【刘德华演唱会】粉丝排队购票被斩　华仔：令我个心好唔舒服

今时今日睇演唱会到底有几难？内部购票信用卡预售通通买唔到，请假去排队仲会有自身安全危险。继早前林俊杰粉丝排队买演唱会门票被斩伤，今早又有刘德华粉丝，于柴湾排队购买演唱会门票时，被人取岀利刀袭击，事主手及耳仔受伤需要送院。刘德华得悉事件后表示心痛，亲自拍片回应，希望大家注意自身安全。

26号下昼华仔方面发放短片，全片长1分17秒，片中华仔表现沉重，更多次停顿语带哽咽：“今日听到一个好唔开心嘅消息，伤人事件令我个心好唔舒服。其实我希望，喜欢我或者支持我嘅朋友，都能够平平安安咁去购买演唱会飞，开开心心咁嚟睇我嘅演唱会。我知道每一个有关嘅单位，佢地都花咗好多时间去谂，我亦都知道好难会有一个好完美嘅解决方法。所以喺呢段时间里面，我地会尽量去再跟进呢件事。但系喺呢段时间，我希望警方能够多加巡逻，保护所有嘅市民……当市民喺排队过程里面，如果感觉到安全有问题就要报警。我再一次希望大家喺排队过程里面保持冷静，注意自己安全，你地嘅安全，就系我开开心心表演俾你地睇嘅最大动力，多谢。”