【万千星辉】合唱环节弹琴竟然冇插线　谭嘉仪：唔会尴尬嘅

昨夜TVB的《万千星辉颁奖典礼》成为全城热话，由Mayanne攞奖感动时刻，讲到陆永得罪叻哥，甚至系汪阿姐嘅“山头文化”论，成个骚真系充满Talking Point。不过除咗睇住一班艺员攞奖讲感受之外，其实表演环节都相当精采，简直好似系同观众玩紧“找错处”嘅游戏咁，估唔到一个电视节目都可以有咁强嘅互动环节。尤其喺间场嘅唱歌部份，一班艺员被指咪嘴唱歌都唔系咩新鲜事，更甚系有眼利嘅网友一眼睇穿，当王浩信、唐诗咏、黎诺懿、谭凯琪、袁文杰、张达伦、邓佩仪、谭嘉仪上台合唱《陪著你走》嘅时候，负责边弹琴边唱歌嘅邓佩仪同谭嘉仪部电子琴竟然一条线都冇插！

参考文章：【万千星辉】成班艺员上台“咪嘴”？ 夹硬度唱歌位其实唔讨好

其实有啲常识嘅人都会知道，电子琴唔插线又点驳amp、又点会有声呢？两部琴仲要队到前一前，喺高清直播底下，电子琴嘅插孔可以话系一览无遗。见到咁嘅状况，就连网民都忍唔住戥两位弹琴嘅小花唔抵：“佢哋又唔系唔识弹，TVB搞到佢哋好似扮弹咁！”

有见及此，《香港01》揾嚟谭嘉仪解话：“大会其实有好多嘢安排，佢哋都担心临场有啲咩错失，所以佢哋都系想Keep到我哋表演嘅水准啫。”问到她事前知不知道原来电子琴冇插线，她表示：“都知道嘅，早几日已经会讲好。不过今次好多人大合唱，所以唔想影响到其他人嘅表现。”有留意谭嘉仪嘅朋友仔都会知道，其实佢一向都多才多艺，好多作品都系自己作曲作词，其实弹琴又点会难到佢？今次喺台上被发现部琴冇插线，佢又会唔会觉得尴尬呢？嘉仪大方表示：“我表演得好开心呀！唔会尴尬嘅！我好Enjoy可以喺镜头面前表演呢首翻唱作品。其实呢首歌我一向都好熟，要弹一定弹到，不过时间仓促，工作人员有好多嘢要安排，制作好多嘢都好急，所以佢哋就唔想我哋太辛苦。”不过她对网民的细心也感到相当惊喜并笑言：“下次再有呢啲部份，我哋会记得插返条线㗎啦！尽量都希望可以真弹啦！”