张敬轩“火烧头发”玩咁大？　工作人员当系炉头烧嘢食

张敬轩“降两度”终于确认6月开红馆骚，日前喺红隧口嘅poster一出已经令乐迷为之疯狂。不过，轩仔比大家更疯狂，佢为咗影poster连“火烧头发”都玩埋，所以大家睇到poster上面嘅火唔系CG，系真火嚟㗎。

今日轩仔喺instagram贴出“制作花絮”，团队邀请到印度“火烧理发”师傅出手，眼见师傅用梳将轩仔啲头发兜嚟兜去，加埋熊熊烈火真系好似炒紧𩠌。工作人员亦“好有人性”攞埋烧烤叉，喺轩仔个头上面烧嘢食，仲唔小心滴咗滴油落轩仔块面。玩到咁大轩仔都忍唔住话：“我一路以为自己呢个系人头，但原来我呢个系炉头！Cult到爆呀呢件事！”

虽然海报出街效果好玩，但拍摄期间都唔系易过。当日气温得7度，轩仔要半裸上身影相，但头顶就烧到“㷫烚烚”，真系特别的“冰火”体验。话说回来，“火烧理发”经过专业训练，大家切勿模仿。而且“火烧理发”唔单止系gimmick，其实系个treatment，轩仔都话头发顺滑咗：“真系‘令’咗同埋滑咗！我本身有少少干旱嘅头发，做完呢个treatment之后全部都冇晒！”