张智霖练定十字步随时伴舞　共舞曾令薛家燕受伤入院变童年阴影

撰文： 洪晓璇
出版：更新：

今年系薛家燕入行60周年，佢正密罗紧鼓为12月举行嘅演唱会进行彩排，身为嘉宾之一嘅张智霖与家燕姐合唱大展歌喉，Chilam仲话拍剧时二人已经结缘，所以对方开骚点都力撑，仲会练定“十字步”以备不时之需：“我已经拉定筋架啦，随时准备好！不过我同家燕姐唱歌就好夹，但跳舞就真系唔多夹，记得上一次同佢拍剧个阵，因为跳一小段舞，搞到佢整亲要入医院，呢个成为我童年阴影。”

Chilam一见到家燕姐即刻要揽揽先。（影片截图）

家燕姐听到即刻笑到收唔到声，仲爆料指当年全靠Chilam急才，先避过急症室排长龙睇医生：“𠮶时跳舞整亲要去急症室，点知等好耐都冇医生睇我，Chilam冇啦啦攞份马经入黎问我买边只，我心谂依家咪搞我啦！原来佢就系想分散我注意力，静静鸡急Call跌打师傅黎，然后佢对护士话铁打师傅系我亚叔，当时我仲一头雾水唔知边个亚叔黎探病，铁打师傅几下手势就搞掂，原来系我软骨移位，我仲可以急急脚出院。”

Chilam笑言早已秘密练好十字步，预备演唱会上随时要表演。

演唱会彩排踏入最后阶段，家燕姐与乐队默契十足，不过因疲劳过度出现喉咙痛，吓得家燕姐急急揾医生保护声带：“我好乖依时食药，依家就冇咩事，不过唔可以讲太多野，要小心食野先得。”

另一位嘉宾谢天华赞嘉燕姐清减咗，仲笑言要建议造型师改晒做橡筋裤头以策安全。