【自选Playlist】无勇气离开被窦返工？ 5首与你同步过冬暖心作
近日香港天气转冷，晚上及清晨市区气温跌至五六度，体感温度更可媲美零度，街上除了风声，就只剩“雪雪”声。在这样的天气底下，对努力工作的香港人来说，起身返工真系一个大难题。日本有乐团创作了一首《不想从被窝爬出来》来道出各位上班族的心声。香港人除了保暖外，最重要还是“阿Q精神”，在每天艰辛的返工路途上，到底听咩歌先可以令自己打起精神？
《早班火车》 – Beyond
寒冷天气底下，应该无咩事情比搭早班火车更辛苦。一大清早未训醒，著住臃肿嘅衣物，同一大班上班族好似沙甸鱼咁逼入车厢。由冰冷嘅空气转入焗促嘅环境，深信唔洗多解释大家都有苦自己知。呢个情况底下，想脱离呢个苦况，唯有合埋双眼、戴起耳机。Beyond《早班火车》或者系一个好选择，期望每朝都可以见到梦中情人，算得上返工路上嘅最大动力。
《几分钟的约会》 - 陈百强
讲到搭车遇上心仪对象，又点可以唔提“地下铁踫著她”嘅《几分钟的约会》，每次听到呢首歌，都会谂起车厢中未有低头族出现前，地铁总是充满著暧昧的氛围，那种“你眼望我眼”的情景令人怦然心动，有时“迫迫哋”、衣服与衣服之间摩擦产生静电都唔一定系坏事嚟嘅。
《终于好天气》 - 方皓玟&RubberBand
做人最紧要有希望，不论今日经历几痛苦嘅状况，只要见到曙光，就有生存落去嘅动力(好似系)。尤其喺澟冽寒风吹袭下，由起身离开被窝一刻你可能已经失去面对世事嘅勇气，不过“Don’t Be Afraid 就算绝境想征服你”，方皓玟同RubberBand都会为你打打气，《终于好天气》提醒你，只要撑落去，总会等到春天的到来，By The Way，我个暖包呢？
《黄昏点唱机》 - 容祖儿&林海峰
唔知你觉唔觉，明明朝早同黄昏温度差唔多，你都总会觉得朝早比黄昏更冻更难受。因为每朝你都知道迎面而来的除了寒风，更是排山倒海的工作，这种精神上的压力，比起车站的长龙更为煎熬。学周星驰话斋：“信念系好紧要！”所以做人最紧要正面！听返首容祖儿同林海峰嘅《黄昏点唱机》，幻想一下收工黄昏嘅美好景色，放松心情，其实时间好快过。
《夏日热辣辣》 (metal版)
唔少战斗民族俄罗斯人都讲过，点解佢哋唔怕冻?就好似食辣咁催眠自己话唔辣唔辣，就可以越食越辣。面对低温都一样，不停说服自己“天气都唔系好冻啫”，大概就可以晒个日光浴都无问题。当然，除咗自言自语，你仲可以有一个聪明啲嘅方法，就系听吓呢首《夏日热辣辣》metal版，应该会有种火滚嘅感觉。