郑欣宜拍片即场邀请演唱会嘉宾　竟然唔系许廷铿？

郑欣宜（Joyce）最近积极筹备自己首个红馆个人演唱会，除咗练歌排舞之外，佢仲亲自去邀请演唱会嘉宾。一般歌手都唔会事先透露演唱会嘉宾，因为要保持神秘感，但欣宜今次不但止公开，仲拍埋片，即场向对方发出邀请，做法都算新颖。

郑欣宜演唱会郑少秋做嘉宾？ 欣宜：佢都喺乖乖地台下睇我啦！

欣宜自拍咗两条片放上网，佢话：“今日我特登撞上嚟，因为我知道有一个好特别嘅人彩排紧。”欣宜拎起一袋自家品牌的曲奇，话用嚟贿赂该名歌手，然后走进band房，一路行到尾，答案终于揭盅，原来佢想邀请嘅嘉宾系侧田。欣宜递包曲奇畀侧田话：“This is a bribe(贿款)，你愿唔愿意做我嘅演唱会嘉呀？”侧田闻言摇头话：“唔够呀呢度。”欣宜马上话整十打曲奇畀佢，仲好豪咁话每一个band member都有一袋。欣宜打温情牌话今次系佢第一个红馆演唱会，侧田听到就话觉得好紧张，同时亦好荣幸受邀，而且欣宜曾经做过佢演唱会嘉宾，边有得托手踭。

众所周知欣宜同许廷铿Friend过打band，佢哋仲自称系“异父异母低能巨孖宝”，有粉丝留言话以为欣宜会邀请许廷铿，仲话好想见到“铿铿”咁话。不过其实唔使担心，欣宜个演唱会连开两场，可能其中一场就系“铿铿”呢。