【农夫‧专访】人生苦多过甘？　C君：大家生活到而家已经好犀利

十八年，对大部份音乐人尤其是组合来说，这个年数已算是长寿，香港曾有不少组合因种种原因而拆伙再重组，也有不少歌手淡然离场。组合能做到十八岁，的确是运气和人气的加持。正好今年农夫踏入他们的十八周年，为了庆祝“生日”，11月将再次于麦花臣举行《十八岁生日快乐演唱会》。
一路走来，农夫由道出人生哲理的音乐作品，再到人见人爱的主持工作，他们总是带著笑容，但到底在欢乐的背后，农夫又是经历过如何的心境，才能写出影响一代人的作品？
摄影：叶志明
Hair：Renton Hung@La Chioma
Makeup：Manyee Lau

作品特别多愁善感？　陆永：生活咁困难大家都过到，其实好犀利

每次示人也是嘻皮笑脸，自从农夫出现在电视萤幕上，欢乐仿似变成了他们的代名词。但早在他们成为电视节目主持前，农夫不少音乐作品也带著点点的苦涩味，《粒粒皆辛苦》、《我的志愿》、《重新找到你》，戳中不少星斗市民的心声。用歌曲讲述各阶层的人生，大概你会发现作为歌手的农夫和在电视上的农夫相距甚远，到底他们是如何看待“人生”？难道就如歌词所述，“做咗几十年人好似苦多过甘”？

陆永首先答道：“其实有好多歌都唔系想讲人生好辛苦，做人好惨。我哋最想讲，每人都经历咁多事情，好似挨得好辛苦，但到而家仍然可以生存得咁好，其实每一个人都好犀利。”C君续答：“可能大家觉得我哋有好多作品都系多愁善感，其实最尾每首歌都系想传达同一个讯息，你能够生活到今时今日已经好劲。因为大家每一日嘅生活都真系好多难题、好多现实考虑，或者心情上嘅问题，但仍然渡过到㖞。”

贫穷反而唔难挨　C君：因为当时大家都对我哋冇期望

就如字面所写，农夫，总是辛勤的代表，正当大家每日重重复覆起身、工作、下班、吃饭、睡觉，仿似把生活画下了时刻表，不要以为他们作为艺人便过得比大家轻松。近日为宣传演唱会，其实他们也一样同一个钟数又上班，8点便起身开始宣传做访问，回想起自己贫穷的年代，好像还过得轻松一点，C君笑说：“贫穷嘅年代系无乜压力，因为𠮶时无咩做，大家又唔会对你有期望，而家谂返起当时如果有多少少钱，其实都几逍遥。当然而家大家嘅期望，会变成既是压力又是动力。例如我哋今年开骚，有人提议我哋做上年𠮶个骚嘅Part 2，但我哋接受唔到。我哋唔识得改少少又攞返出嚟做，要做咪度一个全新嘅骚，因为我哋觉得大家而家有期望。”

不过提起农夫最有压力的时期，陆永便数到乐坛最为蓬勃那段时间：“𠮶时做任何嘢都要有Plan，因为大家都系咁做，一年要有几多首歌、出几多只碟。但你知我哋两个做嘢方式都唔系咁，变相就成为一种压力。”

早期作品被嘲似儿歌？　C君：我哋唔想令人觉得农夫系坏人

农夫曾经有不少作品题材也会涉猎到和儿童有关的题材，就如《学海无涯》、《问题儿童》等，深信有不少乐迷也听过，农夫的歌被喻为儿歌。对此他们毫不介意直认：“我哋真系攞过儿歌奖㗎！几荣幸呀！直头有传媒帮我哋确立咗呢个形象！”C君笑言：“对上一次大家听到有儿歌Rap嘅，好可能已经系家燕妈妈同紫昕姐姐。”陆永又接道：“其实好早期我哋都有啲睇法，系Hip Hop一定要咁样咁样，Rap又要点。而当时我哋已经觉得自己好嘻哈㗎啦，黑人音乐我哋一定比你听多上千倍，你哋咁都话我儿歌，咁不如你教我做嘻哈啦。但到咗而家我哋就梗系唔会再咁样钻牛角尖，就系个儿歌奖令我哋冲破呢种谂法。”

其实真正令他们冲破这个关口，是童年时家长对Hip Hop的误解。C君解释：“而家大家未必感受到，细个听Rap，如果阿爸阿妈知道咗，系会觉得你曳、烂仔，甚至再早期啲，连夹Band都畀人觉得系坏人。到我哋玩Rap嘅年代，就好多人会话：哗呢啲人好反叛㗎。所以我哋当时就有少少想法，到底有冇可能做一啲喺屋企都听得嘅Rap，连你阿妈听咗都唔会闹你。因为我哋有接触呢种音乐就会知道，佢唔系坏人嘅音乐，有啲歌都好有意思。当然去到呢个年代已经冇咗呢个问题，因为佢已经变成世界上一种主流音乐。”