BOYZ演唱会门票黄牛价炒高4倍　关智斌张致恒：之后仲有机会﹗

香港地咩都要炒，炒楼炒车位炒月饼，演唱会黄牛更加系无处不在，不时喺Facebook群组见到写明“非原价”发售帖，至于实际几钱就要问过先知。BOYZ嘅关智斌同张致恒相隔多年再合体，首次举行售票演唱会，一开售即刻秒杀。

见到反应咁理想，成为黄牛党目标好似无可避免嘅事，连日来都见到唔少求票同售票POST，卖飞嘅写明“非原价”都有好多人查询，但到底系几钱呢？呢日见到有网友POST左段同卖家嘅对话，上面写住：“Boyz演唱会 S2-5 2连位 $4800，有兴趣吗？”

$4800两张﹗BOYZ演唱会最贵都系$580，即系足足炒贵4倍㖞﹗睇返座位表S2-5仲要唔系头几行，会唔会过份咗啲呀。出帖嘅网友都话：“几百蚊一张飞，炒到2000几一张，虽然我好想睇，但我都吾会用几千蚊去帮你买啰炒家﹗”获大批网友纷纷和应。

正在努力为演唱会彩排嘅BOYZ，接受《香港01》访问时，知道炒卖情况都表示相当震惊，佢地话：“BOYZ绝对唔鼓吹任何炒卖演唱会门券行为，亦都呼吁大家唔好买黄牛。我哋依家好努力练习，希望做好16号个show、可以带到一个开心、难忘嘅回忆俾大家。今次买唔到飞入场嘅朋友，唔好失望，只要有你哋嘅支持，之后仲可以有机会喺台上为大家表演。”