【有片】传周杰伦将5度登央视春晚　破纪录献唱两首歌

每年内地央视春晚（春节联欢晚会）都系年度盛事，能够登上呢个舞台一啲都唔简单，对艺人来说简直有如一登龙门升价十倍。网上近日已不断流传出2018狗年春晚节目名单，总共有32个项目，继传出王菲同那英相隔20年再同台合唱后，呢日又有新消息 --- 周杰伦将会第5次登上春晚演出﹗

周杰伦2000年出道已经一炮而红，2004年首次登上央视春晚，其后4次上台演出。最近一次已经系2011年，呢次传出佢相隔7年再登春晚，将会献唱《烟花易冷》及《告白气球》两首歌。消息来自春晚节目组工作人员微博，仲话连航班都已经确定，令网友相当兴奋。

睇返过往4次周杰伦上春晚嘅表演曲目，2004年唱《龙拳》、2008年唱《青花瓷》、2009年唱《本草纲木》、2011年唱《兰亭序》，四次都系献唱一首歌，而曲目都必定系中国风。如果周董再现春晚，传闻中佢会唱中国风嘅《烟花易冷》，都属正常推理，不过如果佢真系会唱埋17年劲Hit，至今官方MV点击率达1.29亿嘅《告白气球》，咁就真系创新纪录啦。