五月天演唱会香港站再加位4月23日开售　唔通又要瞓街抢飞？

“有头发边个想做癞痢”，有得喺屋企高床软枕点会无端端想露宿街头，不过五月天歌迷偏偏每年都要体验，事关Mayday年年来港开骚，门票就一年比一年难买，刚刚3月29号开售时居然搅到售票系统跪低，各区更发生唔少混乱，五迷大战“南亚娱乐”。呢日主办单位宣布加售门票，咁咪即系又要排过？非也非也，睇埋先啦。

【五月天】票站系统故障开售一延再延 疑南亚裔插队“五迷”鼓噪

【召唤五迷】五月天宣布母亲节加开1场 329成军纪念日公开发售

五月天香港演唱会主办公司，喺22号中午宣布：“特别公告﹗﹗五月天 LIFE 《人生无限公司》2018 巡回演唱会无限放大版香港站，为了满足更多“五迷”需求，主办单位经研究后，决定分别于：5月5、6日及5月12、13日四场加开少量坐位。”加位推售㖞，未买到票嘅朋友仔有希望啦﹗不过系咪意味住又要瞓街呢？睇埋先讲：“门票在下星期一(23/4)上午10时开始，只限Cityline购票通网页订购，每人每次限购4张记住把握机会喇～”

今次只限网上订票，虽然都系未有网友力推嘅实名制，不过叫做唔使瞓街啦，五迷又满唔满意呢个安排呢？似乎又唔太受落㖞，事关上次公开发售整个售票系统跪低，对同一个售票系统信心归零，唔少网友亦洗版质疑：“究竟系真系加位或是卖唔晒飞？加得位就唔会只加四日……谁会放好啲椅又拿走，又放出来，你骗人都叻少少。”到底系咪真加位实在不得而知，不过叫做有多一个希望正价入场，五迷加油啦﹗