【专访】反击不负责任乐评 MastaMic：有几多人真系识听Hip Hop
MastaMic自资几十万推出新专辑《MASTAPIECE》兼开骚，就连佢自己都话今次玩大咗，如果蚀太劲分分钟要“收皮”。虽然听落好灰，不过佢依然有火。无论系做新歌，抑或反击负评，同样拳拳有力：“我使X你教我乜系Hip Hop咩！”
摄影：陈顺祯
“我从来冇话过Rap得快就越好”
“Rap得快唔等如Hip Hop啰”可算是对MastaMic的“热门留言”，速度是他的特色，同样因此经常被批评。MastaMic没好气说：“其实我rap得好快嘅歌比例真系好少，可能10只有7只慢，但啲人净系话我Rap得好快，我从来都冇讲过Rap得越快就越Hip Hop！Rap得快只系我钟意嘅模式。”
又有人话“Rap得太快听唔到歌词”，MastaMic回敬说：“听唔到听咪唔到啰！每首歌嘅功用唔同，点解要用一个concept去听所有歌呢？好似一啲好快嘅结他solo，你都执唔晒所有音㗎，你系听个情绪，听个氛围㗎嘛！Vocal(人声)都系其中一种乐器，Rap得快你咪当听紧鼓个Hi Hat，听个节奏嘅分布。”
反之，亦有声音批评《HK Rap Up》句子分布“齐葺葺”，指歌曲没有技术，MastaMic亦感到莫名其妙，他说：“大佬，你捉住我一只歌去闹晒所有歌，冇得好讲㗎㖞！就好似我讲明个面劲辣，你就话我净系识煮辣；我写咗其他风格嘅歌你哋唔听，然后就话我所有Rap都系咁，真系好搲头！”
他续说：“依家嘅乐评人要话俾人听自己识好多嘢，我真系好寸咁讲句，有几多真系识听Hip Hop啫？”
香港听歌风气普遍都“词大过曲”，难怪大部份负评都执着于“Rap得太快听唔到”，并一概而论指MastaMic的歌词没有深度，对此他也没好气地说：“如果系黄伟文填词，啲人咪觉得正啰！有时真系唔知佢哋‘OK’𠮶条线摆去边？”
“要落评论之前，不如先了解多啲个artist其他作品，再综合写一个公道嘅评论啦！”
专访上半部： 【专访】每月支出六位数点开饭？ MastaMic：出卖灵魂我收得好贵
《MASTAPIECE》新歌小剧透
笔者进行专访当日，“偷跑”先听几首新歌，犹如一个小型的Listening Session，MastaMic更分享了创作灵感以及当中值得玩味的地方。
1.《Fire》
《Fire》是最近期推出的歌曲，完全是技术向的作品，感觉有些似《Hate Me》的延续，但歌词节奏排列及复杂程度，完全是另一个层次。
MastaMic说：“啲人成日批评我Rap得快吖嘛，咁咪做只再快啲啰！虽然《Fire》bpm比《Hate Me》慢，但今次《Fire》有double time，三连音、六连音等等元素，所以歌词更密集，速度更快。”
I am the man on Wire /叫我咪太快
Set my mic on fire /叫我mic太快
I am the man on wire /Mic’s on fire
Streets get higher /叫我mic太快
2.《破地狱》
《破地狱》曲风是现时流行的Trap，一响前奏已营造了诡异的气氛，用呢喃语气唱着破地狱仪式的经文：“茫茫酆都中，重重金刚山，灵宝无量光，洞照炎池烦……”，内容在批评一些看不过眼的人与事。
MastaMic：“就算玩Trap唔代表个flow唔可以多变，歌词内容系将我睇唔过眼嘅人比喻为‘鬼’，用呢首歌去超渡佢哋！”他续说：“我成日觉得写闹人嘅歌，虽然有人会觉得好厌，但系个功用在于俾人练写歌词。你可唔可以用新嘅角度、包装、比喻去闹呢？”
3.《ROCKSTAR》
一首揉合Trap与Rock两种风格的作品，中间的结他solo实在是一大惊喜，所以话玩Trap唔一定系节奏疏落，元素简约，一样可以玩fusion。无论音乐元素还是歌词都见到将Hip Hop与Rock的事物共冶一炉，而且简单几句歌词就能让听众明白在批判甚么现象。
“竟然有摇滚系追求Hit Rate，乐队做访问个个扮晒谦卑”
“旧𠮶套精神一早变味，Shit！多口讲咗真话泄露天机”
“唔怕一无所有叫我崔健，唔似你哋甘心俾人催眠”
“Rap Like JIGGA，Move Like Jaggar”
JIGGA：Rapper Jay-Z的外号
Jaggar：乐队Rolling Stone的主音
MastaMic新专辑《MASTAPIECE》共收录13首歌曲，想完整听晒就要等到音乐会当日，可能大家睇完文字描述已经有晒画面，睇Live𠮶阵仲得了？净系全场大合唱破地狱经文已经够过瘾啦！