【有片】张敬轩关智斌红馆激罕同台合唱　网友：现场尖叫声如核爆

香港歌手嘅演唱会，九成以上都会邀请嘉宾，有啲铁脚出现时观众会开心但无太大惊喜，张敬轩演唱会第四场嘅嘉宾，就成功令大家又惊又喜，就系相识十年以上嘅好朋友Boy'z﹗佢地一出场同轩仔合唱《死性不改》，全场欢呼狂叫大声到，连关智斌（Kenny）唱紧乜都听唔到，有网友就笑言：“红馆震到好似核爆咁。”

轩仔同Kenny呢对好朋友，由出道起就不时被凑成一对，大家对呢Pair HEHE密友都相当受落，不过前年传出佢地各有各忙渐行渐远。轩仔演唱会第四场，请来Boy'z做嘉宾，见到Kenny同轩仔合体，大家又点可能唔惊喜呢。唱到《死性不改》中段读白，三位百厌星大改台词，先系Steven问：“点解要咁啫？”继而望向Kenny:“点解你会嚟做嘉宾嘅？”Kenny就大声答：“我钟意呀，你吹呀？”又再次令观众狂叫。

由Boy'z升上台一刻观众嘅尖叫声就未停过，轩仔都忍唔住反问观众：“我都唔知你地叫乜！”轩仔对住Steven话：“哗，你讲野佢地都叫到咁。”转身一指Kenny：“咁佢讲野.........”又再引来观众狂叫，叫声犹如现场睇世界杯入球。轩仔笑住话：“知唔知咩叫无敌嘅嘉宾呀......”Steven即时翻抄一句指住Kenny “知唔知咩叫无敌嘅嘉宾呀？”又再一次引爆观众狂叫，Kenny这时大方企过轩仔到，仲用手揽住好朋友：“咩惊你？我企到咁都重得呀。”令观众拍烂手掌。

轩仔表示自己最初入行时已经同Boy'z成为好朋友：“既然咁耐冇见，有D私人恩怨想系到解决下，我听讲网上有人写左个故仔，话你地两个为左我系salon 打交，究竟系咪真？”Kenny就即时抢答话：“你谂多左啦张生！我地两个成日打交架！每次打完交Mani就会打来话，打还打唔好打面嘛！话晒靠个样揾食。”同一时间轩仔留意到Steven坐埋一边唔出声，问佢做咩，Steven笑言：“我见你地咁耐冇见，比你讲埋先啰！”观众狂拍手狂叫中，轩仔抵不住被他串，笑话：“你又知我地好耐冇见？”搅到观众不禁大叫:“嘴佢！嘴佢！”