才令她真正发现自己与梦想距离有多远：“喺比赛后期，自己会慢慢发现，佢系一个比赛，但亦系一个娱乐人嘅节目。我只系芸芸参赛者当中有份参与电视制作，但回归当时真正嘅问题，如果邓小巧想做歌手，到底我想做一个点嘅歌手？”

参赛后，小巧发现自己面对的问题太多：“又未完约、又冇人揾我出歌，咁可以做咩呢？”后来太多问题未能理顺，小巧花了一个月时间离开香港，到台湾打工换宿，在民宿拆被单打扫，闲时又可以跟猫玩。就这样在一个月后回到了香港，她说：“其实去完成个旅程返嚟都冇谂通啲乜，不过当刻自己需要一份勇气去做自己平时唔会做嘅事情，就系呢份勇气比到力量自己。”

入行至今推出了四张专辑，邓小巧的自我形象也不断改变，重温一下过往的专辑造型

正式出道前的不安

或许邓小巧是一个需要安全感的人，曾经一段时间在TVB工作，也推出过一首《半杯水》，不过她对当时的处境感到少许惶恐：“因为我认为自己嘅工作就系音乐，甚至觉得喺自己做到歌手前唔可以做其他嘢，否则人哋就会觉得我唔想做歌手，又或者已经习惯咗我电视演员嘅身份。反而当我正式拥有歌手身份之后，我会比较放心做其他工作，起码大家唔会误会我嘅事业。”

直至推出首张专辑《The Strength of Weakness》，小巧口中的安全感便开始体现：“始终有件实体揸喺手，可以好自豪咁同人讲自己出咗碟，终于有种作为歌手的自觉与安心。”不过身处乐坛，所谓安全感也往往跟成绩挂勾，但小巧的想法却有点不同：“我同好多歌手朋友都倾过，好多人都觉得处于人生成就高峰就有安全感，但实际上系相反。例如有啲歌手开完红馆，咁又点呢？你咪又系瞓紧屋企张床、第二日瞓醒咪又系要食饭，开红馆或者会令其他人觉得你处于成就高峰，但作为歌手本身，我哋要面对嘅唔单止系事业，亦系自己嘅人生。有时候饱满嘅感觉唔一定嚟自成就。”

完成首个唱却感失落

邓小巧近日完成首个个唱《My Healing Live 2019》，却坦言进入另一个迷失期，不过这个迷失期又跟以前经历过的不一样：“我系一个需要大家比机会同认同嘅人嚟，以前最初嘅迷失系因为觉得电视台并唔系一个孕育歌手嘅地方，可能我自己比较偏食，我喺音乐上需要好大嘅主导权。加上始终娱乐行业都系一门商业，可能当时电视台有其他更想投资嘅商品，所以令到我都进入一个好矛盾嘅状态，一边好想得到机会，另一边又知道自己唔属于呢个地方。”

后来一次机缘巧合之下，在backstage演出时遇上冯颖琪，这对音乐上的灵魂伴侣自此一拍即合，之后的故事大家也知道了。而近日小巧终于圆梦，举行首个个唱，但完成后亦是她另一个失落的开始：“其实完成咗会开始检视返，邓小巧喺呢十年到底做咗啲咩？开咗音乐会，出咗四只碟，但到底我嘅人生系想做啲咩？成就啲咩？下一首歌又应该系点？我到而家都冇一个好明确嘅答案，不过我觉得呢个系人生嘅特别之处，我哋会不停做一啲嘢然后又问一啲嘢，永远处于一个欲求不满嘅状态，然后又有动力去做更多事情。”

Makeup: Leo Tam@ Annie GHair: Wing Wong@ The AtticVenue: The Stadium