【01众乐迷】贺岁片你睇得多　边首喜剧主题曲你loop完又loop？

年初三赤口，通常大家都匿喺屋企唔拜年。不过难得放新年假期，又点可以错过机会同亲朋戚友相聚？一齐睇贺岁喜剧绝对系初三嘅活动好选择，深信大家每年都会翻煲各套经典贺岁电影，连台词都可以倒背如流，当中的代表歌曲大家又记得几多？送首贺岁电影歌畀佢哋，包保大家笑口常开，赤口都唔怕闹交！

《Only You》 - 罗家英

Only You~ Can take me 取西经~深信大家睇字都识唱。出自星爷电影《大话西游之仙履奇缘》，罗家英饰演的唐三藏所主唱。虽然歌词同演绎都相当惹笑，但其实谂深一刻亦相当窝心，若果你向住你嘅亲朋好友唱：“Only you能杀妖精鬼怪~Only you能保护我~”显出对方喺你心目中嘅重要性，又点会舍得同你闹交呢？

《相逢何必曾相识》闽南话版 - 周星驰

唔知由几时开始，每次唱《相逢何必曾相识》都会唔觉唔觉唱咗闽南话版。《家有囍事》最后一幕当中，星爷为咗帮阿哥黄百鸣氹返大嫂吴君如，特登唱咗呢首闽南话版嘅《相逢何必曾相识》，传唱度分分钟比蒋志光同韦绮珊主唱嘅原版有过之而无不及。如果新年激嬲人，唱返呢首歌实开心返！

《亲密关系》 - 郑秀文

每年年三十晚，电视都会播出星爷嘅《行运一条龙》应节。一边食汤圆一边睇电视，几乎已经成为香港人嘅集体传统。当中由郑秀文主唱嘅主题曲《亲密关系》每年点都要听返次，同身边人一齐听，关系好似又增添几分亲密。

《大胜无限番》 - 刘德华

新年除咗拜年、食年糕、逗利是之外，同亲友打返几圈当然亦系必做要事。而《呖咕呖咕新年财》更加是贺年电影中的经典，每次播著《呖咕呖咕新年财》打牌时，少不得要跟著刘华唱出其主题曲《大胜无限番》增加气势。

《打雀英雄传》 - 许冠杰

严格来说，其实《打雀英雄传》这首歌本身跟电影没什么大关系。不过歌名的确出自1981年王晶执导的电影《打雀英雄传》，而歌曲本身其实是许冠杰改编自1976年电影剧《射雕英雄传》当中的主题曲《谁是大英雄》，后来张学友也有翻唱此曲，并成为了电影《射雕英雄传之东成西就》的主题曲。六婶~三太公~歌词琅琅上口，难怪每次新年大家也会以此歌作开台暗号。