【容祖儿演唱会】八月举行廿周年红馆骚：Wyman帮我谂咗个好名！

入行廿周年，容祖儿今年八月将于红馆举行《PRETTY CRAZY 容祖儿演唱会》，早前祖儿就特别为演唱会宣传海报飞去东京，Crazy地在24小时内努力超额完成摄影，非常切合演唱会主题。

祖儿表示演唱会名字《PRETTY CRAZY》 是好友黄伟文为她定的：“个名真系起得好好，因为呢二十年来无论系工作上、不同经历上面，一路走来都真系PRETTY CRAZY嘅！ PRETTY CRAZY呢两个字，既可以代表到我哋对工作上面嘅疯狂，又可以代表到我哋一直努力追求嘅优雅，简简单单两个字形容左我呢二十年，Wyman真系劲。”

今次演唱会海报，系揾番祖儿初入行20岁第一次开红馆演唱会合作过的国际知名摄影师Leslie kee 纪嘉良合作，祖儿谓 : “呢个合作，又系有齐PRETTY CRAZY元素！其实系上年东京睇明哥(黄耀明)演唱会𠮶阵，突然谂起Leslie kee 纪嘉良，就即刻约左佢出来半小时，一个下午茶就定咗喺今年一月份影呢辑相。因为大家工作时间关系，我只系用咗一日飞去东京，24小时完成呢次海报。影咗好似超过12个钟，一落机就去影相，影完就上机走。所有衫呀，形像设计，都系Leslie kee 纪嘉良一手包办，佢细致到每套衫都要我换埋指甲衬色，真系未试过咁影法。但系完成作品，当然系very pretty啦，影咗好多套衫，多到返嚟香港，净系拣相都拣左好耐，张张都咁好，唔知点拣。最后经过公司所有同事投票，最终好开心拣咗我最钟意𠮶一张用先。之后大家重可能睇到好多唔同款海报。”

点击大图观看更多靓相

今次是二十周年纪念演唱会，祖儿话谂番起当初二十岁第一次系红馆的感觉真系好crazy，当时佢系唔相信会有人来睇自己演唱会，“咁二十年后今次，系我第十个红馆演唱会啦，crazy就交比歌迷同观众啦，我就负责pretty啦！话就话八月先系演唱会，但系我已经开始准备紧架啦，keep好自己身体啦，准备最佳状态，唱最好嘅歌，跳最正嘅舞比大家睇 ，我希望今次唔好咁瘦，因为累积多年经验，我发觉做演唱会最紧要系体力同健康，太瘦就冇营养又唔够抵抗力去战斗，所以keep fit 同调理身体系会同步进行，唔会比自己病。”

另外祖儿又话，“我发觉而家香港人真系一年闲闲地睇十个八个演唱会，所以今次我团队都会尽最大努力，去制作一个令大家一进场就觉得前所未有，同以往完全唔同嘅演唱会。目的系比大家睇到我呢二十年嘅进步。究竟会点搞？就暂时系秘密，等观众入场就会知道点PRETTY，点CRAZY！”

此外，为了纪念二十周年，祖儿今次也特别邀请了五代十国设计了一个代表这二十年的logo。logo里面以JY及20字样， 砌成了她最爱的郁金香，演唱会会推出一系列纪念品，都会有这个logo图案。