【有片】谢霆锋弹结他骚单线Solo　Chef Le Mon原来识弹古筝

谢霆锋正式宣告2018年会全面回归乐坛，早几日更耗资过百万人民币，于北京架起大型会场举行记者会，仲透露已经录好几首作品，嚟紧可能去外国唔同地方录音：“就系为特地去录结他声呀、弦乐呀等等。”绝对系不惜功本。元旦日喺叱咤舞台表演，重现单线Solo神技。原来霆锋除咗弹结他出神入化，仲识弹古筝添！最近就有网友翻出霆锋1人弹3部古筝嘅片段，果然不同凡响呀！

今年叱咤舞台上，谢霆锋联同Supper Moment以及触执毛互jam《活着VIVA》令人津津乐道，Supper Moment亦喺庆功宴为“单线Solo”平反：“唔好再话单线Solo易弹，你要弹得准系超级难！”原来霆锋唔只结他掂，仲识得弹古筝添！

有网友揾番去年10月霆锋上载到微博嘅短片，片中见到著住墨绿色厨师制服嘅霆锋，坐喺古筝前面专心弹奏，双手不停拨弄古筝弦，虽然就无弹结他咁出神入化，不过都听得出佢唔系乱弹架噃！最正嘅就要数到第45秒开始，明显一个剪接位之后，霆锋企咗起身紥马企好，双手分别放喺两部古筝上弹奏，节奏又完全接得上架噃，果然厉害！中西乐器都舞得掂，真系愈来愈期待霆锋开骚有咩特别表演。