【专访】BOP天堂鸟北上赚钱为追梦：有嚿钱先可以做广东歌！

乐坛每年也有新血诞生，风潮一转，旧有艺人可能已被遗忘。记得早几年韩风仍是大势所趋，快歌加跳舞仿佛成了歌手的代名词，那些年，香港一口气出了好几队跳舞组合，不论是男是女，受众或赞或弹，风头皆是一时无两。蜜月期过去，这些组合又该何去何从？2014至2015年，可说是BOP天堂鸟的蜜月期，由最初出道受网络抨击，再到后期改变歌路、形象，重获好评，每次出活动也有不下过百粉丝到场支持。可惜其后与前经理人公司遇上合约纠纷，现时仍重新摸索著前路……摄影：黄浩晋

旧公司力阻曝光　唱国语歌为助内地走埠

过去一段时间，虽然与旧公司的官司仍未完全解决，但BOP仍继续做著自己坚持的音乐作品，既为糊口，亦不忘追梦：“旧公司一直用不同的方法，阻止客户、传媒、各平台跟我们合作。幸好期间得到不同朋友支持，才令我们可以继续推出新作品。”早前推出国语作品《把你捧出手心里》，BOP一改歌路，由强烈节拍变成暖心情歌，原来是为了攻入内地市场：“去到内地接骚，好多时候客户都会要求你唱国语歌，所以打算做多一两首去迎合佢哋嘅需求。”

今时今日歌手要糊口并不是易事，尤其BOP三子现时凡事也要靠自己，为了继续追梦，也不得不面对现实：“大家都应该会知道，喺香港发展，其实收入同付出往往都唔成正比，所以我哋唯有去内地辛苦少少揾多啲钱，然后再返香港做属于自己嘅音乐。其实直到而家，我哋最想都系做广东歌，不过无论如何我哋都要切切实实有一嚿钱先可以去支持到自己嘅音乐事业。”

接受访问当日，BOP更即席为歌曲《把你捧在手心里》排舞。在歌曲MV当中也未能看到这个版本的舞蹈。

内地排场讲究　劲多保安包围似巨星

艺人到内地发展，不免也会感慨良多，尤其经历过香港乐坛中的起跌，有比较之下，更容易理解为何全球的艺人也纷纷涌向北方发展，成员Tyrese（欧镇源）表示：“喺香港做艺人，一样可以赚到钱，但好视乎艺人当时嘅状态系有冇作品、有冇宣传、有冇新闻，从而决定客户会唔会揾你出骚，因为香港市场唔算好大，但艺人有好多。而内地就比较简单，可能我哋三个嘅形象系符合活动形象就OK。”Lincoln（许俊豪）补充：“始终内地嘅工作会多元化啲，可能一个晚宴或者好简单嘅开幕都会邀请嘉宾，变相认识内地嘅agency都会易啲接洽工作。”

除了工作机会多，在内地出骚还有一种吸引力，让不少艺人也从中得到满足感，Gordon（叶灏基）解释：“喺内地做嘢好得意，啲人就算唔识你都会走过嚟睇你、同你影相，好似巨星级待遇。不过其实好矛盾，因为佢哋唔认识你，但知你系明星，佢先过嚟影相，而喺我哋心目中，就当然希望粉丝们系真正认识你、喜欢你。所以喺内地要令人知道我哋系天堂鸟，其实系好难嘅事，如果做到嘅话都会有满足感。”Lincoln再度补充：“同埋除咗观众之外，内地嘅工作人员都会令你觉得有种巨星规格。例如我哋落车会有好多保安包围，即使你其实喺当地冇粉丝包围住，佢哋都会令你好似一个歌手或者明星。”

Tyrese插嘴道：“其实都开心嘅，因为一返到上去（内地）就好似咩都唔使理，交通、食宿全部有人安排好。反观香港，每当完骚落咗台转个弯，我哋就去搭巴士，台上台下个身份系180度转。虽然我哋追求嘅并唔系呢啲虚荣感，不过𠮶份尊重始终都会令你觉得开心。”不过三子皆认同：“但无论如何，始终香港都系土生土长，有时都会怀念自己比较有名气嘅时候，有啲Fans追车、揾你影相嘅日子。虽然眨下眼可以咩都唔同晒，大家都唔记得你，但系每次谂起以前台上唱歌，台下会大合唱、会大叫你个名，𠮶份感觉同情怀都系最好。”

做群众眼中的地底泥其实幸福

近年官司缠身，天堂鸟承认各方面也的确有阻滞：“做歌、派歌、接骚都会比以前难。加上近年香港的确少咗商场骚，以前电台每年都会搞好多活动，变相令我哋多啲宣传，收入都会比较好。但而家少咗呢类途径，惟有装备好自己，所以我哋不停做歌，同时又会有自己嘅小生意去赚钱，从而支持我哋继续追梦。”

在外人看来，天堂鸟的星运好像一直平平，由出道被负评，再到及后种种的事件，用“黑仔”来形容也不为过。但他们三人却自言是幸福，Gordon说：“其实我哋嘅压力系比其他人低，因为我哋一出道就已经喺谷底。”

啲人当你系地底泥嘅好处系：每次你再做好少少，啲人又会对你改观。