姜涛为演唱会节食一个苹果做晚餐　Anson Lo：佢一啖饭都唔肯食！

由ViuTV选秀节目《Good Night Show全民造星》12位参赛者组成的男团MIRROR，成员之一的姜涛、Anson Lo以及Ian今日齐齐出席商场圣诞活动，与粉丝一起玩游戏，吸引了数百名的粉丝与市民围观，粉丝的尖叫声不绝，震耳欲聋，其中当然是以姜涛最受欢迎啦。三人透露近日忙于为本月21日举行的MIRROR演唱会积极备战。Anson Lo说：“我哋日日都要排舞练歌练6至9个钟，一阵做完活动都要返去练。”Ian坦言：“我仲适应紧，之前比赛时都瞓好少，依家瞓好少已经开始习惯。”

姜涛笑言体质易肥：系用啲衫遮住咗咋！

姜涛就话比赛时更加辛苦：“𠮶时嘅压迫感好大，依家虽然都辛苦但系会更加Enjoy。”而原本是肥仔，现已好瘦的他，为了要在演唱会以最佳状态示人，竟然仲要节食keep fit。他说：“我个体质好易肥，其实我而家都肥㗎，只系用啲衫遮住咗咋。我要忍口唔食嘢先得，佢哋人人喺度食宵夜，我就喺度咬苹果，夜晚净系食一个苹果。早午餐都系食得好清淡，食饭盒净系食啲菜同少少𩠌，最多食几啖饭。”

至于天生瘦底唔长肉的Anson就完全不用戒口了，他说：“我想姜涛同我一齐食，畀啖饭佢食，叫佢食少少，佢一啖都唔肯食。”Ian亦曾经是肥仔，所以在饮食上都要有节制。问到他们在演唱会上会否骚下肌，三人即表示不会，Anson说：“我哋无呢个打算，无咩肌肉可以骚，骚肌呢方面就交畀Jeremy，佢系我哋嘅肌肉担当。”姜涛就话到时会有惊喜给大家。