【自选Playlist】圣诞禁歌要小心 唔好乱听《Last Christmas》
又到咗一年一度，天下间所有派对动物最期待，单身一族最想逃避的圣诞节。迎接平安夜嘅同时，深信唔少朋友都会被逼喺街上听到好多同圣诞有关嘅歌曲，即使唔出街，留喺屋企上网亦一样会见到脸书上嘅朋友无间断地分享圣诞歌。不过记得留意，唔系首首歌都好似《Jingle Bell》咁开心，亦有好多你未必有听开嘅歌曲，原来同《Lonely Christmas》一样有置人于死地嘅魔力。所以早啲做好准备，大家就可以平平安安、相安无事咁过返一个平安夜，无谓大时大节再特地为自己添上一层寂寞气氛。其实呢三日都唔系咁难挨啫。
《零度圣诞》 - RubberBand
RubberBand嘅《零度圣诞》，基本上同《Lonely Christmas》有异曲同工之妙。歌词描述热闹的派对中，主角呆坐一旁，看著好友踫杯起舞，心仪的女生与他人谈笑甚欢，偏偏只有自己听足全晚情歌，也未能鼓起勇气接近心仪对象，更惨的是，这个画面已经重复多年，而主角每年也只好默默跟自己说：“明年还有机会！”歌曲配以acoustic音乐作开首，令寂寥感更强。戴著耳机的你，斋听歌都已经有晒画面，令处于人海中的你秒秒钟也像是慢镜播放一样。
《曲奇圣诞歌》 - Cookies
唔好以为慢歌先系圣诞禁歌，其实对某啲朋友嚟讲，快歌一样可以系大杀伤力武器。Cookies初出道时期的作品《曲奇圣诞歌》，表面上是一首轻快欢乐嘅歌，连MV都系Cookies一齐开开心心开Party，不过原来歌词暗藏杀机。“又到圣诞 谁又在慨叹 又到圣诞 更加之怕冷 独身人最闷的夜晚”，一大班人开Party热热闹闹，突然唱句咁嘅歌词，独身人又再被插一刀，真系收几多礼物都补唔返！
《今年没圣诞》 - 许志安
讲到圣诞惨情歌，除咗陈奕迅嘅《Lonely Chrsitmas》之外，许志安嘅《今年没圣诞》都系一首代表作。深信好多情侣喺年头已经约定对方圣诞要去边去边，点过点过，甚至连礼物都一早准备好。可惜当中唔少人年尾都未等到，就已经变回朋友身份，又或者朋友都做唔成。一早Plan好嘅圣诞节目唯有揾另一个实现，礼物也只好转赠他人。最惨系被遗下一方，只能望住自己准备好嘅礼物暗暗概叹。如果你嘅情况都差唔多，呢首歌真系避得就避，因为实在系太应景。
《又到圣诞》 - 吴浩康
呢首《又到圣诞》并唔系《Santa Claus is coming to town》嘅中文版。吴浩康嘅《又到圣诞》再次系单身狗悲歌，圣诞冇街去，唯有安慰自己：“其实有工开都几好呀！”，歌曲重点不停强调“我冇事，我冇事！其实唔过圣诞可以烦少几样嘢，点解一定要咁大阵象呢？三𩠌一汤又过一日啦！”可能每个人心中也曾经试过这样“洗自己脑”，却更显心中空虚。越扮冇事其实越证明有事，如果有朋友经常哼出这首歌，记得关心一下他。
《Last Christmas》 – Tonick
《Last Christmas》绝对系圣诞真经典，由外国组合Wham！主唱1984年的原曲，不但被多位歌手翻唱，甚至成为了各大商场圣诞节的热播歌曲。播到出街又听到，返屋企又听到，唔讲真系以为呢首系圣诗。不过当个个都当呢首歌系圣诞神曲，开开心心咁听嘅同时，又有几多人真正留意过歌词内容。第一句“Last Christmas I gave you my heart But the very next day you gave it away. ”中文大意是指“上年圣诞节，我将我嘅真心交畀你，不过第二日你就将佢抛弃”。一首称得上元祖级圣诞惨歌的《Last Christmas》，实在不明为何会被大家当成应节歌曲去听。
而乐队Tonick一样曾把《Last Christmas》改编，由朋友借钱唔还一事开始贯穿整个故事。原来好兄弟向自己借钱，就系为咗追女仔，隔年你仲发现佢结埋婚生埋仔，而呢个女仔仲系你心目中嘅女神，剧情比《雷雨》更惨情。好多人会安慰自己“圣诞冇情人，起码都仲有朋友兄弟。”不过连兄弟朋友都掉低你𠮶吓…算啦你都系听住歌过圣诞啦！